مجالس الفرده - قصة سلطـان ومحمد حزينه جداُ

هذه قصة تحكى معاناة إنسان بسبب غلطة غير مقصودة أنهت حياته
سلطان بن رباح كان له خوي عزيز عليه هو محمد بن عقيل ومن زود ما يغليه سمى ولده الأول محمد على أسم خويه

كانوا راعين صيـد ،، وفي رحلة من رحلاتهم وفي فترة الظهيره كان محمد يجهز الغداء وسلطان ينظف السلاح ومن غير قصد وبدون علم بوجود الطلقة في مخزن السلاح اطلق الرصاصة وجت في خويه محمد قام سلطان وشال خويه وسلم نفسه ..

وضع سلطان في السجن وبدوا المشايخ يتوافدون على أهل محمد عشان يعفون عن سلطان المظلوم ولكن بدون فايدة

وصدر الحكم عليه بالقصاص !!!!

وبعد تنفيذ الحكم .. مصادفة صار قبر سلطان في جنب قبر خوية المرحوم محمد
فصاروا أخوان بالدنيا .. جيران في القبور

وهاذي القصيدة ..

يافلاح الهم خيم فوق قلبي يا فلاح
كيف تبغاني أسولف وأنت خابرني عليل

ويش قولك في عليل في حياته ما ستراح
تنتثر دمعه عيونه لا ظلم الليل الطويل

حالته لا ما تباعد حال ( سلطان الرباح )
بالخطأ راحت حياته والخطأ ما له مثيل

كان ويا صاحبه أثنين في أرض براح
يطردون الصيد دايم من صبح لين المقيل

أجمعتهم صحبه الدنيا على جد ومزاح
ما يهابون الليالي والحمول اللي تميــل

ما قتل عامد ولكن ثور أبليس السلاح
بالخطأ ثار السلاح وين يلقى له دليل ؟؟

أنعقد سجنه .. وربعه تنتظر فك السراح
والأكيد أنه سجين وما رضووا ربع القتيل

هل دمعة يوم صلى ركعتين فالصبــــاح
في نهار الجمعة اللي من ثقيل في ثقيل

هلل وكبر .... ونفسه تذكر اللي راح راح
كان في ربعه عزيز وذله الوقت الذليــــل

لا محمد لا تهاني لا سعود ولا صلاح
كلهم كانوا على باله وهمه في ( هديل )

طفلة ما كملت عامين صايبها كساح
وأنتثر دمعه وحاله من سبايبها نحيل

حان تنفيذ القصاص وغطوا الرأس بوشاح
وجاك سيافه يشيل السيف أبو حد صقيل

ارتخى رأسه وزاد الموقف الحامي صياح
بين نوح وبين دمع وبين صيحات وعويل

أرتفع صوت الحشود وزاده محمد وصاح
يايبه تكفى دخيلك تستمع قول الدخيل

يايبه وشلون نصبر كيف نهجع بارتياح
وانت من دنيا عيالك ما خذلك مر الرحيل

يا محمد هاك علمي وأحفظة قبل المراح
أنتبه لا خوانك وبالك عليهم لا تعيل

والله الله فالصلاه وفالصيام وفالصلاح
والله الله فـ ( أمكم ) والله لكم بعدي كفيل

غمض عيونه ونفسه تطلب الله السماح
رافع سبابته ( مظلوم ) والله الوكيل

سل السياف الصفا سيفه ودقة ثم طاح
راس ( سلطان المراجل ) وانتثر دمه يسيل

غسلوه وكفنوه وفاح طيب السدر فاح
وبالمصادف صار قبره جنب قبر أبن عقيل

يافلاح الكارثة ما هي سوالف يا فلاح
خلني ساكت ودور غير هالقصة بديل