?> قصة : الأيام [الأرشيف] - مجالس الفرده
المساعد الشخصي الرقمي

مشاهدة النسخة كاملة : قصة : الأيام

نواف فارع
06-12-11, 10:32 PM
( القــصــة )




وصلتني قبل يومين رسالة على الجوال وبدون اسم , يعني رقم بس .
والرساله فيها أبيات وبدون أي كلمة أو تعليق , والرقم غريب شوي ,,,
أطالع بالاسلوب , يمكن أعرفه من بعض كلماته أو ( قاموس مفرداته )
انتظر دقايق يمكن الرجال يتصل , مافيه فايده , ماعرفت الرجال .
انتظرت ساعة يمكن يدق على الجوال , وأكيد الرجال حاده من الامور شي ومنحرج ويبي يشوف وش ردي ,
المهم ماكلّم ولا أرسل رساله ,
فقلت خلني أعلمه باللي عندي وأكيد إنه شروى من يسمع ( يقرا ) فأرسلت له المعنى أوالمضمون جواباً لرسالته .
وكانت رسالته هي :



سلام من ساق المعاني بترتيب=سلام من دنياه مرآ وحــــــالي
سلام من ضافه جروحآ معاطيب=سلام من يسهر طويل الليالي
سلام من عينه لهمه معازيب=سلام من شمسه عليها الزوالي
سلام خالي من جميع العذاريب=سلام مثل الشمس نوره يلالي
سلام لو يقراه من صابه الشيب=طش العمامه وأحتزم بالعقالي
سلام لو يسمعه راعي المخاليب=عن هدت المقناص جاه إعتزالي
سلامآ أقوى من عوى الذيب للذيب=سلامآ أحلى من قراحآ زلالي
سلام ياراعي الوفا والمواجيب=سلام ياشيخآ عزيزآ وغالي
سلام مني خاص ياراعي الطيب=تسليمت الهاجوس يومه طرالي
تسليمتآ ماتقبل الشك والريب=فيها من علوم العرب والمعالي
يسوقها ريحآ كما نادر الطيب=تمطر سحايب شوقها بإنهمالي
هذا سلامآ جاك يبغي التراحيب=ماهو سلام المصلحه والتعالي


أنا تأثرت طبعاً ببعض المفردات مثل :

( من عينه لهمّه معازيب ) , ( وضافه جروحاً معاطيب ) ,
( ومن شمسه عليها الزوالي , وغيرها ... ) .

فكتبت هذه الابيات بسرعه ولا اعرف الرجال ولا ادري وش يبي .

( ولكن أكيد إنه رفيق ومن معنى الأبيات أكيد إنه بحاجه ) .
فأرسلت على نفس الرقم :


أرحب هلا ياللي بعثت المكاتيب=يرخص على شانك عزيز الحلالي
لو كنت مدري وش ورى صفحة الغيب!=عن واجبي لاقمت يرخص ريالي
دنيا البشر دايم عناها سراديب=ياما كسبت إبْـها وياما غدالي
أرسلتلي وأخفوا عليّ المناديب=وراحت بي افكاري جنوب وشمالي
وامسيت اطالع عاليات المراقيب=وانشد وادوّر يابعيد المدالي
لكن يبي يكشف لنا الوقت ويجيب=وابشر بعزّك لو حمولك ثقالي
كلي فدى لمعرّبين المجاذيب=شروى زعيمٍ بين عمٍ وخالي


المهم بعدها بيوم ويدق الرقم :

- سلام ,,

-عليكم السلام .. يالله حيه .

- طولنا بالكلام ..

ماش ماعرفت الرجال .

- ( أنت فلان , أنت فلان )

- قال : لا .

- أنا : فلان بن فلان البيضاني .
( زميلي قبل 17 سنه ) كنت أنا وياه دورة عسكرية .

- قال : وابشرك بخير وعافية .. وأنا نقلت من الرياض والآن في القصيم .

ورقمك أخذته من واحد من الربع يعرفك .

والأبيات تراها مقوّله ولاهي لي لكن أعجبتني وفيها من السلام الشيء الكثير وقلت أرسلها لك .

(( وتراي خابره ماهو شاعر )) .

لكن لقيت الأبيات في ( قوقل ) متناقله وماعرفت قائلها ,,

اللي يعرفه الله لايهينه ولاعليه أمر ياليت يفيدنا .

وسلامتكم ..

انتهت القصة .
علي الجضعان
07-12-11, 09:29 PM
صح لسانك بن عمي

رد رائع من روائعك وكفؤ اباعبدالسلام

تقول وتطول يابن راشد وشكرا ع الاضافه

ولكن لوكانت في المساجلات ماكان انسب

مجرد راي وتقبل مروري
نواف فارع
08-12-11, 06:31 PM
صح كلك شاعرنا القدير / أبوعمر .

وكلك ذوق ونظر .. بنقدك وفكرك ووجهة نظرك .

والروعة والإبداع بمرورك وجمال كلماتك .

وتصدق انه قالي أكثر من واحد ليش ماكتبتها في قسم المساجلات .

ولكن مثل ماذكرت أن الأبيات ماهي من المرسل .

والموضوع فيه شيء من عناصر القصة , فكتبتها هنا .

دمت بهذا الرقي والتميز .

وتقبل تحيتي وخالص تقديري .
غازى بن عجاب أبوزوايد
09-12-11, 09:22 AM
الشاعر
ابا عبد السلام
أنت شاعر لايختلف عليك إثنين
وأنا من المعجبين بشعرك رديت رد وافي
وكفو والله من ربعٍ يقولون ويطولون
لكن انا مع راي ابو عمر
تقبل مروري وتحيتي
نواف فارع
10-12-11, 12:49 AM
شهادة من شاعر وناقد مثلك أبوفيصل ..

مدعاة للافتخار .. فدمت وسلمت ..

وهذا من كرم أخلاقك .. ورقي معانيك .


تحيتي وخالص تقديري .
ريم
11-12-11, 08:55 PM
كم انت رائع نوااف شاعر واديب وقاص
وصياغة للمعاني .. بشكل انسيابي وسلسل
ماشاء الله عليك يابن العم
نواف فارع
14-12-11, 10:54 AM
دمت ِ بهذا الابداع والتميز .

أختي القديرة / ريــم .

وسلم مرورك وحضورك .

تحيتي وتقديري .
خلف الفريد
14-12-11, 02:52 PM
ابا عبد السلام
مبدع دائما انت ..
سواء في ردك او تواجدك
،،،
هنا ابحرت بنا شعراً
وابهجتنا قصةً
واسعدتنا رداً
،،،
وهذا اسلوب "القادرين على التمام"
صح لسانك وبنانك
،،،
لاعدمتك
.......
نواف فارع
15-12-11, 08:25 PM
ازدادت القصة وأبياتها .. بهجةً وسروراً بمرور مثلك وشرواك .


أديبنا وناقدنا / أبوعبدالعزيز .

ودمت بهذا الحضور والتميز .

تحيتي وتقديري .