مجالس الفرده

مجالس الفرده (http://www.alfredah.net/forum/)
-   مجلس قصة وأبيات (http://www.alfredah.net/forum/alfredah104/)
-   -   الشاعر الكبير ناصر ضيدان الزغيبي رحمه الله والغز 00 (http://www.alfredah.net/forum/threads/alfredah19131/)

ذعذاع الشمال 12-03-10 08:31 PM

الشاعر الكبير ناصر ضيدان الزغيبي رحمه الله والغز 00
 
هذي قصة وقصيدة للشاعر / ناصر بن ضيدان الزغيبي الحربي رحمه الله وجميع اموات المسلمين .


جاء إليه صديقه مفرج بن الفحيط يطلب منه أن يقول قصيدة على لسان بن الفحيط في معشوقته,, لكن ناصر مشدوه البال ومشغول في الدين الذي عليه وفي بدته وقال قصيدة يسندها على ابن الفحيط يشرح له حالته ووضعه في رمز من الشعر وهو الدين الذي عليه يصفه على الحمل,, وقد ورد على ناصر الزغيبي الكثير من القصائد يتخرصون هذا الحمل من ضمنهم عمر بن ناحل مركب مندوبه على قعود ثم رد عليه ناصر يصف لون القعود وسرعته وأخيراً عاد القعود إلى فيحان الذويبي من شيوخ بن عمر من حرب وقد وضح الحمل بالقصيدة اما ناصر الزغيبي فهو يقول:


يابن الفحيط القلب كافيه ما فيه
*********** هوجاس يا عقيل يبيّح كنيني
والله لولا الرجم يوم اني ابديه
*********** مع سجتي يوم على الطيبيني
لا أقنب قنيب اللي عن الجو حاديه
*********** قـمرا وحـدنه كلاب القـطيـني
يا راكب اللي كن الادمي توزيه
*********** ولد عـبكلي من ذلـول البـديني
امه ذلول ذويخ منسب وغاذيه
*********** وأبوه جابه من شمال الحنيني
الصبح من جال الرديفه امّشيه
*********** حط الرياش والفـويلق يميني
يسرح قعودي والزبيره مماسيه
********* يلفي مفرج شوق موضي الجبيني
ابشر بفنجال عن البثل صافيه
*********** يشدا خضاب مربــيات الجنيني
مع كبش مصلاح يسومه ويشريه
*********** من مربـية خرفانها للسنـيـني
لا قال سيم بزود قال أبك عطينه
*********** فيما تقـول وللثـمن تـقـتـفـيـني
والى سرى المجلس وهراجةٍ فيه
*********** ما ثالـث لاثنـين مستانسيـني
انشدك عن حمل الرحل ويش يخفيه
*********** لا بينه ما فيه غـبر السنـيني
لا صار ما فوقه اهدوم اتغطيه
*********** وبار العميل وقام حمله يبيني

وصار لهذه القصيدة أصداء وانتشرت عند قبايل حرب وغيرهم ويتخرصون الحمل ومن ضمن القصائد التي وصلت إلى ناصر بن ضيدان هذه القصيدة من الشيخ عمر بن ناحل شيخ النواحله من الأحمده من شيوخ بني سالم من قبيلة حرب وهو من البارزين بالشجاعة والكرم يقول الشيخ عمر بن ناحل :


يا راكب حر خفاف مواطيه
********** فـوقه دلال زين ودويـر عـيني
أبوه هرش للصعيدي مربته
********** وام القعود الزين فاطر ارديني
من عندنا يسرح وناصر مماسيه
********** لو هو باسافل نجد طلق اليميني
ثم انشده عن حادث حادث فيه
********** هو قل والا صار همزة لعيني
وجاني قعودي بالخبر من مناصيه
********** جاني سريع وجاب علم رسيني
يا ناصران العلم حاديه باديه
********** تركه ولا تركة حدا الحاجتيني
ان كان تقوى الصبر فالصبر يبريه
********** والا إبيت عبيد والله يعيني (2)
كم واحد قلبه وجيع ويلهيه
********** كما تلهي الخود خطو الجنيني
يشوف ما يبغض بعينه ايباريه
********** يضحك ويكنز بالضماير ونيني

(2) يقصد بيت عبيد بن رشيد الذي يقول:


اضرب على الكايد الاصرت بحلان
************* وعند الولي وصل الرشا وانقطاعه

ومن ضمن القصائد التي وصلت إلى ناصر بن ضيدان القصيدة التالية للشاعر مسلط بن ثويني الحربي مرسلها الى ناصر يقول فيها:


يا مل قلب ضيق الصدر راعيه
********** لولاي أعـذل به عن المستحـيـني
عمال مشغول بهمه وطاريه
********** الا الـى صكـوا بـــه الغانـمـيـني
لا لاح له مرقاب وده ايعديه
********** وان قلت هذا الدرب حطه يميني
ما هوب لاقي له صديق ايصافيه
********** ولا ضنتي بالراي صفيو اثنيني
يا راكب حرزها لبس راعيه
********** مامون قطاع الفيافي هجـيــني
لولا الرسن صكة اضروسه لواحيه
********** وعقب على كوره عــياب يبـيني
يشبه لفرخ بيّن اللوح راعيه
********** لا صف جنحانه بعد حـومتيــني
يلفي لابن ضيدان حيثه يلفيه
********** أبو محـمد مـدهـل الغانمـيـنـي
تبشر بفنجال يشب النظر فيه
********** وسوالف تطرب له الحاضريني
مع كبش مصلاح بفرقه امربيه
********** وقـم الرباع امتجرينه سـمـيـني
وعطه نصيحة من نصح له وحاميه
********** عن دقـة في مجـلس الخايـبـيـني
ليت الردا وسمٍ على وجه راعيه
********** الـلي يـدق بغـيـبـة الـغافـلـيــني
فطنتني شيء وأنا قبل ناسيه
********** وانت غـديت لهم قـلبي عـويــني
كمل جواب وصرفه يم واليه
********** اللي سعى بك وانت ماء مهيني
متكفل بالعبد من حين ينشيه
********** ليما يـرده لأسفـل السافـلـيـني
والرزق عند مسير العبد مجريه
********** محيي الفياض الباليه بالغشيني
والدين ما ناخذ ندور الشرف فيه
********** الا انـسدد به خــلـول تبـيــني
حناسبب جمعه وهمه وطاريه
********** لو يجزي المعذار ما كان ديني
الدين دين وعند حسن الرجا فيه
********** لا صار للطلاب رب ضميني
رب كريم خير يلتجا فيه
********** الله مع المديون والمعـسريني
واكمال عند اللي يحوش الردا في
********** لابه شرف دنيا ولا عز ديني

الشاعر ناصر بن ضيدان الزغيبي عندما وردت اليه هذه القصائد قال من الواجب اني أرد عليهم بقصيدة على الموضوع



فأركب قعود بقوله:


يا مل قلب ضيق الصدر طاريه
********** لو لـنـت مع قلب العـنا ما يلـيـني
انا آزنه من خوف يكثر تخطريه
********** والقـول ودك له زبون وضمـيني
ما قل دل وزبدة الهرج شافيه
********** والعرف ما يعرض على العارفيني
والزين سمي زين ما أحد معاديه
********** والشـيـن ما هـو مكسـب الغانميني
والطيب كلٍ وده انه يسويه
********** لاشـك ما كل العــرب طيـبـيـني
البارحة فزيت من مرقد فيه
********** فــزت خطاة الوالـدة بالجــنـيـني
علمٍ لفاني كنت من قبل راويه
********** ولا نيب أعلم الغيب لكن فطيـني
حي القعود اللي لفاني ويراعيه
********** من عمر بن ناحل هلا هـلوتيني
اعداد مزنٍ هل وجهه وتاليه
********** واعداد مازار الحرم محرميني
نبي نولم له قعود ايباريه
********** حــيـث انهم لعلومنا مشـتــقـيني
يا راكب حرٍ خفاف مواطيه
********** ما طـاه بالـخلـد الجـلـد ما يـبـيـني
ما دنق الرقاع يرقع سماريه
********** خص الشعر والجلد صافي بليني
الساق هو والورك كانك محليه
********** والفـخـذ ما تكتف عليه اليــديني
واذريعه عدك عن الهبر لاحيه
********** والعضد فتر ومبسط القـفـلتـيني
والزور تقل ريال به ما تماريه
********** وكيـعان طفاح على المرفـقيـني
والكتف لوح وغاربه شف راعيه
********** والراس مربوع على شف عيني
وعينه سراج مطوع تقتدي فيه
********** واذنه كما زلقـت خطاة السنيني
وبريطمٍ ضافي حلا ما تحليه
********** حابس ونيبان كما الشوكـتيـني
ورقيبته وان شفتها ما انت شانيه
********** ولا قلت لولا كل وصفه حسيني
أشقر حمر كن الفرنجي تلضيه
********** أحسن شخص ما كان لونه حسيني
احذر من الريمي وزوله يحاليه
********** وأسرع من البارق يروح ويجيني
يجفل الى شاف السفيفه اتباريه
********** جني وذيب وطار عنه اليـقـيني
يشدا فريد ذيره شوف راميه
********** مع سهلة والشوف فيها يبـيني
ضحا قعودي باللوازم امدنيه
********** عساه طارش خير يالمسلميني
تمت تواصيفه على شف راعيه
********** هجهــوج قطاع الفيافي سميني
يلفي عمر لو في قرى نجديميه
********** وعـقب ثلاث أيام عــلمه يجـيـني
اللي نشدني عند ما هو ب هاقيه
********** أمجرب ومـر حول فــهيم فطيني
الدين حملي لا بلاك الولي فيه
********** من قــل ما بـيديه سمي مهيني
منول آخذ من عميلي ولا اعطيه
********** وأقول انا واياك مثلا حـقــيني
وجاني بخط رشمته في علاويه
********** والحكم صار اليـوم للمشـتـكيني
وكزيت لمفرج مشاور واشاكيه
********** ولا نيب قاصرها عن السامعيني
وجاني قعودي يم غيره امعديه
********** شيخ ولو شان الدهر ما يشيني
فيحان بن ناهس الى حل طاريه
********** بأهـل زمان اليوم ماله حـتـيـني
هراج تيما ما توني سوانيه
********** ما ينعرف ورده من الصادريني
يمنا تلم المال لاشك تفنيه
********** على هل الشرهات والقاصريني
يما عطا من عبد لو كان يشريه
********** مع حرةٍ تطوي الخلا باليـديـني
الطيب عقب عقاب حاشه بياديه
********** لو كان عـقب عقاب به طيـبـيني
والعد يورد من جنابه وعاليه
********** والرس ما تلقى عليه القـطيني
والى اعترض في جاه ما أحد ينافيه
********** يكفي عن الغياب والحاضريني

وتحياتي لكم





م/ن

ذيبان 12-03-10 10:07 PM

رد: الشاعر الكبير ناصر ضيدان الزغيبي رحمه الله والغز 00
 
مشكوووووووور والله يطول بعمرك

ابن ضيدان الزغيبي شاعر متمرس

وانت احسنت الاختيار يا الصقر

ذعذاع الشمال 13-03-10 08:10 AM

رد: الشاعر الكبير ناصر ضيدان الزغيبي رحمه الله والغز 00
 
اقتباس:

المشاركة الأصلية كتبت بواسطة ذيبان (المشاركة 140176)
مشكوووووووور والله يطول بعمرك

ابن ضيدان الزغيبي شاعر متمرس

وانت احسنت الاختيار يا الصقر

شاكر لك مرورك العطر 00

ابو يزن 13-05-10 01:15 AM

رد: الشاعر الكبير ناصر ضيدان الزغيبي رحمه الله والغز 00
 
شكرا لك على هذا الابداع

خلوود الفرده 14-05-10 07:26 PM

رد: الشاعر الكبير ناصر ضيدان الزغيبي رحمه الله والغز 00
 
كل الشكر لك اخوي على النقل الرائع


الساعة الآن 12:01 PM

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO TranZ By Almuhajir

Ads Management Version 3.0.1 by Saeed Al-Atwi

لتصفح الموقع بشكل جيد الرجاء استخدام الإصدارات الاخيرة من متصفحات IE, FireFox, Chrome

Security team

vEhdaa 1.1 by NLP ©2009


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52