مجالس الفرده - قصة ناحي بن معتق ومجارة السديري بعد ماضاع طيره

السلام عليكم ورحمة الله وبركاته

هذه قصة وقصيدة للشاعر ناحي بن معتق العنزي ومجاراة الامير مساعد السديري له رحمهما الله

ضاع له طير كان يقنصبه وسمع انه في جبل فحمل مزهبه وذهب للبحث عنه فسمع ربعه بذلك فذهبوا اليه وقالو له حول من الجبل وابشر بالعوض انكروا عليه ان يدور عليه بعد ان امسى في الجبل حيث ان الطير يستوحش اذا امسى في البر في الغالب

طبعا يذكر كما سمعتا من راوي شمري لا يحضرني اسمه ان ربعه عاوضه بما يزيد عن ثلاثين طير وردها عليهم بعد يوم وابقى على واحد منها عنده

ثم تمثل بهذه القصيدة في طيره شلاح

أمس الضحى نطيت أنا رأس مشذوب=وغشاه من دمعـي سـواة الـرذاذي
طيري غدا وأنا مع الطير مرعـوب=من عقب ماني لاجرد الريش غـاذي
لاتبخل يالعبـد والـرزق مكتـوب=ولاترتهـي شـي وراه النـفـاذي
يـاالله ياعقـال يوسـف ليعقـوب=ياللي بغيـرك مـال حـي مـلاذي
اعقل على شـلاح يامبـري أيـوب=مودع غلب ريش الحبـاري بـذاذي
يمناه تشعط خربهن شحطت الثـوب=لياشافهـن ماشـد منـه شــذاذي
اشقر هجر ولاشفت بشلاح عـذروب=عذروب طيري ضاع منـي ولاذي
يامن يبشرني عسى الطير مقضـوب=وانفل بعيـد الطلـع بالكـف هـذي
ولاني على صيدة بخيلا ومسبـوب=ولاني من اللـي يفهقـون الجـواذي

ولما سمع معالي الأمير مساعد بن أحمد السديري هذة القصيدة عن طريق الشاعر المرحوم ا لأسمر بن خلف الجويعان ولم يكن يعرف صاحب الطير أعجب بها
ورد عليه بقصيدة على نفس الوزن يعدة بها أنه سيعطيه طيرا عوضا عن طيرة المفقود

وارسل في طلبه وقال للي ارسله هذي القصيدة وهذا الطير عوض في طيره ولا تجيني الا وهو معك يقصد ناحي

وهذي هي قصيدة السديري

يامرقب المرقـاب والدمـع مصبـوب=قبلـك تـرى روس المراقيـب تـاذي
احزم ضميرك عن سنا حضو لاهـوب=واخزن دموعـك خـل فيهـا فـذاذي
قبلك غدا للنـاس حاجـه وذاهـوب=ودنيـاك هـذي بيـن مــوذي وأذي
والطير يا ناحي صقـارة ومرغـوب=لاشك وقـت القيـض مابـه لـذاذي
عندي عوض طيرك من الشبك مجيوب=فـرخ تلعفـه الحـواضـي قــذاذي
جاك العوض وأصبر لنا وقت محسوب=يجيـك حــر مابريـشـة مــواذي
ياشوق غطروفا من البيـض رعبـوب=اشرب من الصافـي وظـل العـذاذي

طبعا راح المرسول وعطا ناحي الرد والطير وطلبه للذهاب معه للسديري فذهب ومعه على السياره واخذ طيره اللي جاه من رفيقه

لما اقبلو على المنطقه اللي فيها السديري حول في شعيب قريب وقنص بطيره ايام وفرة الارانب كما قال الراوي ان في ذاك الوقت تحمل السيارة من الارانب بعصا تمثيلا لكثرة الارنب قبل تقضي عليه الشوزن والوقوت

طبعا صاد ناحي اللي فيه النصيب واقبل عليهم واذا بهم يعلمون السديري انه جاء وعليقته فيها صيد وثوبه مليان دم فقال للطباخ لا تطبخ الذبيحه واطبخ لنا الصيد اللي جابه ناحي وامر احد الخويا ان يوديه لبيت احد الخويا المجازين ويكسيه ثوب وشماغ بعدها يجي للغدا

وبعد ان حضر ناحي جاء الطباخ وقومهم للغدا السديري كان يحسب ان الصيد ثنتين ولا ثلاث ولا حولها ويام شاف الصحن واذا بالصحن من كبار صحون الذبايح ومليء بما يزيد عن عشرين ارنب

تعجب السديري من ذالك وقال لناحي على كثر مانقنص ومعن السيارات والطيور والخدم والطباخين وغيره ماجبنا مثل ماجبته في يوم

قال ناحي حبيت تشوف فعل الطير من شان ماتلومني قال السديري الله يلوم اللي يلومك

وتعشوا الذبيحه الليل وتسامرو الى صلاة الفجر

يقول ناحي والكلام للراوي ماخلا قصيدة الا وسألني منها شي اعرفه وشي ما اعرفه

ثم في الختام قال ياناحي انت تقول في قصيدتك

ولاني من اللي يفهقون الجواذي

علمني وش الجواذي

قال بعلمك لكن قلي وش تقصد بقولك انت في ردك علي

فـرخ تلعفـه الحـواضـي قــذاذي

وشهي قذاذي اعلمك بالجواذي

قال قذاذي هو الطير يوم يقذ اللقمه في فم فرخه يقذها مثل دمعة العين

قال ناحي اما الجواذي فهي الشويه

فلما كان اليوم التالي

امر له بعطا وودعه وقال لا ضاع طيرك ياناحي فلا تدوره ارسل لي يجيك عوضه

فذهب ناحي وقال فيه القصيدة التالية يشكره

يـاالله ياجابـر عظـام كسيـرة=تفتح لنا من باب الأرزاق بابـي
ماراح قلـنا جعل بالأمـر خـيـره =تريّحي ياالرجل عقـب العذابـي
اللي زعج خطه وانا لـي بديـره=يمناه ماهـي للشلـل والعيابـي
خط ٍ لشيـال الحمـول الكبيـره=حييت يا خط ٍ لفوا بـه غيابـي
عساه يبو أحمد بلادك مطيـره=خطك محا شيبي وجـدد شبابـي
الطيب وادي وانت بوسطه محيره=يا مسقي العدوان من سم دابـي
ما لك شدي(ن) غير شط الجزيرة=ليا شافـه السبـاح لازم يهابـي
وعز الله أنـك منـوةٍ للعشيـرة=وعلى الوطن مثل مجرى السحابي
ودنياك للعـازات مثـل الذخيـره=واللاش مالـه للفنـا والذهابـي
ومقبول هدوك يوم جانا بشيـره=ومشكور يا زين النبا والجوابـي

وسلامتكم