?> (الطيب كايد والمراجل توافيق) [الأرشيف] - مجالس الفرده
المساعد الشخصي الرقمي

مشاهدة النسخة كاملة : (الطيب كايد والمراجل توافيق)

النمر الارقط
22-11-10, 01:30 AM
البارحه حلّق بي الهمّ تحليق= لين اعلن الصبح السعيد انفلاقه
اسجّ واغفا واسرح شوّي وآفيق= واروق لوماني بصوب الرواقه
وأن جيت ابكشف ماتكنّ المعاليق= تحكمني سلوم العرب واللباقه
ومن ضيقتي سقت القدم للشواهيق= في مرقبٍ مانيب افضّل افراقه
ارتاح له لامن حدا خاطري ضيق لاصار ماعندي على الصبر طاقه
اسيّر المعنى .. واجرّ الطواريق= واليا عصا الطاروق اشدّد وثاقه
واسجّ فـرياض النفل والزماليق =واقطف من أزهار البساتين باقه
وانقا من اصناف الذهب فـالصناديق= مايبهر الشاري ويغري مذاقه
جواهرٍ .. تشفق عليها العشاشيق= اللي يعَشقون الفرايد اعشاقه
(الطيب كايد والمراجل توافيق=) يحريبها اللي يمّها حثّ ساقه
اللي يفز اليا لفوه المطاليق= وشوف الرجال الطيّبين اشتياقه
درب المراجل عسر وينشّف الريق= على الرديّ اللي علومه ادقاقه
اللي ليا طال المدا قال / ما اطيق= قلّه / مـتبرك للثقيلات ناقه
ياقلّ صدقان الرخا حزّة الضيق =فـالماقف اللي به تبين الصداقه
فيه الحرار الشقر تصبح غرانيق= ويبيّن الهافي رداه ونفاقه
وياقف لها اللي يحتمون المواثيق= اهل الحميّا والوفا والعراقه
الله خلق .. والله فرق فـالمخاليق =وبين الردى والطيب مابه علاقه
ابديت ماكنّيت وسط المعاليق =واخفيت ماتملي عليّ الرفاقه
وتبقى صناديق الضماير مغاليق =ماتكشف اسدود الرجال الحماقه

الشاعر راكان بدن السبيعي
ميس الريم
22-11-10, 08:53 AM
الله خلق .. والله فرق فـالمخاليق
وبين الردى والطيب مابه علاقه

نقل رائع وصح لسان الشاعر
لك الشكر النمر الأرقط
منصور الوسوس
22-11-10, 11:27 PM
صح لسان الشاعر راكان السبيعي
قصيدة من اروع ما قرأت
شكرا لك اخي النمر على هذه الاضافة
النمر الارقط
22-11-10, 11:37 PM
الرائع مرورك اختي ميس الله يعطيك العافيه
لكي ودي
النمر الارقط
22-11-10, 11:39 PM
نورت ابويارا الله يعطيك العافيه على التنسيق
لك ودي
غازى بن عجاب أبوزوايد
25-11-10, 10:20 PM
الله خلق .. والله فرق فـالمخاليق
وبين الردى والطيب مابه علاقه




لك الشكر اخوى النمر الارقط على الاضافه الرائعه



تحيتي
النمر الارقط
26-11-10, 12:01 AM
نورت اخي ابوفيصل يعطيك العافيه على المرور
لك ودي