مجالس الفرده - قصة الغدر

ومناسبة هذه القصة ان جد الشاعر جزاء الفارس والعقيد سند الهليمة من الحنتم من مزينه كان فارساً لايشق له غبار ولايغزو الا ويكسب وقد كان شره متركزاً على احد القبائل المشهوره وكان ذات مره خارجاً من قصربن رشيد في حائل فلما خرج صاح بن رشيد في قومه وقال هذه الجملة ( سند ياطلابته ) فسبقه إلى الطريق عدد من الرجال المسلحين وكان مع سند احد اصدقائه وأظنه من الحثول من الحصنان فلما وصل فيد (جنوب حائل ) فإذا بالرجال قد اضرموا النار وعملوا القهوة فقال سند لصاحبه انتظرهنا عند الركايب سوف آصل الرجال وآخذ علومهم فقال له صاحبه ياسند انت في ديار الاعداء وانت مطلوب وبطنك مليان من روس الرياجيل فقال لاعليك فلما اقبل عليهم طلب الأمان منهم قائلاً ( الامان يارجال ) فقالوا عليك الله وأمان الله يارجل اقلط تقهوا فلما اعطوه الامان قلط لديهم ووضع بندقيته في حجره لأنه آمن فلما صبوله الفنجال الأول قام احدهم( عليه لعنة الله ) من خلف سند فأطلق عليه عدة طلقات اردته قتيلاً ودفن في جدير فيد رحمه الله ولعن الله الخونه اهل الغدر

فقال حفيده الشاعر جزاء بن صالح بن سند الهليمه هذه القصيدة ووجهها إلى اخوه الشاعر سعود وطلب منه عدم الرد عليها .

ياسعود سلملي على الحيد الاسـود =اللي ترى من فيد وصفـه شمالـي
صوب الدويـه بالتواصيـف يمتـد =ويجري بوصفه عن حجار السهالي
اسمـه جديـر فيـد باسـم مخلـد =ولا يزول غير تزول سود الجبالـي
وان كان ودك عـن كلامـي توكـد =اسأل وتلقى العلـم مابـه اشكالـي
اسـأل منـاور للتواكيـد والـحـد =وتلقـى تواكيدالخبـر عنـد خالـي
ترى بن شافي كـل علمـه موكـد =وخوذ الحقيقة من صدوق المقالـي
عن المكان اللي نـزل فيـه ماشـد =دار جوانبـهـا هـيـار هيـالـي
ذاك الاديب اللي على الموت يـورد =ليا ثار عج الخيـل عنـد المتالـي
وان صح قولـي لا تقيـف وتـردد =اد التحية واجهـر الصـوت عالـي
واذا سمعت الرد في صـوت اجـرد =دقق بسمعك لو صدى الصوت بالـي
ولاني بسايلكم عـن العـد والجـد =ويكفيك عن مافي جملـة سوالـي
وابلـغ سلامـي والتحيـات بالـود =من قلب مشتاق تقـل فيـه صالـي
واذا سألـك وعـن حفيـده تنشـد =قله تبعـك وجـاب عقبـك عيالـي
وعقـب حـرار للمراقيـب تصعـد =حـرار تدهـل نايفـات الطـوالـي
وعرق الندى في روس الابطال يوجد =ومـن رام للعليـا تعلـى العوالـي
ثم اعتذرلي بالوفاء واحفـظ السـد =من شـان يبلـغ ماتصـور ببالـي
وقله حليف البـوق للبـوق شاهـد =عطـاك عهـده ثـم خانـك بتالـي
وانـا ترانـي حافظـه بالمجـلـد =من شان اشهد مكرميـن السبالـي
وبوق الفتى والغـدر ماقيـل ينعـد =لياصار ماهو في وطيـس القتالـي
مافيـه لا فخـر ولا يفلـح الضـد =ولا سلم يحسب من سلوم الرجالـي
ولو كان وقت منصرم يقبـل الـرد =سويت ماسوى بسميـراء الهلالـي
لعيون من مبسـم شفاتـه تمرعـد =تمرعاد برق في صـدوق الخيالـي
وان كان مانسقي عطـاش المهنـد =تحـرم علينـا لابسـات الشيالـي
امـا نتيـجـة حــص وزمــرد =والا عسـى حياتـنـا للـزوالـي
اقولها من جـد وان صـرت منحـد =والكامـل الله ماادعـي بالكمـالـي
لكن حـلاة الرجـل بالفعـل ينعـد =بالطيـب والا بالامـور الجـلالـي
لاشك وقت اليـوم ياسعـود يحمـد =يحمد بخيـره بالجنـوب وشمالـي
وساد الامـان وكـل خيـر تواجـد =ومن كثر خيـره غرزنبـه متالـي
في فضل حكام على الديـن تشهـد =ومنهاجهم سنـة عزيـز الجلالـي
وشعوبهـم بالفضـل والخيرترغـد =وكل يحـط الهيـل وسـط الدلالـي
وخلـوا اسـود مشاكسيـه تواسـد =ومستانسه بين الـذرى والظلالـي
وكم موردة ربع تشحط علـى الخـد =وراسه وقع وان صار راسه يلالـي
وافعالهم من كثرهـا مالهـا عـد =وتاريخهم مشهـود مابـه جدالـي
هذا وانـا ليـه بالاهـداف مقصـد =قصدي شريـف ولا لدعـواه تالـي
الا علـى نـاس تغيشـم وتجحـد =وينسون فضـل ميتميـن العيالـي
ومن زايد النعمـة تطيـش وتمـرد =جحـادة المعـروف بتـلا الحلالـي
ولا يجد المعـروف غيـر المقـرد =اللـي بهـدم حظوظهـا ماتبـالـي
نـاس بغيبـات المواقـف تـبـارد =وطايش فشقهم بالدخاخيـن سالـي
وحتى على جمـع النمايـم تحاسـد =ولا فيهم الا قولـت افـلان قالـي
وشـوك الفـواد نطوقـه ونتبـعـد =من شـان روس بالمعـزة عوالـي
واستثنـي اللـي بالقوانيـن تشتـد =اهـل العقـول الراجحـات الثقالـي
ناس على كسـب المعالـي تواجـد =وهاذي عوايـد كاسبيـن المعالـي
ولو كنت بين مصافق الجزر والمـد =بالصبر والحكمـة يشـد الحبالـي
وافهـم وصاتـه ياعربـي واتقيـد =وعسى وصايـاه الحميـدة منالـي
وياسعود دمـي بالشراييـن يصعـد =لا شـك اهـدي مابقلبـي لحالـي
وياسعود قلبي يابـس يبسـة القـد =واخاف يلـدن مضرعـات الليالـي
وان ولـدن ياسعـود همـي تجـدد =وتضيـع منـي حيلتـي واحتيالـي
ولا ادري بعد ياسعود وش يخفي الغد =سـر الامـور بغايبـات الحيـالـي
لا شك انا باوصيك ياسعود من جـد =وصيـة ماخذتهـا مـن حـلالـي
وصيـة مـن عنـد عقـل محـدد =ومكفـي راعيـه يمشـي عدالـي
عساك في جوهـر وصاتـي تجـود =والا وصـاة ياعربـي بالكمـالـي
ترى الذي شرواك بالعرف لـه يـد =حيـث انـت رجـال فهيـم مثالـي
اخوك عند اللازمـة يمـه تسانـد =ويشيـل عنـك ماتشيـل الجمالـي
حطـه بصيفـة والـدك لا تصـدد =واشفق على شيمة عضيـد موالـي
واليا ومـرك اخـوك بالـك تكـود =مره عسل ولا مـع النـاس حالـي
ولا تصير بين الناس كنـك مشـرد =ولا تصير في عقلك وفهمك خيالـي
واصحاء عن المنـان يمـه تنجـد =لومت في مضما النضـا بالمفالـي
وموت الفتى في عزة الراس يسعـد =ولا عيشة في عيون غيره خلالـي
ولا ترجي الا اللي له الناس تسجـد =على الله الوالـي عظيـم الجلالـي
وصلوا على شفيـع الامـة محمـد =عـداد ماذعـذع نسيـم الشمالي

الشاعر الكبير // جزاء بن صالح بن سند الهليمه الحنتمي الحربي

وسلالالالالالالالالالالال الالالالالالالالالالالامت كم