ديوان الشاعر خلف الفريد ( قصائد ) [الأرشيف]

أبو وسيم

12-02-10, 10:37 AM

السلام عليكم ورحمة الله وبركاته

مهما سطرنا من حروف وكتبنا من جمل لانوفيه حقه علينا

ابدع وسطع اسمه بكل المحافل تجده مع الصغير والكبير بنفس الطيبة

شاعر كبير ويعتبر من فحول الشعراء التي تفتخر قبيلة الفرده به وبشعره الجميل

لقب بعندليب المجالس

هو شاعرنا القدير خلف محمد عتاق الفريد الفريدي ( أبو عبدالعزيز )

وسوف اضع لكم هنا قصائده التي كتبها في المجالس

فاتمنى ان تنال هذه القصائد على اعجابكم

لكم الوقت في الاستمتاع

اول قصيدة هي

من وين تبدا يابن عتاق من وين=يومك نهمت الشعر واسرجت خيله
الملتقى طيبه والاضياف غالين=والدار دار الشيخ عز القبيله
زيد النشاما يرفع الراس ويبين=ومواقفه بالطيب ماهي قليله
شيخٍ اليا منه نوى يقوم مايلين=واليا بغاها ما تعوزه وسيله
بدا بها فكره وصارت مضامين=والحمد للمعبود صارت جميله
ويا مرحبا ومن التحايا ملايين=عد النجوم وعد وبل المخيله
باللابه الي قرة النفس والعين=لاجا نهارٍ فيه حطه وشيله
كان انها بالجاه مثل السلاطين=وكان انها بالحرب سيوفٍ صقيله
تكاملوا ربعي على الوعد وافين=وهاذي عوايد كاسبين النفيله
بالمرجله ومزارق الطيب عجلين=يوم ان خطو اللاش رجله ثقيله
وصار اجتماع اليوم جمع على الزين=وفرحة لقانا اليو م اكبر دليله
ولو الليالي فرقت بين حيين=مانعتبر رداتهن مستحيله
يامرحبا باللي لفونا عزيزين=اهل العلا اهل النفوس النبيله
حياكم الله عند ربعٍ محبين=الفرع عود للجذور الاصيله
جينا لكم تقدير وايضا مهنين=ويوم اجتماع الشمل كل يجي له
انتم رجالٍ من رجالٍ عريبين=ومكانكم محفوظ ماحد يزيله
وليا سمحتوا لي ابآخذ عناوين=في دفتر الامجاد سيره طويله
ابا امدح شيوخٍ على العز ضارين=وانا اعتبر مدحي لربعي فضيله
اللي لهم في قصر الامجاد بابين=من يدهله يلقى ذراه ومقيله
شيوخنا الحماد اول وهالحين=متوارثين المجد من سلسبيله
الراس ابو غازي به العقل والدين=واليا برك للحمل لازم يشيله
شيخ الشيوخ اللي على العهد باقين=ريف القريب وعون من يلتجي له
وشيوخنا الهدبان ربع مسمين=منهاجهم بالطيب مافيه ميله
اللي مشيختهم لها سنين وسنين=تسنموا فرع يباري زميله
من عهد ضيف الله اليا عهد حثلين=لما ذوي مخلف خذوها حليله
وشلاح بن متعب خصيم المعادين=شيخٍ على ضيده فعوله جزيله
يسلم ابو سطام موف الموازين=يوم الردي يمناه تبخل بكيله
وهادي راع النقره لنا درع ويمين=الله يرحم شايبٍ هو سليله
دايم جديد ومن شيوخٍ جديدين=وذي شجرة الحماد دايم ظليله
وامدح دهاليسٍ على الموت جسرين=لاصار طعم الريق كالحنظليله
شيوخ قوم حمول قبٍ شياهين= لا ولع الحراب راس الفتيله
ومدحت من ربعي رجالٍ قليلين=لاتحسبون اللي ذكرته حصيله
العود عقب له زحولٍ مهيبين=مثل الجبال الراسيات المهيله
هذي حقايق والحقايق براهين=ماهي حكاية الف ليله وليله
هذا ونا اخوكم وسويت بيتين=عظم العرب وامجادكم ترتكي له
كل الجماعه عندي عيون ويدين=وارج السموحه كان فيهن هزيله
واللي حضر من حرب حقه على العين=مدحي لربعي بعض مدح القبيله
حرب امنا ندي لها الحق حقين=والام مدح عيالها تنتشي له
وصلاة ربي عد همس المصلين=على نبيه مصطفاه وخليله

أبو وسيم

12-02-10, 10:41 AM

وهذه القصيده القاها بمناسبة فوز الاخ/ سعود بن محمد بن حديد الفريدي في الانتخابات البلديه في الدورة الاولى :

الليله الفرحه لها اشكال والوان=ماباقي الا نشعل العاب ناريه
كن الفراش يحوم في كل الاركان= يفرد جناحينٍ لها الوان سحريه
ياليلةٍ بين الليالي لها شان=يبقى لها في صدر الايام ماريه
شفنا بها كل الجماعه والاخوان=على الشحم والطيب والشاذليه
وغيثٍ على(كبدي) كما رش هتان=ارخى جنوب وحده النافعيه
ليته تعدى يمنا الذود عطشان=على العدود ولا سقينا المطيه1
وانا حضوري ياهل العرف فرحان=وكن القمر ونجوم الافلاك بيديه
جيت ابا اهني فارس بين فرسان=بن حديد سعود واقول حيه
بالعزم اخذها والتنافس كحيلان=حلبة سباق وفاز راع العبيه
من نسل شيخٍ يذبح كبار وسمان=ولا يشتكي من لاذ به مكرهيه
لعل ابو فالح بروضات وجنان=ولا يحرمه ربي شفاعة نبيه
ومدحي ترى مايحط من قدر الاخوان=اللي ادوا المجهود روحه وجيه
ولا احد خسر فيها ولا فيه زعلان=دام الهدف خدمة وطنا سويه
ولاني بناسي وان تناسيت غلطان= اليا مدحنا سعود نمدح خويه
مبروك ابو تركي ولو صرت عجلان=نبيك تحدد ليلة سامريه2
وذي تجربه واللي حصل صار برهان=على الولاء والحب والجاهزيه
الحب لدين الله وشرعه والايمان=ومع طاعة الراعي وحق الرعيه
الجاهزيه شافها بوش وعنان=حزنا على تقدير ميه بميه
في ظل حكمٍ فيه حكمه وميزان=ونهج الشريعه للوطن مرجعيه
الله يثبتهم على الحق سلطان=بأمن وأمان ونعمة سرمديه
ولا يهمنا مايقوله فلان وفلان=حنا نعرف الطيبه والرديه
ولازم نحط بداخل القلب عنوان=بخط عريض وركزوا لي شويه
حب الوطن ماهو كلام على لسان=ولا هو سكوت او قولة ماعليه
لازم نصير لمن بغا الشر عدوان=وترى مع الفتنه تضيع الهويه
واصلاحنا ماهو بتصنيع تايوان=ولا هو من الغرب المنافق هديه
اصلاحنا خطوه بخطوه مع اتقان=مع حرصنا على المبادي حميه
يقودنا نهج الرساله وقرآن=ودستورنا من عند رب البريه
وصلاة ربي عد ما اهتزت اغصان=على نبيٍ عزوته هاشميه

أبو وسيم

12-02-10, 10:43 AM

هذه القصيده قالها شاعرنا بمناسبة زواج / نايف بن جازي الوسوس في حفر الباطن بداية عام
1428هـ
__________

والله لجي لو المسافه كلايف=واني للبّي دعوة الخال واجيب
ولو الظروف ثقال تصبح خفايف=مايبيّن الوافين كود المواجيب
والمرجله والطيب دايم ولايف=لاحازها الرجال نعم المقاضيب
وهاذي صفاتٍ كلها عند نايف=اقولها كلمة حقيقه وتجريب
واخوانه اللي كالسيوف الرهايف=نسل الكريم الحاتمي كاسب الطيب
الشيخ ابو نواف حر النوايف=اللي بعزمه ذوّب الصعب تذويب
شيخ بنى طلحه بعزم ونكايف=حتى زمت في عاليات المراقيب
هداج تيماء بالليال العجايف=ومع الكرم والطيب كثر التراحيب
وانتم شهودي بين سامع وشايف=عسى ولي العرش يجزاه ويثيب
عساه في قبرٍ براد وهفايف=في كل يومٍ تطلع الشمس وتغيب
من لابةٍ يامن لها كل خايف= لاجا نهارٍ فيه مثل المشاهيب
اليا احتمت ما يرتضون النصايف=الناقصه عند العرب مطلبٍ عيب
كم استووا من فوق قبٍّ عرايب=وكم اعتزوا مابين حماد وهديب
اولاد راشد والعزاوي صلايف=دون الشرف والروح فعل المشاذيب
ولا احدٍ يحوف المرزمات العطايف=اليا علا صوت البني الرعابيب
وايمانهم عن الدنايس نظايف=عوق الخصيم مدلّهين الاجانيب
مدحت ربعي بالبيوت الّلطايف= ولا انتقص حّق القبايل ولا اعيب
باذن الولي ماينبسٍ الشفايف=الا بكلمة حق مايشوبها عيب

أبو وسيم

12-02-10, 10:47 AM

عن هذه القصيده يقول شاعرنا
حينما كنت اتنقل بين جنبات هذا الصرح الشامخ تهيضت فجائت هذه الابيات

قربوا لي طيبكم ياهل المباخر=طيبوني ياوجيه الطيبيني
(المجالس ) طيبه والطيب فاخر =والنشاما جالسين وقايميني
ليه ما طش العمامه واتفاخر =وارفع ايديني واضم الراحتيني
النسب بالعود والتاريخ زاخر =والقبايل كلبوهم شاهديني
اسمحوا لي جبت مكنوني من آخر = واختصرت امجادكم في كلمتيني

أبو وسيم

12-02-10, 10:55 AM

وهذه القصيدة تحكي عن نفسها

ياهيه ياللي جاهلٍ بالنتايج=احذر ترى بيديك عيدان كبريت
من كثر تسويفك غدا الجوف هايج=ادنى شراره منك تشعل دناميت
كثر الوعد ماتنقضي به حوايج=علاقةٍ صارت على كف عفريت
يابو سبيبٍ لاتحركت مايج=وعلى النبي لاشفت "باقيك" صليت
لاتطيع بي هرجٍ مع الناس رايج=بالله لاتفرّح علينا الشواميت
ولا تقطع حبال الوفا والوشايج=ولا تحسبني دالهٍ لو تراخيت
عندك خبر حبك بالاعماق لايج=وخطاك عندي صح مهما تماديت
وان غبت عني كن مافيه دايج=في غبةٍ من دون وجهه وتوقيت
ارفق على اللي ساجه اليوم سايج=جداه مع بلواه كثر التناهيت

أبو وسيم

12-02-10, 10:59 AM

هذه القصيده قالها شاعرنا حينما شارك بها في مجلة (التنميه في المملكه العربيه السعوديه-عطاء ونماء واستقرار)
الصادره هذا الشهر عن لجنة التنمية الاجتماعية في بلدة كبد بالقصيم

(((الملك الباني الموحّد)))

متى في غير ابو تركي تباها=قواف الشعر جزلات ٍ نقاوي
مليك ٍ سيرته سيرة بطوله=وتاريخه يعجّز كل راوي
مليك ٍ فيصلي ٍ شاد حكمه=على الدين الحنيفي السماوي
وجعل نهجه على سنة نبيه=وتوحيده على اسلوب الطحاوي
بنى مجده على امجاد ٍ قديمه=ورثها عن بعيدين الهقاوي
هل العوجا سلاطين الجزيره=حرار طويق صلفين العزاوي
بداها بالرياض بحد سيفه=وعون الله رفيق ٍ له مخاوي
ثم اعلنها فتوحات ومغازي=بغير العزم وش جدوى المناوي
وبسم الدين والتوحيد نادى=ومشاها مشية القرم الرهاوي
ولبّى دعوته خيرة رجاله=هل التوحيد ورّاد المهاوي
جمع شمل البلاد وعز شعبه=عقب كانت شتات ٍ ما يساوي
وعلى التوحيد وحّدها وصارت=ملاذ الكل بالوقت القساوي
ويوم ارسى دعايمها وقامت=تفرّغ للبناء الحر النداوي
وتركها دولة ٍ حجم ومكانه=وعمّ الخير والعيشه حلاوي
ومن بعده ملوك ٍ يشبهونه=على دربه مشوا نفس الخطاوي
مفاخرهم عناوين ٍ كبيره=على وجه الدهر مثل الصطاوي
ثمان عقود والدار امحميه=على رغم العدا من كل عاوي
وبعد الله ثم الخير فيهم= تجاوزنا معاً كل البلاوي
رعوا حق الوطن وايضا المواطن=شعار ٍ بيّن ٍ رغم الدعاوي
وشعار التنميه هم رافعينه=مع الدعم الحقيقي السخاوي
من اجل المجتمع قامت صروحٍ=بدار الحضر او دار الشواوي
رعاها خادم البيتين دايم=حبيب الشعب بالوقت السناوي

عسى ربي يعينه في مسيره=دعاء المخلص العبد الرجاوي

أبو وسيم

12-02-10, 11:02 AM

هذه القصيدة قالها شاعرنا بهذه المناسبه جيث يقول :

..ولأنه اليوم الوطني وللوطن حق علينا هذه مشاركة لي سابقه خلال حملات التنديد بالارهاب

وأفعال الارهابيين الذين خانوا الدين والوطن..

(((( لا للأرهاب))))

مرحبا باهل المكانه والصداره=وفي ضيوف ٍ شرفونا بالقدومي

حفلنا بقدومكم ليله نهاره=ولا نوفّي حقكم مهما نقومي

جيت ابشركم واطالب بالبشاره=الوطن محفوظ والشر امهزومي

والله اللي حافظه من كل كاره=وياعساها نعمة ٍ دايم تدومي

قبلة الاسلام للعالم مناره=وقدرها بقلوبنا فوق النجومي

انتحمل دونها كل المكاره=ونفتديها بالنفوس اللي تشومي

ونحمد الله من رمانا صار شاره=عوّدت لصدور رامين السهومي

كلها ايام ٍ قليله واستداره=ويعلن الداعي ترى الامر امحسومي

ونستعيد ايامنا البيض ونضاره=وعن بلدنا تنكشف كل الغمومي

والحرايق مبتداها من شراره=وان تركناها غدت نار ٍ شعومي

اتكلم وانا في حلقي مراره=وكل كلمهْ عبرة ٍ معها وجومي

اتكلم عن شباب ٍ شب ناره=واكتوى فيها الوطن واخيار قومي

عن شباب ٍ يتبع افكار المغاره=بالوطن والدين يبيع ويسومي

حاربوا قادة وطنهم في جساره=وطاعة الوالي على المسلم لزومي

وكفروا خير المشايخ يا خساره=يتبعون اللي يدسون السمومي

المساكن فجروها والسفاره=والضحايا كلهم دم امعصومي

ويذبحون ضيوفنا سر وجهاره=من يخون الضيف والضيف امحشومي

الثعالب اصبحت مثل النماره=والخفافيش الضحى صارت تحومي

وصلت الجرأه بهم حتى الوزاره=حاولوا تفجيرها بئس الحلومي

قلعة ٍ تاخذ عليهم كل غاره=لين ضاعت عقبها كل العلومي

هو جهاد اللي يفجّر وسط داره=ويبني افكاره على فتوى الرخومي

كم من دار ٍ يتموا فيها صغاره=واحرموهم من حنان ابون رحومي

وكم كبود ٍ عقبوا فيها حراره=وكم عيون ٍ ماتهناّ بطعم نومي

قلتها واقولها باوضح عباره=والحقيقه ماتغطيها الكمومي

واضحه والحر تكفيه الاشاره=عل بو وجهين يطيح ولا يقومي

ولا للأرهاب نعم لاندثاره=ومع ضياع الدين تضيع السلومي

حملة ٍ ضد الارهاب وذا شعاره= قبضتين ٍ للرجاجيل القرومي

أبو وسيم

12-02-10, 11:04 AM

هذه القصيدة قالها شاعرنا بهذه المناسبة ويقول

كما وعدتكم احبتي هذه القصيده التي القيتها في حفل الاخ / محمدبن ناصر بن سعديه الفريدي الذي اقامه في قصر القواره للأحتفالات بمناسبة فوزه بعضوية المجلس البلدي في القواره:

ياحمود ليه الدرب طوّل مساره=انته تسوق الجمس والا بك يسوق
خابرك انا ياحمود قلب وشطاره=ايضا ولا انته بالمهمات مطفوق
شدّ الجميحي لين يقدح شراره=لين الخطوط البيض تصبح بلا فروق
شدّه نبي دارٍ بقلبي قراره=حبٍ قديم وحافظه وسط صندوق
علاقةٍ بيني وبين القواره=مثل العلاقه بين عاشق ومعشوق
ديرة هل التوحيد واهل الصطاره=احبها والشاهد المستوي فوق
احبها واحب شمّة اغباره= ونخيلها اللي كلها ظل وعذوق
وسهولها وجبالها والزباره=وفياضها اللي تدهله شمّخ النوق
اللي اليا شميت ريحة حساره=اليا اختلط في وسطها كل زملوق
يزول عن كبدي ركود الحضاره=ويعود لي حبٍ من القلب مسروق
ويا حمود لا منك لمحت المناره=ارفق عليه وخل مشيك به رفوق
قدمك مطبين ٍونقطة خفاره=سلّم على الحارس وبسلوب مرموق
ولا يرتفع عندك انبير الحراره=العسكري مثلك من الطين مخلوق
ثم ودّعه ياحمود باحسن عباره=وخلّك بوجهك ثم تياسر يم السوق
ولا جاك دوّارٍ كبر ضلع صاره=خذ الجنوب اسبق ولا تصير مسبوق
وانحر بنا قصرٍ ضيوفه عماره=عساك تعمر دوم ياقصر مرزوق
قبل امس فيه سعود ركز اشعاره=في ليلةٍ كمّل بها الطاق مطبوق
ومن شان ابو تركي ثنينا الزياره=يقودنا سلك الحرير ومعه شوق
حرٍّ بغا العليا واخذها جداره=بالجد والاخلاص والعزم والذوق
شامت لبو تركي ونسيت وقاره=وتخيّرت بين النشاما لها شوق
عنده صفاتٍ حطته بالصداره=دين ورجوله مع تواضع ومنطوق
واسمع يابو تركي نصيحه واشاره=اللي عطاك الصوت اصبح له حقوق
انت طلبت وحمّلوك السفاره=دايم تحملهم وخلك على روق
خذها سياسه وابذل الجهد تاره=وتاره توقّع كل مطرود ملحوق
وصلوا على اللي يوم ربي اختاره=ارسى دعايم دين واحكم لها الطوق

نبينا نور البلاد ونهاره=عدّ النجوم وعد مالاحت بروق

أبو وسيم

12-02-10, 11:14 AM

هذه القصيدة قالها شاعرنا متهيضا بذكرياته

شيء من الذكريات :

لو العذارى على الاخلاص مبداهن=ماحد ٍ شكى لوعة الهجران ياراضي

مافيه لحد ٍ حمايه لكن احماهن=دونه حدود الحمايه حمْر وعراضي

غلطان من ينقضي وقته برجواهن=يضيع عمر الفتى كله على الفاضي

وانا رهين المحبه والزمن راهن=تعبَت سنينه اتعزّيني عن الماضي

دايم يجمّع مجاهيمه وينقاهن=واليا اقبل الليل ورّدهن على حياضي

اشكي جروحٍ بقلبي صعبٍ دواهن=عصنْ على كل مختَصّ ٍ بالامراضي

ايا ليالٍ مضن لي كيف ابنساهن=اليا تذكّرتهنْ قلب العنا جاضي

ازريت لسلا غرامي بهْن واسلاهن=عايشْ على ما تبقّى له من انقاضي

أبو وسيم

12-02-10, 11:17 AM

هذه القصيدة قالها شاعرنا بهذه المناسبة ويقول

عاتبني احد الاعضاء الجدد على الخاص بسبب قلة وجود مشاركات كبار شعراء القبيله وقد ركز على

الصفحه الاولي والحقيقه انا لا اعرفه ولكن لانه لامس بعض شجوني وعدته بأن

اهديه احد عشر بيتا من العيار الثقيل هاهي:

ياذيب ياللي للمجالس تحوفي=تلقى العشاء بطرافنا يالسنافي

والجود بالموجود وانته عروفي=وليا بذلنا الجهد ماهنا اختلافي

وتراي من اللي لا عطا الوعد يوفي=وليا مشيت الدرب مانظر خلافي

ارقى سنود ولا وطيت الحيوفي=اثبت الاقدام لو كنت حافي

ولا تردني عن المواجب ظروفي=وعن المكدر نشرب العذب صافي

ومن شان ربعي ماحسبت الكلوفي=هم حضني اللي لاقسى الوقت دافي

ابذل لهم لو يتعبن الكفوفي=هم لي بحر وانا سفينة مرافي

شبهتهم بمشذرات السيوفي=والا الرماح اللي تخج النحافي

عوق الخصيم مرفهين الضيوفي=ولا كبرت القالات قالوا عوافي

ربعي عيال العود شم الانوفي=هم عزوتي هم الذرا واللحافي

وليا احتميت بلابتي زال خوفي=هذا جوابي كامل واعترافي

أبو وسيم

12-02-10, 11:20 AM

هذه القصيدة قالها شاعرنا مطالبا قبيلة حرب بالتصويت للشاعر
بدر الظاهري في شاعر المليون .....

ما دمت اوحّد خالق الكون.. مسلـمْ=وامشي على منهاج سنـة خليلـه
ما تهمني بعض الدعاوي ولا اهتـم=لو كل واحـدْ قـام يعطـي دليلـه
ولا يهمني من لاحمل داخلـه هـمْ=ما يهمنـي ياكـود سمعـة قبيلـه
والظاهري باسم القبيلـه .. تقـدّمْ=حصان حرب اللي طويـلٍ صهيلـه
شاعرْ وشيخْ معرّب الخـال والعـم=ومن راس قومٍ يحتمـون الدبيلـه
وفي شاطي الراحه عجـاجٍ تراكـمْ=والخافي اعظم والتحـزّب وسيلـه
لعبٍ على المكشوف والبادي اظلـمْ=واليا نطحنا اعصار ما ننحنـي لـه
كل القبايـل تنتخـي وانتـم انتـم=انتم هل الفزعات واهـل الجميلـه
وانتم هل النخوات والضعف لا رْحمْ=ولا نامت عيـون الجبـان الذليلـه
لا ترتخون !!... الظاهري ينتظرْكمْ=يوم ان كـلّ ٍ لابتـه ترتكـي لـه

ذي صرخةٍ يا حرب.. قولوا لنا ..تم=دامه تقدّم بدر ..بسم القبيلـه

أبو وسيم

12-02-10, 11:27 AM

هذه القصيدة قالها شاعرنا بهذه المناسبة ويقول

اثناء توقف مجالسنا خلال الايام الماضيه
دخلت الى مجالس حرب بعد طول غياب
وكانت هذه المصافحه

هاذي يميني يامساء الخيـر ياحـرب=وحبّة خشم ..هذا صريـح اعتـذاري
ما تهت!! والله عارفٍ سالك الـدرب=فيما مضى ..واستسلـم لكـل زاري
عذري اسوّف واجمع الطرح والضرب=وفي خانة التسويف بايـع وشـاري
ويا مدوّر الوجهه يم الشرق والغرب=انا دليلـك كـان مـا انتـه بـداري
هاذي مجالس حرب يا طالب القـرب=نجم الشمال اللي قـدى كـل سـاري
من اليوم هي زادي وهي طيّب الشرب=وايضا ذرايه عـن هبـوب الـذواري
وهاذي يميني يامساء الورد ياحـرب=يا تاج راسي ..عزوتـي وافتخـاري

أبو وسيم

12-02-10, 11:29 AM

هذه القصيدة قالها شاعرنا متميزا في أدائها ويقول

بإسمكم جميعاً بعدعودة مجالسنا ولله الحمد...............

عشرين يوم ٍ كنها عام كامل=اشتقت فيها للمجالس واهلها
حتى مزاجي شان والفكر خامل=والنفس تشكي من عناها مللها
واليا سالني سائلٍ قمت اجامل=واعزي النفس الشقيه ... باملها
ولو اتصبر واصطبر واتحامل=فرقا حياة الروح ..من يحتملها ؟؟!!
ياما سهرت الليل ماكل ولا آمل=بـس اتنـقل بيــن زاهي حـللــها
اكحّل عيوني وروس الانامل=وسيلة التعبير والروح ولْـها
وما صار بالتاكيد ظرف وعوامل=والحمد للمعبود مَنّ وعدلها
والحب والاخلاص تحصين شامل=وهذا زمان ٍ فيه كثرت عللها
ولاني بخايف يالليال الحوامل=الصرح شامخ.. قمته من وصلها؟؟!!
حكيت باسم الكل والعلم صامل=ومرّت سحابة صيف ما اضعف بللها

أبو وسيم

12-02-10, 11:32 AM

هذه القصيدة القاها شاعرنا في حفل الشيخ /هادي بن محمد بن سلطان بن حماد رئيس مركز
النقره الذي اقامه هو واخوته تكريماً لمشائخ واعيان قبيلة حرب وذلك يوم الخميس
ليلة الجمعه الموافق 26/3/1429هـ وكانت ليلة مشهوده

يومه دعاني منبع الطيب والفيض=ابا اترك الاشغال واقول فاضي
قالوا تريّض قلت ما اصبر ولا اريْض=من عادتي عجلٍ سريع انتفاضي
يوم ان خطو اللاش يحتاج تنهيض=كني احلق فوق سبع الاراضي
ما يردني برد الشتاء ولاهب القيظ=وفي صحةٍ زينه وجسمي رياضي
وقلبي يحرضني على الطيب تحريض=وفي ما قفي دايم تذلّم حياضي
واللي جذبني بارقٍ له تواميض=غطّى على النقره وصبحا العياضي
حفلٍ جمع من حرب روس ومباريض=اللي مواقفهم اكبارٍ اعراضي
اللي لهم بالطيب مشي ومراكيض=اهل الزعامه والسيوف المواضي
واهل الكرم لو الكلايف بواهيض= وزبن الدخيل اللي من الخوف جاضي
واهل الوفاء لاصار فيها نواقيض=واهل الولاء لاصار فيها امتعاضي
مروضين اللي نوا الشر ترويض= وعند الخطا مايعرفون التغاضي
ننهل من بحورٍ للامجاد ما تغيض= وحقوقنا مانردها بالتراضي
الحق ما يوخذ بنقش المعاريض=من يطلبه ياطا مليل الرماضي
يامرحبا وقلوب ربعي نوابيض=عد النجوم وعد نبت الفياضي
انتم لنا ياحرب نون اللواحيظ= ومن حبكم مايعتريها غماضي
يامرحبا واغلّظ الصوت تغليظ=في دار نبعٍ مايعرف الغياضي
الشيخ ابن حماد غيث المناويض=حرّ ٍ على الجزلات فيه انتهاضي
شيخٍ ورث طيبه من العود تفويض= موثّقٍ توثيق ما هو افتراضي
والوجه الابيض مايبي زود تبييض= ومن جرّب الطولات عاف الخفاضي
واليا تحمّسنا ترى فيه ترييض= الحق ما يحتاج تحكيم قاضي
حق القبايل ما يجي فيه تبعيض= اليا قرنّا الحمل جبنا الشضاضي
من غاب منهم مانويناه تعريض=واللي حضر منهم عليه البياضي
والشكر لله في وطنا محاظيظ=بامن وامان ولا علينا حواضي
في ظل حكمٍ ما نبي عنه تعويض= حكمٍ رشيد ولا عليه اعتراضي
وردتهن بيضٍ وصدرتهن بيض= وانا على ما قيل قانع وراضي

أبو وسيم

12-02-10, 11:35 AM

هذه المشاركه قالها شاعرنا بمناسبة الاحتفال الكبير الذي أقامه اهلنا وابناء عمنا في العلا العزيزه
تكريماً لجماعتهم الفرده من اهل القصيم والمدينة المنوره وعلى رأسهم مشائخ الفرده
من الحماد والهدبان واعيان المنطقتين وذلك يوم الخميس الموافق 18/4/1429هـ
------
مدخل
--------

يا زائراً أرضَ العُلا اترى معيْ=هذا السّموّ لأرضِها ورجالِها
الواثبونَ الى العلا بفعالِهم=الشامخون كما شموخِ جبالِها
رضعوا من المجدِ التّليد لبائَه=فاشتدّ عودٌ واكتسى بجمالِها
قد عانقَ الابداعُ صُمَّ جبالِهم=فتفيّؤا بظلالِه وظلالِها

******************************

بسم الذي نزّل تبارك وياسين=الواحد المعبود جلّ جلاله
اللي خلق خلْقه من الضعف والطين=وبقدرته سنّ الحرام وحلاله
والمجد والتاريخ سطّر عناوين=في هالمكان اللي تكلم جباله
قامت حضارات وبادت بَعَدْ حين=وما يريده الله كاينٍ لامحاله
سبحان من يعطْ المخاليق تمكين=وليا حصل عصيان عجّل زواله
هنا اعتبار القلب والعقل والعين=وتبدّل الاحوال حاله لحاله
ويا اهل العلا قلتم هلا قلت وافين=هاذي عوايدكم وهذا مجاله
وهاذي طبايعكم من سنين وسنين=مع الكرم والحب طيب وشكاله
والليله الفرحه لها عيون ويدين=وتميّزت عن الليالي بهاله
هالة وجود الحاضرين العزيزين=اللي تواجدهم يزوّد جَماله
نخبة ضيوفٍ يرجْحون الموازين=روس الرجال اللي لهم كل طاله
وحب الوفاء عند الاكارم قوانين=وتواصلٍ بين القلوب وجِماله
ويا عيال راشد اسمحوا لي بحرفين= على عَجَلْ وانا عدو العجاله
ياهل العلا واهل القصيم الميامين!!=وياهل المدينه !! طيبكم من يناله
يازين جمعتكم على الحب يازين=ومبروك جمْع الشمل عقب انفصاله
جَمْعٍ جَمَعْ غالين في دار غالين=ولا هي غريبه للقبيله رجاله
انتم تفوّقتم بكل الميادين=ودستم على الدرب العسير بسهاله
وامجادكم ما تحتويها دواوين=وافعالكم عزمْ وصمودْ وصماله
واسم الفريدي درّةٍ بين كفين= كفّ الفََخَاْر وكف حرب الاصاله
وللشيخ ابن حماد مني ثمانين=حبّه على خشمه ومقْدَمْ عقاله
زيد المعالي لاقسا الوقت ما يلين=ولا ثَقْلت الاحمال زاد احتماله
شيخٍ برايه لاعدمناه راضين=وناكل من صحونه ونشرب دلاله
هاذي جهوده مع جهود المحبين=اللي يحبون الوفاء والرجاله
قلته وانا سعودي من اوّل وهالحين=وبكره بَعَدْ..عِزّي ولا ابغى بداله
ليّه علم فيه الشهادات ثنتين=شهادة التوحيد وايضا الرساله
وليّه شعارٍ فيه نخله وسيفين=على الرخاء والعدل فيه الدلاله
وليه شرف خدمة ضيوفٍ لبيتين=حقّ ٍ اساسي ما طلبته وكاله
وليه وطن اشرف الاوطان تكوين=اسّس على شرع الولي والعداله
توحيد من ذكره يهز السلاطين=اللي على نهجه تباروا عياله
عبدالعزيز اللي حمى الارض والدين=وجَمّع قلوب الناس والغى الجهاله
اللي عسى قبره رياض ورياحين=وياقابل الدعوات تحسن مآله
واليوم عبدالله حبيب الملايين=مليكنا غيث البلاد وظلاله
بقيادته في درب الامجاد ماشين=حكمٍ رشيد وزينته في كماله
وسلطان ابو خالد له حزام ويمين=هذا ولي العهد ياحي فاله
القايد الانسان طلق الحجاجين=هداج تيماء يرتوى من زلاله
وعَقّب ابو تركي حرار وشياهين=سلالة آل سعود نعم السلاله
الله يثبتهم على الحق راسين=ويحفظ وطنا الحر من كل قاله
وعلينا حقٍّ للوطن يعتبر دين=لا للخيانه والغدر والعماله
وصلوا على المختار سِيْد النبيين=اللي بنوره زال وجه الضلاله
......................

أبو وسيم

12-02-10, 11:37 AM

هذه القصيدة قالها شاعرنا بهذه المناسبة ويقول

لان فرحتي لاحدود لها ...
ولان القسومي من اعز واقرب الوافين لي....
ولانه رمز الحب والوفاء والطموح ..
اهدي له هذه الابيات على عجل :

بشارةٍ ..ياويّها ..من بشارة=والله على قلبي كما رش غيمه
يومه توظف واحدٍ له وقاره=الطّيب ..اللي سيرته مستقيمه
اللي صفات المرجله هي شعاره=ومعزته ..ماهي تقدّر بقيمه
صالح ولد هلال ..طيْب وصطاره=وجود مثله بالقبيله غنيمه
على كثر صبره وطول اصطباره=ما لانت عزومه ..يقينه نديمه
والحظ له نوماتْ .. تاره وتاره= لكن مع التوفيق.. تقوى العزيمه
ومشكور يامرتب جميل العباره=منصور...ياتاج ..ومكارم ..وشيمه

أبو وسيم

12-02-10, 11:42 AM

هذه القصيدة قالها شاعرنا مداعباً

كان اشتكى العشاق لوعه وهجران=انا ارتويت من الوفاء والمحبّه
انا وليفي ... لاعدمته ولا هان=بعيون كل الخلق ...محليه ربه
كيف اوصفه..عوده من الزين ريّان=ردف وعيون وخد ... مع بـِيض لبّه
وليا مشى كنه من الارض زعلان=عنها يتوطـّا البَيض ..حَبه وحَبّه
ولا يلتفت لو حوله الانس والجان=ولا يزعجه صوت الغزل والمنبه
واليا تصّرف يازن الفعل باتقان=عقله ثقيل ...وحاسبٍ للمغبه
ولو اختلفنا شوي ..في بعض الاحيان=نحلّها ... من دون عنف ومسبه
ثم تنتهي ..مافيه صايب وغلطان=ولا نترك الحبه ... لها حجم قبه
ونترك فضول الهرج فاضي ومليان=ونقاشٍ يكدّر غلانا .... نكبه

أبو وسيم

12-02-10, 11:49 AM

ويقول في هذه القصيده :

اشره على اللي واثقٍ من خطاويـه=واليـا تنطّـح قمـةٍ مـا رقـاهـا
واشره على اللي نظرته بين رجليه=والشمس فوقه والنجـوم بسماهـا
واشره على اللي راهيٍ في معانيـه=وليا عطا له كلمـةٍ مـا احتماهـا
واشره على اللي قوته فـي مباديـه=لكـن يجامـل والمجامـل بـلاهـا
واشره على اللي يطرف العين بيديه=ولـو يتـالـم مـايـدوّر دواهــا
واشره على اللي يابسـاتٍ علابيـه=لاجيت لـه فـي حاجـةٍ ماقضاهـا
واشره علـى راعٍ يهمّـل مراعيـه=ولا يلتفت لو ربّعـوا فـي احماهـا
واشره على اللي كثرة المدح تغريه=لـو الحمـول الهيّنـه ماقـواهـا
واشره على اللي عاليـاتٍ عزاويـه=لكن علـى اللـي حامليـنٍ لواهـا
واشره على اللي ترتجي منه توجيه=ويضحك لبو وجهين تقـل يتباهـا
واشره على اللي منهجه فيه ما فيه=لـو يتظاهـر علتـه مـا نساهـا
واشره على اللي كل شـيٍّ يسويـه=ولا حسب لحساب واضـح خطاهـا
ولا اشره على من يجهلون المشاريه=بعض الاوادم جودهـا مـن مداهـا

أبو وسيم

12-02-10, 11:53 AM

هذه القصيده قالها شاعرنا/ خلف الفريد (أبو عبدالعزيز) في الحفل
الذي اقامه الشيخ/فالح بن صلبي الفريدي رحمه الله وأسكنه فسيح جنانه
لشيوخ شمّر في مدينة بريده يوم الخميس الموافق 2رجب 1427هــ

ياهلا بضيوفنا روس الطنايا = الرجال اللي لهم ذكر ونفايل
شمر اللي يوم عقدات السرايا = هم حمول الجيش والقب الاصايل
لابةٍ من طي جزلين العطايا = ومن قديم الوقت وافين الشمايل
الكرم والطيب في ذيك النحايا = ولا بنا اللي جاهلٍ تاريخ حايل
ولجتمع صدق الوفا وحسن النوايا = يظهر المعروف مابين القبايل
مرحبا وقلوبنا مثل المرايا = تعكس اللي كم نكنه للحمايل
عند ابو سلطان محمود السجايا = منهجه بالطيب مايبغى دلايل
من بغى للطيب وصفات وحلايا = عند ابو سلطان يلقاهن جلايل
والثنا موصول لطلاب النقايا = شيخنا اللي جامعٍ طيب الفعايل
زيد بن حماد حلاّل القضايا = وارثٍ للمجد من عهد الاوايل
الكرم والطيب به ضمن المزايا = جدنا حماد ورّثها السلايل
وكل حاضر مسكنه بين الحنايا = حافظينٍ قدركم والشك زايل
ونحمد المعبود خلاق البرايا = عايشين بنعمةٍ ماله مثايل
بظل ابو متعب تعدته المنايا = المليك الضيغمي واف الخصايل
من حكم والغيث وحقوقه همايا = وكل وادي في وطنا صار سايل
قلتها وختامها ورد وهدايا = واعذروني كل قول له كمايل

أبو وسيم

12-02-10, 11:57 AM

وقال شاعرنا هذه القصيده رثاء للمرحوم الشيخ / فالح بن صلبي بن دبيل الفريدي

طبع الليال السـود مافيـه حيلـه=تزورنا لـو مانبـي لـه زيـاره
الروح بالروعـات دايـم عليلـه=وبالكبد من لوعات بقعاء حـراره
لاوالله اللي مـال ركـن القبيلـه=راح الكريم اللي غيابـه خسـاره
بعض الخساير حملها صعب شيله=وحنا خسارتنـا خلطهـا مـراره
مع قسوة غيابـه فجانـا رحيلـه=ياسـرع نجـمٍ لاح ثـم انحـداره
راح الجديد اللي طبوعـه جميلـه=طيب وكرم واخلاق وايضا وقـاره
فالح وفالح صعـب نلقـى بديلـه=النـادر اللـي همتـه مستشـاره
ومهمتـك يامقلـده مستحيـلـه=وياماشيٍ ممشاه خذهـا استـداره
من شبّته درب الرجولـه سبيلـه=ماغيّر أسلوبه ولا أخطى مسـاره
يامتعبٍ في كسب الأمجـاد جيلـه=يومنها توخـذ بعـزم وجسـاره
ياعون من مسه من الوقت ميلـه=اليا نصاه اللـي ظروفـه دمـاره
العـذر ماسجـل بدفتـر دليـلـه=لبّيه هـي عنـده تمـام العبـاره
ريف الضيوف اللي وفودٍ تجي له=من دون موعد فاتـحٍ بـاب داره
الدار كنـه قصـر الأفـراح ليلـه=وكنه بوقت الظهر موقـف وزاره
أعطيتكم موجـز لسيـره طويلـه=سيرة عزيز ٍكـان مثـل المنـاره
ولو اختفى ذكـراه تبقـى جليلـه=من يزرع المعروف يجني ثمـاره
ويالله ياللـي مايخيّـب دخيـلـه=ياسامعٍ ذا النون عنـد اضطـراره
يارافـعٍ عيسـى ومنقـذ خليلـه=وياللي شفيت أيوب عقب احتضاره
تغفر ذنوب اللـي حمولـه ثقيلـه=اليـوم بيـن يديـك يامستجـاره
وكن الرفيق برحلـةٍ لـه طويلـه=جوف اللحود اللي هيـالٍ جـداره
وثبّت جوابه يوم يطلب حصيلـه=واكفه عذاب القبر بـرده ونـاره
وصلاة ربي عـد وبـل المخيلـه=على النبي اللـي بطيبـه مـزاره

أبو وسيم

12-02-10, 12:00 PM

هذه القصيدة قالها شاعرنا بهذه المناسبة الجميلة ويقول

اهلي واحبابي اعضاء المجالس جميعاً...
باسمكم اقدم هذه الابيات وفاءً وحباً لحبيب المجالس وابنها البار
النقيب/ منصور بن محمد الوسوس ...
بمناسبة زواجه المبارك ان شاء الله ....
وذلك على الرغم من انه لايرغب بالمدح الشخصي كما هي عادته ....
ولكنها خلجات من قلوب محبه ...
*********

ما اظن شعري دونه الباب.. مصكوك=ولايخونه التعبير .. بايّة وسيله
دربي وسيع ..ولا اتوطـّا على الشوك=واليا مشيته .. ماطلبت الدليله
مبروك..هي تكفي اليا قلت مبروك ؟=اظنها فـي حـق خالـي ..قليلـه
كان انهـم فـي ....29... زفـّوك=على العنود .. وبنت شيخ القبيلـه
كم مرةٍ زفـوك ربعـك ...وهنّـوك=على الرجوله..والكرم ...والجميله
اعطيتهم من طِيْب الافعال.. واعطوك=حب ومعـزّه واحتـرام ..ونفيلـه

وهاذي يميني ..وازرق العود له صوك=والشعر معنى .. والمشاعر تشيله

أبو وسيم

12-02-10, 12:02 PM

الى اصحاب القلوب
الخضراء وما تحت الحمراء ...
والورديه وما فوق البنفسجيه ...

اللي صدى صوته اليا جال بالراس=يزيح عن صدري هموم ٍ حبيسه
خدر العيون اللي من الثقل نعاس=من ناظرنه طاح منهن فريسه
خفيف ظل ودل ورهيّف احساس=وراعي مزوح ٍ غير .. يلعن ابليسه
لو الغلا مابين الاحباب ينقاس=ما القا الذي بيني وبينه يقيسه
علاقتي واياه مبنىً على ساس=ما دبلجوها بين "يحي" و "لميسه"
من دونه عيون القرابات حراس=مثل الكنوز النادرات النفيسه
وعليه خوفي من حواسيد وانجاس=اهل القلوب الميتات الخسيسه
حبّ الجليله ضيّعه حقد جساس=عقب المعزّه في حياة ٍ تعيسه

أبو وسيم

12-02-10, 12:05 PM

هذه القصيدة قالها شاعرنا وتعبرعن نفسها

حاولت امشّيها على الكيف ..واحتلت=وبغيت ارسّيها على البر...وازريت
ورغم الأسى ..من قوّ عزمي تحاملت= كأنّي ..انحت جوف صخرة جرانيت
وان جيت اعدّل ما تمايل ..تطاولت!!=وان قلت اعديّها قالوا لي .. تعدّيت !!
وان جيت اطفي نارها . قالوا اشعلت !!=الماء بيديني بس يشوفونه ... الزيت
وان قلت انا عن حق نفسي ..تنازلت=ضلّيت مطلوبٍ بتهمة .. تراخيت !!
ما الله مجمّلني ..لو اني ..تجمّلت=الشك مغطـّيني ...ليا اقبلت واقفيت
ولا القا جوابٍ زين ..مهما تسائلت=كني احقق في قضية ... ووتر قيت !!
ولو جيت للعطار ومن الشذا ..شلت=قدّامهم ..مرّه ..وصبره ..وحلتيت
ولولا مباديّ القديمه ..ولا زلت=قصرتها ..من شان .. "خليـّك بالبيت"
وضعٍ يهدّ الحيل ..مهما تحملت=لابليت دنياً تتعب القلب .. لابليت
وخلاصة الموضوع .. خلْت وتأمّلت=بس الصراحه .. مثل ما رحت به جيت
بغيت اجمّع ما تفرّق وحاولت=وتشتت ..اوراقها .. واستكنّيت !!
حالة فشل كامل ..ولو قلت ما قلت=لكن .. تعزّيني ..لو انّي ...وياليت

أبو وسيم

12-02-10, 12:07 PM

هذه القصيدة قالها شاعرنا بهذه المناسبة ويقول

هناك من الشعراء من حرّك المشاعر وبتعمّد !!!
لذا لم اجد مفراً من اهدائكم هذه العبرات......
راجياً ان تنال رضاكم :

ياللي سقيت اعماق روحي بحبـّك=اليوم جدبي .. من نتايج غيابك
ماكنت افرق بين ملحك وعذبك=وكنت اعتقد بيني وبينك .. زهابك
احس مع كثر التباعد بقربك=واشوف دربي .. مع كثافة ضبابك
تشرق شموس الوجد لو هي بغربك=وتثني جروح القلب ..لو هي صوابك
مالي امل .. الا التداوي بطبـّك=ولا لي مقرّ .. الا اتبيـّأ رحابك
وان كنت طيف ٍ مرّ ..يحفظك ربك=تشرّفتْ اقدامْ .. تطرد سرابك
ابفرش اشواقي شموع ٍ بدربك=زينه وتكريم ٍ لدرب ٍ مشى بك
وصيّتي .. خفّف قيودي وكربك=تراي مملوك ٍ لحضرة جنابك
السلم منك السلم والحرب حربك=وكل الجوارح من مقامك .. تهابك
وياللي رويت اعماق قلبي بحبك=لا زلت اعاني .. واتحرّى جوابك

**************

أبو وسيم

12-02-10, 12:09 PM

هذه القصيدة قالها شاعرنا بهذه المناسبة

في ليلة جميله ومناسبة اجمل ..
اجتمعت فيها القلوب قبل الاجساد ، كان لي شرف الحضور وشم عبق البخور ....
وكيف لاتكون كذلك وهي ليلة فرح من نحبه جميعاً لتعدد مزاياه وجمال سجاياه ..
انه الغالي عضو المجالس الكبير الاخ/منصور بن محمد الوسوس في ليلة زفافه قبل اسابيع ...
والتي شرفها عدد من مشائح حرب واعيانها وضيوف ومسؤولين ومحبين .......
و قد كان لي شرف المشاركه ادناه :

مبداي بسم الله جل جلاله=اللي خلق خلقه من اجل العباده
ربٍ كريم ومرتجينٍ وصاله=هو صاحب المدّات والاستزاده
مقسّم ارزاق البشر بالعداله=ومقدر المكتوب قبل الولاده
وشمْ ياقلم واترك ضعيف المقاله=مادام لك عشق الورق والسياده
خذ من سمان الهرج واترك هزاله=وعليك بالجزلات تكسب اشاده
وانقش بنات الفكر نقش البياله=حبات لولٍ طوقت جيد غاده
انت بمكانٍ شامخاتٍ جباله=اركان حرب اللي مقام وقياده
روس الرجال اللي تفك كل قاله=وعز الرفيق وعزوته مع سناده
يامرحبا ياحرب ياهل الشكاله=واهل الوفاء والطيب واهل الرياده
في كل ميدانٍ لكم كل طاله=ساداتْ بالدنيا وللدين ساده
واليا اختلط صوت الرياء والجهاله=انتم هل الوقفات .. عقل وركاده
واهل الولاء لله .. واعظم رساله=واليا عطيتم عهد .. بذل وشهاده
واليا ارتخت دون المواجب حباله=الحقتم الملهوف غاية مراده
ولا انسى الضيوف اهل الوفاء والجماله=لقلوبنا ..حب الوفييّن .. عاده
هم من مباهج حفلنا واكتماله=والعين يزيّنها البياض وسواده
يامرحبا في حفل من حي فاله=حفل الكريم اللي حسين الوفاده
من منهلٍ طيّب وعذبٍ زلاله=وله في مجال الطايلات انفراده
ولو زدت في منصور قولي نفاله=القول عقب اكمال .. مابه زياده
وصلوا على المختار والصحب وآله=تعداد ماهب النسيم وبراده

*******

أبو وسيم

12-02-10, 12:11 PM

هذه القصيدة قالها شاعرنا وهي تعبر عن نفسها

يابو عيونٍ تشكي الثقل ...خدري=يغضن حياء ..والقلب منهن صويبي
بدري علينا يامنى الروح ..بدري=الوقت دايم للحبايب ... حبيبي
لاتناظر الساعه ..ولا تخاف غدري=انته دخيل القلب ..والله حسيبي
صوتك يونسني اليا ضاق صدري=وشوفك يعزيني عن ادنى قريبي
اول لقانا !! لكن الحب عذري=على الشرف مبناه ما فيه عيبي
وانا ادري انك خايفٍ حيل ..وادري=اني غريبٍ عنك ...وانته غريبي
الخوف من مخفي نواياه ..ودري=واليا قضا المطلوب .. مشرط طبيبي
وش ينتظرنا باقي الوقت ؟ مدري=لكن الامل بالله ..ماهو يخيبي

أبو وسيم

12-02-10, 12:16 PM

هذه القصيدة قالها شاعرنا بهذه المناسبة ويقول

سعد بن محمد المجينين

علم من اعلام قبيلة حرب العزيزه وعيال راشد الكرام في دولة الكويت الشقيقه ....
رجل الكرم والفزعه والمحبه والحميه والاخلاق الفاضله ...
في عام 1427هـ دعاني للزياره بمناسبة زواج نجليه الغاليين ( ناصر واحمد ) وقد اجبت الدعوه
ولله الحمد بصحبة نخبة من ابناء العم الكرام ، وكانت لي هذه المشاركه :

بسم الذي نزّل تبارك والاحزاب=متنزّهٍ عن كل نفيٍ وتشبيه
اللي منحنا نعمةٍ مالها حساب=دينٍٍ حنيف ومصطفى الخلق هاديه
الـ صاحب الحاجات رازقْ ووهاب=واليا سأل عبده ..يجيبه ويعطيه
اطلبك تساعدني على قول ما صاب=واسألك تسامحني على قول مخطيه
وياراكب اللي حملته خمس ركاب=واليا مسك له خط ماحدٍ يباريه
مادخّل الورشه ولا فيه مضراب=واللي شراه بدفتر الشيك شاريه
فكسٍ جديد ليا عطا الخط ينساب=ومثل القطامي يوم يفرد جناحيه
عليه ربعٍ شوفهم يطرب اطراب=ويدلّهون اللي وليفه .. مخلّيه
تفقّد اغراضه عن النقص كساب=ابو اسامه ريف ربعٍ تخاويه
نبا الكويت اللي تحدّت لغصاب=اللي باهلها ترفع الراس وتتيه
ما استسلمت لمخلب الغدر والناب=يوم العرب مافيهم اللي نطق ليه!!
وهبّ الخليج اللي من الجرح منصاب=حتى انكشف عنها سوادٍ مغطيه
كم ارخصوا من شانها عكف الاشناب=لين اندحر جيش الخيانه وراعيه
جيشٍ مع المطلاع نملٍ بسرداب=والجوّ من فوقه لهيبٍ يصاليه
عقوبةٍ عجّل بها رب الارباب=واليوم بالمطلاع توجد بواقيه
ومن عقبها والموت يفتح له ابواب=من داخل الموصل اليا حد شاطيه
والله يساعدكم على جيرة الداب=لو استكن ايام سمّه يقزّيه
ويادار اخو مريم لنا دار واحباب=قلبي يحبك لجل يسكنك غاليه
ابو محمد لاعدمته ولا غاب=عن ناظري واطلب من الرب يحميه
يومه دعانا مالنا عذر ينجاب=ولو تكثر الاشغال حقه نبديه
من لابةٍ يفخر بها كل نسّاب=وزودٍ عليها حصّل الطيب بيديه
من خلقته ضارٍ على فجّة الباب=ماصك بابه دون ضيفه وعانيه
واليا نخيته جاك ماهو بهياب=يوم الردي يعطيك يابس علابيه
وليا نصاه مدوّر العون طلاب=لو ماهو عنده يتعب النفس تقضيه
من حر قلبه شاب شَعره وهو شاب=ولا يشيّب الا طيّب القلب صافيه
والحفله اللي جمّعت كل الاحباب=عيدٍ يفرّح كل من يجتمع فيه
ليلة وفاء وعرفان من كل الاصحاب=للوافي اللي يفرح اليوم ببنيه
علّه فرح سعدون بعقاب وحجاب=والا فرح يعقوب بيوسف وعينيه
او فرحةٍ لأيوب عقب المرض طاب=والا راع -العوده- بعودة ادباسيه
ونبي نبارك للعريسين يالهاب=احمد وناصر كل واحد نهنيه
وايضاً نحيي بالجماعه والانساب=كلٍ على قدره وحقه نحييه
وصلوا على اللي حطّم اصنام وانصاب=وارسى دعايم دين واحكم مبانيه
المصطفى من دونه سيوف وحراب=ودونه اسودٍ ترخص الروح تفديه
بارواحنا نفداه شبٍّ وشياب=من هجمةٍ للغرب حقدٍ وتشويه
حرية تبنى على خس واكذاب=من الذي يهين الاديان ترفيه ؟؟
والمسأله ماهي اجتهادٍ ولا صاب=ولا هي سطورٍ بالجرايد وتنويه
المسأله بغضٍ قديمٍ بالاصلاب=ودليلنا القرآن وضّح معانيه
ما نقبل الاعذار لو تصدر كتاب=مليار مسلم غلهم من يطفيه
واللي حصل يكشف لنا زيف الاغراب=ودرسٍ لنا اليا غفلنا وتنبيه

أبو وسيم

12-02-10, 12:21 PM

هذه القصيدة قالها الشاعر بهذه المناسبة ويقول

هذه هي الصوره وهذه هي الابيات !!!

وهي عبارة عن محاصرة السيل لبعض الابل وقد تحركت احساس شاعرنا بهذا المنظر

http://alfredah.org/up/uploads/2b7d9a33b5.jpg (http://alfredah.org/up/)

المنظر اللي يكسر القلب ويذوب=وشلون تجنح فيه سفن الصحاري
من عقب ماهي تقطع الدو وتجوب=محصورة ٍ بالواد والسيل جاري
في بقعةٍ وسطه مثل رقعة الثوب=تبي بها عوص النجايب مذاري
ثم سخر الوالي لها زنود وقلوب=ناس ٍ من الرحمه عليهم مواري
توكلوا ثم قالوا العون مطلوب=حتى اخرجوها من عظيم الخطاري
مواقفٍ فيها بطولات وضروب=من الشهامه والوفاء والوقاري

أبو وسيم

12-02-10, 12:23 PM

هذه القصيدة قالها شاعرنا بهذا المناسبة ويقول

صغيري فهد -يشفيه الله- له مواعيد شبه شهريه في التخصصي بالعاصمه الرياض وتعودت
ان اسافر دائماً بصحبة -رفيقي وقرة عيني جمسي الصالون الـ85 - والذي يسميه -المذي علي الجضعان-
(ابو شبكٍ حمر) وهو في الحقيقه مشهور عند الجميع بـ (تمساح) وعصر هذا اليوم وانا عائد من العاصمه
الحبيبه قامت تعاقب -مع ايمني وايسري- هالجيوب والجموس والكسبلوررات (خصوصاً منها ماتحْمِل مالذ
وطاب) فثارت قرحتي-عفواً-قريحتي بهذه البويتات المحزمه بسيم فاقبلوها مجامله :

(تمساح):)

يالله بجيبٍ عليه ارتاح=يشريه محمد وعزّوزي
عضودي اللي نديّة راح=مشكي على غيرهم عَوزي
ممشاي للعاصمه مسراح=واضوي مع الليل -منحوزي-
فوق الحمر منوة السوّاح=جمسٍٍ لاقفّى تقل كوزي
تطوفني سبّقٍ طفّاح=ولا شافهن صار له نوزي
واليا بغا يعتذر تمساح=رفعت له مايل البوزي
وبه رقلةٍ مانفعها اصلاح=ولا هنا مسامير وقزوزي
وبيبانه اللي لهنّ صياح=-تفيده- ناحت على فوزي
والقير دايم طويل نياح=واديتره شقّق الهوزي
وتمساح ياعشقتي ياصاح=لا تواخذ العود -منقوزي-
انت الهويدي وانا الملواح=والحظ طيرٍ ورا القوزي
لكن معك دالهٍ مرتاح=ماكنّي الا على روزي

[align=center][align=center] ...

أبو وسيم

12-02-10, 12:25 PM

هذه القصيدة قالها شاعرنا بهذا المناسبة ويقول

الوفاء وعدم نسيان الصداقه والزماله من اعظم صفات الرجال الحميده ...
وقبل ايام تلقيت اتصالاً من زميلي واخي العزيز الرائد/ ياسر صالح السحيباني
يبشرني فيه بانه تم تعيينه مديراً لجوازات منفذ الخفجي ...وقد فرحت لفرحه وسعدت لسعادته
ولانه من خيرة الرجال الذين زاملتهم في حياتي اهديه هذه الكلمات :

نورٍ على الخفجي لمحنا شعاعه=لدّت له عيونٍ بعيدٍ نظرها
عانق مراقيب السما بارتفاعه=وغطى النجوم اللامعات وقمرها
وجتني تباشير الفرح واتساعه=ورفعت راسي عزةٍ من خبرها
قالوا ابو عليا تعلاّ.. وباعه=اصبح طويلٍ لاعدمناه واْرها
واللي رصيده من مكاسب ذراعه=يحق له يفخر بغالي دررها
وياسر زرع زرعٍ ونعم الزراعه=واليوم يجني من نوايع ثمرها
الطّيب من طيبه يدوّر شفاعه=والمرجله علّق جواهر نحرها
ومجبولةٍ على الفضايل طباعه=ونفسه على درب المعالي صخرها
عن الرّدى عنده شموخ ومناعه=وبه نخوة الراهي بموقف خطرها
والا الكرم!! معطيه حاتم وداعه=ومحرّصه كلْ فرصةٍ يبتدرها
من منجبٍ ياما تصارع اسباعه=مابين قحطان وعتيبه حَصَرها
الطيب مايجلب عليهم بضاعه=افذاذ قومٍ ماتعاقب جررها
وانا شبابيٍّ تهيّض يراعه=متحمسٍ والعين يقدح شررها
لاقال قولٍ ما بغا به اطماعه=خلٍّ وفيٍ والمشاعر نشرها
ومبروك ياريف الخوي والجماعه=عد النجوم وعد مزهر شجرها

أبو وسيم

12-02-10, 12:30 PM

هذه القصيدة قالها شاعرنا بهذه المناسبة ويقول

ابو ماجد الخال ضيف الله بن علي بن حامد الفريدي استشارييّ مجالس الفرده
له جهود مشكوره ومواقف محموده ولانني مضى فترة وانا لم ازره احسست
انني مقصر ، وخوفاً من المساءله ولانه بحق يستاهل الثناء اهديه هذه الابيات على عجل :

الطّيب لو هو بين الاجواد موجود=باكناف ضيف الله عزيزٍ مدلّه
زودٍ على حالي سجاياه به كود=مثل الجبل هيبه وقوه وطلّه
دون الجماعه حد سيفٍ وبارود=وللي بكبده علّةٍ دوم علّه
وفي واجبه يبذل مساعيه وجهود=وله موقفٍ يشبه ثبات المسلّه
ابنٍ وفيٍّ للمجالس ومحمود=وفي خدمة اسمٍ كلبونا نجلّه
وان جيت بيته واردٍ قبلك ورود=من طاب في قوله يطيب بمحله
ولاني على ماقلت طلاّب لشهود=كلٍ على ماقيل قلبه يدلّه
وياخال سامحني على النقص والزود=ان شفتها ياخال فوق المظله
واعداد ماساقت ذعاذيعها النود=صلوا على المختار منهج وملّه
....

أبو وسيم

12-02-10, 12:32 PM

هذه القصيدة قالها شاعرنا بقلبا حزين ويقول

لقد فقدت اخاً عزيزا وقبلي فقدت قبيلة حرب منبرا من منابرها العاليه ...
انه اخي ووالدي شاعر حرب الكبير : متعب الديري ::ابو فهد::
عزائي للدّيَره جميعاً ولابنائه فهد وخليل وخالد ولجميح اسرة المرحوم ....

لا والله اللي غاب نور الفحيحيل=غدا به اللـي مايحـذّر نذيـره
اقفى به اللي ماتـرده مداخيـل=وخلى النفوس اللي توده كسيره
اللي تعود قطف روس الرجاجيل=ولا هو يفرق بين متعب وغيره
ابو فهد ماهو بحاجـه لتدليـل=الديري اسمه شمس في كل ديره
راعي هلا والهيل نسل الحلاحيل=ومن اطيب الاجواد معدن وسيره
ريف الرجال اللي تحب التعاليـل=اهل المواقف والوجيه السفيـره
عنده صعيبات القضايا تساهيـل=واليا ارتكى شال الحمول الكبيره
ماقولها حـبٍّ لبـدع التماثيـل=راضين بالمكتوب شره وخيـره
ياما فقدنا من سيوفٍ مصاقيـل=وياما تجرعنا الكؤوس المريـره
وياما تعبنا من عنا الحط والشيل=واليا نسينا هم جانـا خشيـره
لكن زمان اليوم به هدّة الحيـل=والآدمي يجهل نهايـة مصيـره
الموت حق ولا لنا عنه تبديـل=والدرب واحد والمسافه قصيـره

............
انا لله وانا اليه راجعون

أبو وسيم

12-02-10, 12:34 PM

هذه القصيدة قالها شاعرنا بهذه المناسبة الجميلة

الى من جعل للتحدي معنى وللفوز طعم
وللنصر حلاوة وطلاوه ...
الى حرب الام ورجالها الافذاذ ....
الى من وعد فاوفى وعاهدناه فصدقنا ....
الى شاعر حرب وفخرها .....
الشيخ النقيب / زياد بن حجاب بن نحيت
.....
((( حامل البيرق)))

البيرق اللي عانـد رجـال ورجـال=اليـوم باليمنـى القويـه رفعـنـاه
يمنى الشطير اللي وفـيٍّ ليـا قـال=نسل الشيوخ اللي بحـربٍ مسمـاه
ابن نحيت اللي تسنـد علـى جـال=يومه عطانا الوعـد حنـا عطينـاه
ركنٍ ثبت بين الفريقيـن مـا مـال=ولا حاد عن نهجه وطبعـه ومبـداه
هادي طباع وداخلـه ثـورة ابطـال=يرقا سناد وعارفٍ موضـع خْطـاه
ماغرته ضحكـه ولا اغـراه مـوّال=ولا راق ماء وجهه ولا ضيع الجـاه
متسلـحٍ بامجـاد واقـوال وافعـال=وبـلابـةٍ مايعـرفـون الـمـراواه
ويامنتخي في حرب حركـت زلـزال=وثوّرت بركـان الوفـاء والمثـاراه
دون اسم حربٍ نرخص الروح والمال=واليا زهمنا زيـاد ..جينـاه جينـاه
هاذي رسالة شات وهـاذي بجـوال=وذي دعوةٍ من طاهر القلـب مهـداه
مهمةٍ شَمّـر لهـا شيـب وعيـال=يوم ادركوا كبـر المهمـه ومعنـاه
ولا انسى رجالٍ بالمواقف لهم حـال=من نعرفه باسمه ومـن لا عرفنـاه
ولا هي غريبه وقفة العـم والخـال=وياهل الوفـاء وقفاتكـم لاعدمنـاه
ومبروك ياحرب المعـزه والابطـال=الكاس من يمنى الفلاحـي خذينـاه
فخر لنا يبقـى علـى مـر الاجيـال=دوري تحـدّي بالنهايـه كسبـنـاه

أبو وسيم

12-02-10, 12:36 PM

هذه القصيدة قالها شاعرنا بهذه المناسبة ويقول

الشاعر الوردي علي الجضعان اذا تكلمنا بالرومانسيات هز راسه وقال خلك
من الامور هاذي ماهي لك ...قهرني!!
لذا اهديكم هذه الغزليه التي اعتبرها حقيقة من المعلقات الراقيه ...وهذا لايمنع
من قليل من المجامله مع شايبكم .... عيالي

يازين لو تاخذ من القلب مزعه=والله فلا اشكي منك ، وانقل صوابي
لاصرت تملك مني اليوم بضعه=انا اعتبرها حاضري في غيابي
احمل شرايين الغلا وانت نبعه=وانا ظما الملهوف وانت الشرابي
اجوع وآكل لكن الروح شبعه=ضحكة عيونك والثمان العذابي
من يشكي الغربه وهو بين ربعه؟؟=لكن بلا لاماك طال اغترابي
ماكنت ابا ارضا لو تبلّلك دمعه=وانا نزيف الدمع بلّل ثيابي
لاقيل دايم يتبع الاصل فرعه=انته اصل عمرٍ فروعه شبابي
والحب في عرف المحبين شرعه=شوق وغرام وتضحيات وعذابي
غريب دار ولا يبي منك منعه=يبا الضيافه يوم قلّ الزهابي

..............

أبو وسيم

12-02-10, 12:37 PM

هذه القصيدة قالها شاعرنا بهذه المناسبة

صحيح ان بعض آلامنا من اعلامنا وبعض جراحنا من رماحنا ..
ولكن الالم في المفاصل والنزف متواصل ..
ومع ذلك مازال هناك بصيص من امل ، وثقة بالله عز وجل ...
وهذه زفرات حرّى اهديها الى (رهين الثلاث) حصار الجو والبر والبحر ....
الى حيث الصمود والشموخ والرباط ...

(((رهين الثلاث)))

ياشعب غزّة صبر ياشعب غزه=مابه صلاح الدين يأتيك غازي
يكفيك صامدْ تحت الاخطار عِزه=وتكفيك روسٍ مانحنت باعتزازي
مانملك الا دعوةٍ كل حزه=بالمسجدين اللي بعمق الحجازي
وشعب العروبه بين هزه ورزّه=وانته تقلب فوق جمرْ وقزازي
يموت مع هزات نجوى وعَزه=وغزة تعيش الموت والاهتزازي
ولا بيننا اللي كم ثوبه منزه=هذا قصير الباع وهذا انتهازي
واعلامنا المهزوز مع كل هزه=ايضيّع المحور مع الارتكازي
حتى مشاعرنا غدت مُستفزه=مابين عَرض اشلاء وعرض المخازي
ولولا الامل لأقول ياشعب غزه=تقبلوا فينا جميل التعازي
وسلام من دار الوفا والمعزه=ياشعبنا اللي في صموده اعجازي
.........

أبو وسيم

12-02-10, 12:39 PM

ويقول في هذه الرائعة البليغه :

مايجرح الانسان مثـل الاهانـه=ان جته من شخصٍ يعزه ويغليـه
لو هي كبيـره يعتبرهـا ميانـه=مايدري ان القهر توجع مكاويـه
والمشكله لاصار صعـبٍ مكانـه=وليا خسرته ماتحصـل ملاديـه
واحيان تاتيـك الخطيـه لعانـه=من واحدٍ دوبه يحـرك علابيـه
خبلٍ كثير المـال حولـه بطانـه=تطغيه واللي عنده المال يطغيـه
لاصفقوا له صار عنتـر زمانـه=ومن عادة الطاووس يفرد جناحيه
ولو ان ماله بين الارقـام خانـه=يشوف نفسه فوق كل المشاريـه
وعلى ضعيف القوم مابه ليانـه=وعند القوي يرخي اذانيه ويديـه
والا الذي دايـم يلـوّخ لسانـه=ثورٍ مغمّـم يـدّرج دون توجيـه
اليا نصحته جـاك زايـد جنانـه=حتى حبـوب التهديـه ماتهدّيـه
ان ماكبح بين الحضور اجمحانه=ودك على مقرن حجاجيه تعطيـه
والادمي قالـوا لسانـه حصانـه=اما جلب له خيـر والا يدهويـه

أبو وسيم

12-02-10, 12:40 PM

هذه القصيدة قالها شاعرنا بهذه المناسبة ويقول

اقام والدنا الشيخ / زيد بن محمد بن حماد امير الهميج حفل تكريم للشيخ /
سلطان بن سعيّد بن مريزيق الحيسوني بمناسبة تعيينه شيخا لقبيلة الحسنان من بني السفر من
مسروح من حرب ، وقد كان حفلا رائعا في كل شي ولله الحمد ، حضره شيوخ قبائل ومسؤولين
واعيان وجمع من المحبين من كل المناطق

وهذه مشاركتي في الحفل ::

بسم الذي ترجيه كل المخاليق=جزل العطا يوم الوهايب شفاقه
منه استمد العون في حزة الضيق=ويزيدني عزم وثبات وطلاقه
والشعر روضٍ فيه كل الزماليق=وانا قطفت من اجمل الشعر باقه
لاطالبٍ شهره ولا اريد تسويق=ولا موصّفٍ جيبٍ ولا زَين ناقه
ولا احمّل بيوت الشعر فوق ماتطيق=ولا اتجاوز فيه حد اللياقه
شعري مصخر للرماح الزواريق=روس الرجال اهل الكرم والنزاقه
الصدق مايحتاج لمسة مساحيق=والمدح بالغالين حلوٍ مذاقه
ويامرحبا ياهل الوجيه المطاليق=في دار ابن حماد رمزالعراقه
شيخٍ بطيبه طوّق الكل تطويق=زيد المحبه والوفا والصداقه
راعي بغاديدٍ سوات الغرانيق=وريف الصيان اللي كبارٍ حلاقه
يقرط بهن حيلٍ وحشوٍ مدانيق=بمقلط مافيه صغر وضواقه
والتهنيه مني لحرّ الشواهيق=اللي يسر العين عند انطلاقه
سلطان سلطان السعد والتوافيق=العقل راجح والتعامل لباقه
شبلٍ ورث تركة سعيّد مريزيق=شيخه وطيْب وليّنٍ للرفاقه
وياربعنا الحسنان مافيه تعليق=الا انكم رمز الفخر وانبثاقه
كان انكم على الجماعه مشافيق=تقودنا لكم السلوك الدقاقه
ويشدنا حبٍّ بجوف الصناديق=مع عزوةٍ في روابط علاقه
بني السفر جدٍّ وعدٍّ وتوثيق=ابن الخيار وكلنا لحم ساقه
ماهي علوم ملفق الهرج تلفيق=على الحجاوي يستند والحماقه
يقولها اللي عارفٍ بالمعاميق=ولا يهمنا لو مال قطّاع ساقه
واليا اجتمعنا حرب مافيه تفريق=الدهن من عود البخور اشتقاقه
اهل الولا والدين واهل المواثيق=والجود نبعٍ عاشقينه عشاقه
وصفحاتنا بيضٍ ليا صار تبريق=وحب الوطن مسكٍ عليها اندفاقه
كل ما اعتلى حرٍّ على قمة طويق=يلقا الوفا ماهي عهودٍ رقاقه
والله يعز محقق الامن تحقيق=ويحرق قلوب اللي يبون احتراقه
اللي مواقعهم ظلام السراديق=ومنهاجهم دربٍ كثيرٍ زلاقه
وصلوا عدد ما لاح نور المشاريق=وعداد دورات القمر في نطاقه

على حبيبٍ سيرته دوم تشويق=من نفتخر في منهجه واعتناقه

أبو وسيم

12-02-10, 12:42 PM

هذه القصيدة قالها شاعرنا بهذه المناسبة ويقول

مساء يوم الخميس الموافق 19/5/1430هـ وعلى اثر دعوة كريمه تشرفت بحضور الحفل الكبير
الذي اقامه في مدينة الخفجي الشيخ/ مبحل بن خليف بن دهيم العلوي الحربي على شرف
الشيخ / عبد الله بن ثلاب العلوي امير السيح التابعه لمحافظة النبهانيه بمنطقة القصيم بمناسبة
تعيين نجله الشيخ نايف رئيساً لمركز السيح ، وقد كانت امسية جميلة ممتعه حضرها اعيان من
حرب ومن قبائل الحفجي كما احياها مجموعة من الشعراء وعى رأسهم شاعري حرب الكبيرين
الصديقين الكريمين ، جوهر بن غالب العلوي وسعد بن خالد الصرم العلوي ، وقد شاركت في
هذه المناسبه بهذه الابيات الخفيفه ضمنتها مشاعري وذكرياتي هناك ....

وصلتني الدعوه من اغلى المقامات=ومناسبتها اكرام روس القبيله
والملتقى الخفجي وهالاسم بالذات=له موقعٍ بالقلب ماحدٍ يزيله
دار المحبه والكرم والمروات=ودار الوفاء والذكريات الجميله
دارٍ بها شمّ القبايل منارات=اهل النفايل والفعول الجليله
مناجم ابطالٍ وبالطيب سادات=زحول الرجال اهل الحمول الثقيله
وعن الاجابه مالنا اعذار هيهات=وحتى الاجابه نعتبرها قليله
مايردنا بعد السكن والمسافات=هو عذر لاقلنا المسافه طويله ؟؟
فرصة عمر من حظنا يوم هي جات=ومشاهدٍ يشف الكبود العليله
ويوم ان بعض الناس عند المهمات=ماتوصله رجليه راس الطويله
يقضي حياته كلها نوم واسكات =بين الدوام وبين حضن الحليله
ابو خلف له بالمواجيب قومات=حصان حرب اللي طويلٍ صهيله
له مع طريق المجد روحه وجيات=بعزم وصلابه والمكارم دليله
راعي دواوينٍ كبارٍ وسيعات=ومشرّعاتٍ كل يوم وليله
مدهل كبار القوم في كل الاوقات=وملجا غريب الدار عابر سبيله
ولا هو لضيفانه يقدّم بلامات=دوب الصيان البيض تشفي غليله
والليله الفرحه براهين واثبات=الطّيب غايه والكرم له وسيله
على شرف شيخٍ شبوحه بعيدات =سيفٍ لمع بين السيوف الصقيله
الشيخ بن ثلاّب نسل الزعامات=نايف ونايف نافلٍ كل جيله
من شاطي الخفجي ليا ضلع ابانات=ننثر له الباقات مثل الخميله
وهاذي مشاعر شاعرٍ صاغها ابيات=ممزوجةٍ بالهيل والجنزبيله
ان جمّلت ،توفيق رب السماوات=وان قصّرت ،جهد المحب وحصيله

وعدّ النجوم اللي حوتها المجرات=صلوا على المبعوث خير وفضيله

أبو وسيم

12-02-10, 12:44 PM

هذه القصيدة قالها شاعرنا بهذه المناسبة ويقول

وموضوع القصيده من ضمن مكارم الاخلاق الحميده والصفات المحموده وخصلة من
خصال المسلم الجميله ، وتلك هي فضيلة:

((( التسامح )))

رفيقك اللي يعتذر منك لاجاك=ادمح له الزله وصافح يمينه
وخل الموده باديه من محياك=وابليس لايختال بينك وبينه
اياك تعطيه القفا اياك واياك=تغلظ له القول الشنيع وتهينه
ولا تمنحه فرصه يعدّد خطاياك=ولا تذكّره باخطاه لو هي دفينه
لاتسحب الفرصه على حيود واشواك=كم فرصةٍ راحت فوات وغبينه
وخل العتب بينك وبينه تضحّاك=العفو هو طب القلوب الحزينه
لعلها خيره ليا طاب مسعاك=المنهج الطيّب وقار وسكينه
يمكن تبين سلوك من بينكم حاك=ثوب القطيعه والحسد والضغينه
ولا صار لك خبره وعرفٍ بدنياك=ياما بها من اشباه "رهط المدينه"
كم واحدٍ يضحك وهو صانع اشراك=يلعب على الحبلين "تبّت يدينه"
نوبٍ صديقك يدخل بحسبة اعداك=اليا انقلب ضدك وبيّن كنينه
ومن ينقل الشينه نقل عنك يم ذاك=مايردعه خوفه ولا احكام دينه
نصيحةٍ ويقولها صاحب ادراك=درّة حصيله من تجارب سنينه
وللمعرفه ناسٍ وللعقل ملاّك=نمشي على دربٍ ورا سالكينه

وصلوا عدد مادار جرمٍ بالافلاك=على النبي والآل يا تابعينه

أبو وسيم

12-02-10, 12:46 PM

هذه القصيدة قالها شاعرنا بهذه المناسبة ويقول

لاشك ان كل انسان له مباديء يسير عليها ويثبت على منهجها دافعه الى ذلك دينه واخلاقه
وهذه الصفات المحموده مطلب كبير لايتحقق الا بالعزيمه والثقة والاصرار ، وهذه الكلمات
حاولت ان اعبر فيها عما يختلج في صدور اصحاب الهمم .

((( الهمّة العاليه)))

اليا بغيت اقوم واسرجت خيلي=ما ارخي عنان الخيل حتى اتساوى
واليا عقدت العزم جوّدت شيلي=لاخير في كثر الحذر والمراوى
ولا احط عن سيف الشجاعه بديلي=لا قامت سباع الفيافي تعاوى
واليا ارتفع راسي رقيت الطويلي=ان عوّدت نظرات غيري تهاوى
واليا جهلت الدرب قلبي دليلي=ولا اخاوي الا طيّبين المخاوى
واللي لنفس الزوم يالله يشيلي=ماهو رفيقٍ لي صعيب المداوى
واليا جرحتني كلمةٍ من خليلي=ما اسوق رجلي لين روحي تشاوى
ومن عادتي رد الثنا والجميلي=واليا وصلني واجبي ما تزاوى
ولا ني من اللي يحملون النقيلي=اللي ضمايرهم خرابٍ تجاوى
والمجلس اللي فيه قايل وقيلي=سيلٍ محدّر ما يفيده محاوى

وترى كثير الهرج حطّاب ليلي=مع الحطب جاب الهوايش تلاوى

أبو وسيم

12-02-10, 12:47 PM

هذه القصيدة قالها شاعرنا بهذه المناسبة ويقول

مما لاشك فيه ان مكارم الاخلاق من اعظم صفات الانسان ، فاذا ما اجتمعت بالمسلم كان لها الاثر
الكبير والعظيم على مجريات حياته ، لانها في الحقيقه توافق تعاليم الدين الحنيف ، ولهذا
حينما جاء الاسلام ابقى على بعضٍ من العادات والتقاليد الحميده التي كانت موجودة لدى
الانسان العربي في الجاهليه ، لانها لا تتعارض مع روح الاسلام والمقاصد التي جاء من اجلها .
وسوف احاول هنا ان اضع بين ايديكم هذه السلسله من مكارم الاخلاق وصفات الرجوله ، اعبر فيها
بقدر استطاعتي وبلا اطالة حتى تكون خفيفة على النفوس والقلوب راجياً ان تحوز على
رضاكم ، ولا تبخلوا علينا بالنقد الهادف والتوجيه الكريم والاضافة الجميله :

((( الاستقامه)))

حنا على الدنيا ضيوفٍ مقيمين=ويامن خبر ضيفٍ يطوّل مقامه!!
لابد ما نرحل عن الدار عجلين=ماهو رضا حقٍّ علينا احترامه
ونحل في دارٍ بها الطول مترين=رهاين ٍحتى تقوم القيامه
نسلك طريقٍ قبلنا فيه ماشين=وقليل من ربّط مشابك حزامه
ياما مشينا فيه لاهين ساهين=ولا ننتبه لا صادفتنا علامه!!
ولا نعتبر مما نشوفه نظر عين=ما كننا الا ضامنين السلامه
قدّامنا محطّةٍ بين دارين=ومن بعدها بعثٍ كثيرْ ازدحامه
ولا بد ما نارد على الحوض مظمين=ولابد من شوف الصراط وسنامه
ولا بد من يومٍ لنصب الموازين=في موقفٍ مافيه غير الصرامه
اما رصيدٍ قيمته بالملايين=والا خسارهْ والحصيل الندامه
والرابح اللي ذمته ما بها دَين=فاز برضا المعبود واحسن ختامه
نصيحتي ياسامعي وانتبه زين=خلّك على منهج وسط واستقامه

أبو وسيم

12-02-10, 12:49 PM

هذه القصيدة قالها شاعرنا بهذه المناسبة ويقول:
ومن مكارم الاخلاق .....

((( عزة النفس والترفـّع )))

المجلس اللي فيه تنهان وتهون=مالك وماله ياعريب المجاني
لاتعوّد النفس العزيزه على الدون=الحر مايرضى الوطا والطماني
اشمخ شموخ اللي تعلا على الكون=نجم الشمال اللي رفيع المكاني
عليك باللي في نباهم يسرون=اللي مجالسهم عقود الجماني
روس الرجال اللي لقدرك يَعَرْفون=واليا حداك الوقت صاروا ضماني
وليا حصل زلهْ لخاطرك يدرون=مايعلقونك فوق راس السناني
وان جيت لك مجلس وناسه يخوضون=تغانم الفرصه وعد الثواني
لاتقبل التبرير مهما يقولون=اعرض وتلقى مجلسٍ عنه ثاني
ولا تصاحب الاحمق ولو كان مايكون=ولا تستشيره بالخفا والعلاني
له لحظةٍ يصبح بها تقل مجنون=عقله يطير ويفقد الاتزاني
يضيْع حقه والاوادم يشوفون=خسران من يعطي عليه الرهاني
ولا تصير بلسانك معلق ومرهون=خلك حريصٍ باختيار المعاني
كم كلمةٍ صارت لها انياب وسنون=لو هي بسيطه كبروها الشواني
ولا تبني شكوكك على قول وظنون=حتى تبيّن لك عيانٍ بياني
ولا تعلق آمالك على حلم مدفون=لابد من فعلٍ يحقق اماني
ولا تحدك الحاجه على انذال وعفون=عذر الكريم ولا شمات الهداني
ولا تقرب اللي في سلوكه يشكون=المعرفه من عقبها الاقتراني
الناس من حولك لها آذان وعيون=اليا وقعت اسقوك مرّ الهواني
كم سمعةٍ من دونها اسوار وحصون=واليا انفتح بابٍ غزاها الجباني

خلك عزيز النفس لاتصير مغبون=وتعيش ذل القهر حتى الدفاني

أبو وسيم

12-02-10, 12:51 PM

هذه القصيدة قالها شاعرنا بهذه المناسبة ويقول:

في نهاية الاسبوع قبل الماضي كان لي شرف حضور حفل زواج الابن / محمد بن عبد الله بن قيران الوهبي
بدعوة كريمة من والده اخي عبد الله وذلك في بلدة الزبيره العامره ، وقد تشرفت بالقاء هذه القصيدة بين يدي
اهل الحفل والضيوف ، اضعها بين ايديكم راجياً ان تحوز على رضاكم :

لولا غلا الديره وحبي لاهلها=ومعزة اللي دعوته وصلت البيت
ماجيتكم والروح تسبق عجلها=ولا قلت "واجب" ياخلف لاتعنيت
بني السفر تاجي بكامل خصلها=اليا حكى التاريخ جاب التثابيت
عظم العرب ساسي وجدّي جملها=الشايب اللي بالفخر ذايع الصيت
وانتم وهوبْ وقمةٍ في جبلها=وزيزومها لاجات عزوه وتصويت
دايم على كبد الاعادي عللها=يوم النهايب بين روس الطواغيت
وشيوخكم عند اللقا "اخوان دلها"=العزوه اللي تسعد الحي والميت
في حاله الين من نواعم حللها=وفي حاله اقسى من صخور الجرانيت
مع ميزةٍ في حرب محدٍ جهلها=بكم العَقَاده بين سبعة زناتيت
وصلوا ديارٍ قل من هو وصلها=ومن بعدهم صارت دموع وشواميت
اهل المواقف كان قلت حيلها=عند اختلاط الامكنه والمواقيت
واهل الصحون اللي على الضيف ولْها=وقت الزمان اللي لبقعا سواحيت
واليوم رب البيت يومه عدلها=في ظل حكم مخضّبين المصاليت
شفنا الزبيره شامخاتٍ فللها=ولا تسمع الا قول "حييت حييت"

وصلوا على شفيع الامه واملها=الصادق اللي ثبّت الدين تثبيت

أبو وسيم

12-02-10, 12:53 PM

هذه القصيدة قالها شاعرنا بهذه المناسبة ويقول

وجدت في مجلس الضيافه تنويه لاخينا وحبيبنا الشاعر الكبير /علي زيد الفريدي (ابو خالد)
يعتذر فيه عن انقطاعه عن المجالس لفتره بسبب عارض صحي تلته عملية ناجحة ولله الحمد
وحيث انني من ضمن من لم يعلموا بذلك تقصيرا مني وبسبب انشغالي ايضا بمرافقة
ابني فهد في التخصصي بالرياض ،

يسرني ان اقدم له هذا الاعتذار باسمكم جميعا .

لاباس يانبع الوفاء والمحبه=لعلها تطهير ذنب وسلامه
انت العزيز اللي بالاعماق حبه=واللي فرض على الجميع احترامه
متميزٍ في كل دربٍ يطبه=واليا نصاه المجد جوّد سنامه
الشعر تبرٍ في قوالب يصبه=وعليه ختمٍ للفريدي علامه
واظن ابو خالد ينوّه ونبّه=من شان لا ندفع قسايم غرامه
ومن شان لاتلحق علينا مسبه=ان استوى كف الوفاء وانعدامه

أبو وسيم

12-02-10, 12:57 PM

هذه القصيدة قالها شاعرنا بهذه المناسبة

ياهاجسي هات القوافي على الكيف=يوم زانت الشبّه وميّلـت مركـاي
في لحظةٍ ماهي بتحتاج توصيـف=مع دلةٍ وقنـاد والثالـث الشـاي
ومن بعد ما علّيت منها تخاطيـف=داجت بي الافكار بقبال واقفـاي
وقمت اتذكر ما مضى من تصاريف=وانا وفايه من مضاميـن مبـداي
مشاعرٍ من داخلي ما بهـا زيـف=وجملة احاسيسٍ بهـا داي ودواي
يازين ضحكات النقا والعجاريـف=وصفو النفوس الطيبه غاية مناي
بين الربوع اللي بهم زدت تشريف=والمنهل الصافي ليا يبسـت دلاي
عيال راشد فزعة الجار والضيـف=يوم المبادي بين بايـع وشـرّاي
عند اللقا مثل السيوف المهاديـف=واهل العقول بحزة الشور والراي
شبابهم والشيب عنـد المحاريـف=كل يقول لصاحبـه دورك الجـاي
واللي دعاني يوم جبت التصانيف=حبي لربعي والوفا ضمن مسعـاي

.......

أبو وسيم

12-02-10, 01:00 PM

هذه القصيدة قالها شاعرنا بهذه المناسبة ويقول:

بدعوة كريمة من اخوي الكريمين مشعل بن نمران "ابو طلال" ومقبل بن نمران"ابو ياسر" كان لي شرف
حضور الحفل الكبير الذي اقامه اخي حمود بن علي بن نمران بن حماد احتفاء بتخرج نجله " عبد الرحمن "
من الكلية الحربيه برتبة "ملازم" فكانت هذه المشاركه :

رجلك ليا منّه غدا الدرب دربين=سجها على درب المشاكيل سجها
نهج الفتى واحد ولا فيه نهجين= اما حياة الروح والا سمَجْها
وعن دوني النظرات فل الحجاجين=وعن الدّعه والضيق واسع فججها
كم واحدٍ لو هام نجم السماكين=رجله عن الطولات عادت ادرجها
ودامي نظيف لسان ومنهج وكفين=ما يهمني من لاتكلم علجها
قدري كبيرٍ عند ربعي من سنين=وتقديرهم ليّه يعدّل عوجها
ولي لابةٍ مع الفخر تاجها الدين=كم ارخصت دون المبادي مهجها
روس الرجال مرجّحين الموازين=اللي على طيب الفعايل نهجها
في حال حلوينٍ وفي حال مرين=مثل البحور اللي تخوّف لججها
عيال راشد وان قسا الوقت راسين=شبه الحصون اللي كبارٍ برجها
جسمٍ وله راسٍ تقدّيه عينين=يجمّل بياض الوجه صافي دعجها
والآدمي يمشي على مخ ساقين=وان اشتكت رجلٍ تبيّن عرجها
تدرون ما ينشال حملٍ بلا يدين=ويمنىً بلا يسرى كثيرٍ حرجها
اقولها وحق القبايل على العين=من دونها روسٍ توضّح حججها
وسلام ياجمع الوجيه الميامين=تحيةٍ من قلب وجهٍ لوجها
اليا دعا الواجب ولو كنت بالصين= اجي وفا واترك ضعيفٍ سهجها
جينا محبه والمعازيب غالين=وعلاقة القربى قويٍ وشجها
ولا جابنا ياكود حق العزيزين=ومودة بالقلب حيٍ وهجها
وتسلم يمين اللي مقامه على الزين=اللي فعوله من صفاته نسجها
اللي اخذ طيبه مواريث جدّين=نمران بن حماد قاطع فرجها
عقيد قومٍ يوم خوض الميادين=ياما طرح من شيخ في معتلجها
حمود بن نمران طيبه عناوين=له فرحةٍ مع حب ربعه مزجها
فرحة تخرج ساطيٍ من شياهين=اللي شَهَر يم النجوم وبلجها
مبروك ثم مبروك له بالملايين=دعوة محبْ وكل حاضر لهجها

وصلوا عدد مادام كرّ الجديدين=على حبيبٍ سنّته ننتهجها

أبو وسيم

12-02-10, 01:03 PM

كانت ليلة الجمعه الماضيه من اجمل الليالي حيث اجتمع فيها الوفاء ونزول المطرفارتوت
القلوب والدروب ... وفي هذه الليلة المباركه كان اجتماعنا في بلدة الشبيكيه الغاليه ...
وكنا بضيافة الاخوين الكريمين مسلط لافي المعباسي ومحارب غازي المعباسي ...
وكانت المناسبه تكريم مشائخ حرب ووجهائها وشيوخ القبائل الذين كان لهم دور في المسعى
الخيّر الذي قام به اخي محارب والذي نتج عنه عفو الوالد /علي الاحمدي الحربي عن قاتل ابنه
قبل عام وهو/ ابراهيم العازمي ....
وقد كان الحفل كبيرا وزاهيا بأهله ومن حضره .. فكانت لي هذه المشاعر :

ماكل من يمدح ..بالافعـال ممـدوح=ولا كل من هـام الطويلـه رقاهـا
والمرجله قمّه ومن دونهـا سفـوح=والناس بيـن (اثنينهـا) مستواهـا
والعمر به فرصه تجي نوب وتـروح=ولا ينتهزهـا الا فهيـم ٍ وعـاهـا
والطيب ماهو بالمـزادات مطـروح=ولا كل سلعـه مـن بغاهـا لقاهـا
وبه قومة ٍ تبرد بها احزان وجـروح=وتطفا بهـا نـار ٍ شديـد ٍ لظاهـا
ومن دافعه خير ٍ ليـا قام..مسمـوح=لو انهـا بيـن المحاجـر سطاهـا
ومجد ٍ توزّع بين سالـم ومسـروح=كـل القبيلـه فـي كمالـه تبـاهـا
ويوم انها مابين صافـح ومصفـوح=روس القبايـل مانسينـا وفـاهـا
واعظم معان الجود لاجدت بالـروح=لوجه الولي ماحـال دونـه غلاهـا
واللي سعى بالجاه من يبعد الشـوح=ويوم انهـا جاتـه تحمّـل عناهـا
محارب الغازي بنى مجد وصـروح=بسـم القبيلـه يـوم قـام ونخاهـا
حرٍّ ليـا جتـه الملازيـم زحـزوح=اللي عطـى لـه كلمـة ٍ واحتماهـا
يجري على منهج ويمشي على ضوح=ويموح مـن بيـر ٍ بعيـد ٍ مداهـا
جعله ليا حفظـت الاعمـال باللـوح=تحفظ لـه جهـود ٍ بعزمـه بناهـا
شرحت لي درس ٍ ومعناه مشـروح=وكـل الوجيـه الطيبـه ماخفـاهـا
وما غرّد القمري على نايع الـدوح=صلـوا علـى سيْـد النبييـن طـه

أبو وسيم

12-02-10, 01:12 PM

هذه القصيدة قالها شاعرنا بهذه المناسبة ويقول

الى
فهد الهديب ومنصور الوسوس وابو راكان وابو وسيم وابن مطيع واف 15 وعبد الله بن راشد ....
والى كل الغالين في هذه المجالس الغاليه .........الذين سألوا عني
اهديهم هذه الابيات السريعه
****************************************

ياعيال ابوي وعزوتي واعتنازي =ياهل الشموخ اللي بالاعماق ضارب
ياهل الوفاء والحب والاعتزازي =ياهل النقا مابين لحيه وشارب
ان غبت عنكم حاضرٍ بالمهازي =لواجب وفاكم علمتنا التجارب
معكم بذلنا الجهد وقت اللزازي =يوم المجالس ما تلقّى الغوارب
واللي يأسس فوق ارضٍ عزازي =يبقى طوال الوقت مافيه ذارب
واليوم عنكم ماندوّر ملازي =لجل البدايه حب ماهي مآرب
للفاحج المشهور فيّ انحيازي =وطبع العتامه حط وسطي مسارب
والمسأله .. ملّيت كثر المغازي !!!=قلت اتمتع بـ (استراحة محارب)

أبو وسيم

12-02-10, 01:13 PM

هذه القصيدة قالها شاعرنا على سبيل المداعبه
وكانه يطمح ان يكون مشرفاً ..

واهني من حظه كبيرٍ وراضي=ويصير عضوٍ بارزٍ تحت الاضواء
يقوله عضيوٍ تهيض وهاضي=شاف الحفاوه في هوامير الاعضاء
يبا الوجاهه لكن الخرج فاضي=والناس من حوله بهارج وضوضاء
يبني آماله فوق حاضر وماضي=وآخر مطافه ، كلمة اعتاب واغضاء
قلت استمع قولي بدون اعتراضي=عضو المجالس ماهو بحاجة ارضاء
ما انته بحاجه للخطوط العراضي=مادام لك فيها تواقيع وامضاء
ولجل المجالس خل عندك تغاضي=ادخل بها واخرج واياديك بيضاء

أبو وسيم

12-02-10, 01:15 PM

هذه القصيدة قالها شاعرنا بمناسبة اختيار الاخ منصور الوسوس
مشرفاً عاماً على مجالس الفرده ....

يومك يابوفيصل نثرت الكنانه=لقيت سهامك في صلابه وقوه
وازنتها بخبره وعرف وذهانه=واخترت ابو يارا كبير الحموه
صدق ورجوله واحترام ورزانه=ولا يلبس لباس الغموض المموه
له في قلوب اهل المكانه مكانه=وله في صدور اهل المحبه اخوه
الله يعينه شال حملٍ وامانه=لكن عطاء منصور ماهوب توّه
والسيف مايكفي قوي لمعانه=ياكود مع درع ٍيزيده جروّه
ولا يشتكي رجلٍ وحوله اخوانه=ويمنىً بلا يسرى كيانٍ مشوه
واسم القبيله محتمينٍ كيانه=مجدٍ لنا نمشي على نور ضوّه

أبو وسيم

12-02-10, 01:17 PM

هذه القصيدة قالها شاعرنا بهذه المناسبة

حرٍّ كسبت الطّيب من طِيب عَـودك=ومن عَودنا الاول ذرا كـل بـردان
دارك عزيز وكلنـا مـن شهـودك=كلٍّ يدله مـا يبـي شـرح عنـوان
وان سهـل الله كلنـا مـن ورودك=يامدهلٍ للطّيـب ، ربـعٍ وضيفـان
هداج تيمـا واحـدٍ مـن عـدودك=وعندي على ما اقول خبره وبرهان
قبلك مطر بامجـاده اشتـد عُـودك=نعم الاثنين اللي لهم بالثنـا شـان
يقولها اللي واحـدٍ مـن عضـودك=يوم سنحت له فرصةٍ يابو راكان

أبو وسيم

12-02-10, 01:18 PM

هذه القصيدة قالها شاعرنا بهذه المناسبة ويقول

عبد الله بن راشد بن سدحان
هذا الاسم الفخم ....
وما يعجبني فيه اكثر اكتنازه بالحب والوفاء والصراحه....
واليوم صافحنا بحروف من ذهب اختلطت فيها
مشاعر الحب وصلة الرحم ...
فاليه اهدي :

عبد الله الراشد خذ الدرع والكـاس=الفارس اللي فاز وانهـى المهمّـه
فارس مشاعر وابيض القلب نبراس=رسم لنا صفحات في صـدر قمّـه
ابيات شعر ٍ كنها اللـول والمـاس=ثم حطها تـاج علـى راس عمّـه
قريتها بامعان محبـوس الانفـاس=ينزف يراعه حـب والحبـر دمـه
هذا الوفاء ياطالب ٍ صدق الاحساس=يوم ان بعض الناس خفّـار ذمّـه
وابو علي ذكره ينومـس تنومـاس=اللـي مثـل هـداج دايـم مجمـه
يفداه من يعطي معاذيـره اجنـاس=اللي يحطك بيـن فتحـه وضمّـه
اليا نصيته يضرب اخماس باسداس=ويعيش هـاك اليـوم كلّـه بغمّـه
لاباس ياريـف المساييـر لابـاس=لك الشفاء من عنـد ربـي يتمّـه

أبو وسيم

12-02-10, 01:20 PM

وهذه قالها بهذه المناسبه :

قالوا تغزّل وانت "جدٍّ كبيّر"=دربٍ تحلّم فيه ما تستطيعه !!
ما يسلكه ياكود ممهون "صيّر"=مع الطخامه فيه "عرف وخديعه"
واللي بسنّك يابن الاجواد "خيّر"="متغانمٍ "باق الليال السريعه
قلت اسمعوني علّة ٍ بي "تحيّر"=عند الاطباء شخّصوها "طبيعه"
قلبي "خضر"ماقدر اعدّل واغيّر=كل ما بغيت اطوّعه صرت اطيعه
واليا شكيت الحب قبلي"كثّير"=و"جميل" و"المجنون" و"ابن الربيعه"
و"النمر بن عدوان"و"ام الغريّر"=و"عيون علياء" خاتمتها شنيعه
واللي سلب عقلي وروحي"صغيّر"=اللي عن التوصيف"صوره بديعه"
ياعيون ريم ٍ "بالمحازه" مذيّر=لو دونه اسوار"الحمايه"منيعه
مما بقلبي صرت اجيهم "مسيّر"=واقول ياقلب "الرجا ولا القطيعه"
عود ٍ مشقّى وعادته "مايتغيّر"=ولا يخالف احكام الهوى و"الشريعه"
ضارٍ على بدع القوافي"مضيّر"=خريف عمره يحسبنّه "ربيعه"
لاتجرحونه بــ "انت عود ٍ كبيّر"="بصري" عرفنا قصته مع صنيعه

أبو وسيم

12-02-10, 01:24 PM

هذه القصيدة خاصة من شاعرنا القدير ويقول فيها بعد ماسالت عنه عن اخباره

هلا هلا بولدي مزعل بل مفرح منذ اليوم ....
الله يمسيك او يصبحك بالخير ..حديهن والله مادري وش وقتكم ...
اليوم الاثنين ابشرك اخبارنا زينه وحلوه وجائني من طيبه الطيبه ابن العم سالم بن سمير الفريد
وعزّمت انا واياه والاخ الحبيب عبد الله بن ناصر بن فلي بن راكب نقلع اليوم على (تمساح) باتجاه
سدير حيث الربيع ثم نسندها على النفود ونزور الاخوان /نايف بن جازي بن راكب واخوانه عند ابلهم
ونفلها يومين ، وبعدها نشوف وش يصير بآخر هالاجازه .....
بشرنا عسى الحرايق طفت ...
وعسى الربيع زين ..وعسى دفيتم ..وعسى ...

وياليتني بديار مزعل وربعه=اباتعلم واستلذ الدراسه
دراسةٍ مابين دخله وطلعه=حرٍ محرّر ماعليّه حراسه
اكلتها مابين رمعه ورمعه=في مجلس الالغاز رمز الفراسه
ابي اولع في شقى العمر شمعه=ولا يهمكم العود يلقى مقاسه
تكفون ويكفيني خميسٍ وجمعه=من عودكم ياعيال هذا التماسه
ولايهمكم ضعفٍ بشوفه وسمعه=يدل دربه مع ضجيج وحساسه

أبو وسيم

12-02-10, 01:30 PM

هذه القصيدة قالها شاعرنا موجهها الى مزعل الفريدي (ابو وسيم)
والاخ نواف الفريدي في استراليا .....

اوجه لمزعل حروف القصيده=ولا وصلته يوصل سلامي لنواف
بعد التشاور والمساع الحميده=اسست مشروعٍ من اظلاف واصواف
حطيت لي شبكٍ ورا عرق ضيده=في سهلة يامسندي مالها اوصاف
وابو عمر شرى الدينّا جديده=وحط الجراكل في ظهرها لها اصناف
مع خيمةٍ فيها المقاضي فريده=وبقي لنا الراعي مع نعاج وخراف
وانته فهيم وعارفٍ بالسديده=السوق نار وسقفنا فيه وكّاف
وانا وابن جضعان تحت الحديده=نبي نغامر ما ربح كل خواف
نبي نجي لو المسافه بعيده=نبغا رخيص الماشيه وانت عرّاف !!
ولكم الدلاله والثنا بالجريده=بخطٍ عريض بكل الاقطار ينشاف
و ليت الظفيري يوم بيّن رصيده=قال اربعه مع خمسة زياد تنضاف

وقال لفهد مع التميمي وعيده=نبي نشارك مع خلف عون واشراف

أبو وسيم

18-02-10, 02:29 AM

هذه قصيدة من شاعرنا ابو القلب الكبير ويقول

وجدت لابي عمر مشاركة بعنوان (ياناس ...)
فأغراني الطاروق والمطروق ..فلم استطع لجم المشاعر ..وهل يلام شاعر ؟؟!!

يابو عمر يا عديل الروح=لقيت لك "درّةٍ" دوبي
فيها العواطف تجي وتروح=وتضرب على لحن مسحوبي
اما انت صادق وحبّك "فوح"="وجدٍ" بالاعماق مشبوبي
والا ان شعرك بها "مصلوح"=يمكن من " الام" مرعوبي
آسف "وفاء" والغلط مطروح="مانفّرق" ارواح وقلوبي
مار صح لسانك "وقل " مسموح= العود غالب ومغلوبي

أبو وسيم

21-02-10, 09:27 AM

هذه القصيدة من شاعرنا الكبير وسوف تبقى الى مر من الزمن يتذكرها كل الاجيال الذين سوف يمرون على هذه المجالس المباركة ويقول فيها شاعرنا

اخوتي وابنائي
الى كل من اعطى وبذل ...
الى كل من لازال يعطي ويجود ...
الى اصحاب الجهود الكبيره والقلوب المنيره ....
الى كل من ساهم في بناء هذا الصرح ...لبنة لبنة
اهدي هذه المشاعر البسيطه
******************

اقول قولٍ فيه ماني مزوّر=وقول الحقيقه واجبٍ نستحبّه
تصعد مجالسنا شموخ وتطور= بسواعد رجال الوفاء والمحبه
مافيه تقصيرٍ ولا به تهور=الا انهم فيهم طموحٍ و"هَبّه"
يديرها صفوة رجالٍ تدور=مايشّرف اسمٍ للقبيله نحبه
هذا ابو فيصل شاد حصنٍ مسوّر=ثم صار له مفتاح بابٍ وضبّه
ومنصور مشرفنا الامين المطوِّر=رمز الوفا والحب "يحميه ربه"
حرٍّ رضي حمل الامانه "وثوّر"=وزوزع بها بليهان في راس تبّه
والذيب ابو راكان ماقطّ "غوّر"=بحرٍ من الابداع عميق غِبّه
والشيخ ابو مالك سياجٍ مدور=علم وصلاح وللمجالس" منبه"
والخال ضيف الله بطيبه تسور=اعلى بناء وقلوب كل الاحبه
وابو عمر مثل السراج المنور=يرسم ابداعه كالقلايد بــ" لبّه"
وابو وسيم جهود فوق التصور=مثل الذهب يوم المصاهر تصبه
والراكبي من طيب ساسه "تضوّر"=ولا يسد جوعه غير طيب يعبّه
ومشعل مجالسنا دخلهن و"جَوّر"=(اني بصرحٍ شامخٍ ما انغلب به)
وابن دخيل الله ليا" اقلع" وكور=يلقي ورود بكل مجلس يطبه
وطلال بن حماد موجٍ تزور=طيبه اصالة جد ماهو" تشبّه"
وابن بدر وجهود ما تنتصور="رحال" كم دوٍّ مشاه ولعب بّه
وهاك الرجال اللي "بطاهم" يعوّر=ومن طول الغيبات يضرم لــ"حبه"
ولا انسى بنات العود ماني مخوِّر=زهور الربيع اللي خفيفٍ مهبّه
اسماء عزيزه بالمجالس تنوّر=من شرّفنّا ما لحقهن "مسبّه"
خصصتها والجاش حبٍّ " مفوّر"=والا الجميع انوار في وسط" قبّه"
وكل رصيده بين ربعه مصوّر=قولي شهاده والمجالس" تنبّه"
فيكم صخرت الشعر غصبٍ على( اوّر)=لو القواف الشايبه تقتلب بّه

___________

أبو وسيم

27-02-10, 11:04 AM

هذه قصيدة لشاعرنا الكبير يقول فيها

حضور مناسبات الجماعه وخصوصاً اذا كانت بدعوة كريمه ، من اكبر الواجبات على المدعوين ، وقد تشرفت -بدعوة كريمه-من والدي الشيخ/خالد بن فالح الشطيربحضور حفل زواج حفيده الكريم الابن/ فواز بن فالح بن خالد الشطير مساء يوم الخميس الموافق4/3/1431هــ في عقلة الصقور العامره وكانت لي هذه المشاركه:

بسم الكريم الواحد الخالق الهاد=هو منزل الرحمه وهو صاحب الباس
في قدرته سبعٍ رفعهن بلا عماد=وسبعٍ بسطهن وانخزى كل وسواس
هو خير ما ابدى به والافكار تنقاد=ومنه استمد العون لا صار هوجاس
وسلام تسليمٍ بلا حصر واعداد=ومطرزٍ بالحب وعقود الالماس
والليله العقله غدت نور واعياد=تضحك طرب مع ذعذعة كل نسناس
وزوارها لبوا مجاميع وافراد=لدعوة كريمٍ مالهم عنه مجلاس
خالد مقر الطيب من عهد الاجداد=واللي درينا عنه تدري به الناس
وفرحة ابو فالح لنا فخر وامجاد=والله وربي ما لها حد وقياس
بأول حفيدٍ من فلذّات الاكباد=ساسٍ معرّب وانبنى له على ساس
وللمرجله ناسٍ وللطيب روّاد=وللنايفه راقي وللعز لباس
ولا به حصيلٍ غير من يطلبه جاد=ولا به حصادٍ دون ساقي وغراس
وانته يابو فالح على سرج وشداد=جمعتها مابين دينٍ ونوماس
وان صارت الدعوى بها عنف وعناد=وطوّل تماديها حضر" دايخ الراس"
من لابةٍ يشهد لهم زند وزناد=روس الشعب مرذين صعبات الافراس
عصبة شيوخٍ لَحْمر الموت وراد=لاكبرت القاله والارياق يباس
والعز ماهو كثرة اموال واولاد=ولا كل شباك يبا يصيد قرناس
يامنجبٍ حرٍّ عن الدرب ما حاد= يوم اتخذ نهج المناعير نبراس
فالح وفالح لاعدمناه مسناد=محزم ابوه ليا ارتخى كل هلباس
اللي تشّرف سمعته كل نشاد=عن محتمين اسم القبيله بالانفاس
من مر بالخفجي لقا الطيب والزاد=بيته مشرّع ما على البيت حراس
ماهو مجرد مدح وازباد وارعاد=اقولها من تجربة عرف واحساس
والليله الفرحه لها جيوش واجناد=ياليلةٍ مبروكةٍ مالها اجناس
ليلة فرح "شبله" عسى الخير عواد=ولعلها ابرك ليلةٍ بين الاعراس
ومبروك يافواز ياطير الاسعاد=اخذت لك من موقِد النار مجباس
فارس وعادة فارس الخيل فواد=اليا امتطى ظهر الاصيله خذ الكاس
وياعقلة الاخيار ياجارة الواد=لاهلك بياض الوجه يادار الاوناس
واعداد ماهلت هماليل رعاد=وما ينادي المذّن وتقرع الاجراس
صلوا على اللي سيرته صبر وجهاد=من يتبعه رابح وعاصيه بفلاس

***************

أبو وسيم

19-03-10, 08:54 AM

هذه القصيده قلتها عندما تواجد معنا في المجالس اخي العزيز الشاعر
مبارك بن ناصر بن حديد الفريدي .....

يافرصةٍ لو انها بالتمني=كنت انتظرها ليّه اعوام واعوام
اهنّي النفس الشفوقه واهنّي=عريننا اللي حركه صوت ضرغام
واهني رجالٍ وفاهم يطنّي=انظر لهم خلفي والابطال قدام
هلا يابو ناصر نيابه وعني=ماخطته ياصاحبي روس الاقلام
وما فرّعن البيض ثم غطرفنّي=للفارس اللي في نظرهن فتى احلام
وما غردت فيه ام سالم تغنّي=روضٍ خضر فيه الزماليق نوّام
وما زمجر الشعار وغنى المغنّي=بالجنادريّة كل عام ورا عام
وما رددوه الناس شيعي وسنّي=(نبيي محمد وديني الاسلام)

أبو وسيم

19-03-10, 08:56 AM

هذه القصيدة قالها شاعرنا بهذه المناسبة ويقول

مشاعرٌ معبِّره ..... ونتاج تجربه ..
اهديها لكم احبتي ....

من جرّب الايام شاف التهاويل=وما مرّ غيره من غثاها يمرّه
كم ذايقٍ منها العنا والغرابيل=لو يتكرّب للبلاوي تجرّه
وكم حوّلت من قمة المجد حلحيل=من عقب ما صدر المجالس مقره
ولا توخذ الدنيا اعتباط وتساهيل=من ذاق حاليها تجرّع لـمره
ياما بها على الاجاويد من ميل=واحوالها بين الشقا والمسره
وسود الليالي موهقاتٍ محابيل=خذ الحذر لا ياخذنّك بـغِرّه
لاتسوّي المعروف باردى الرجاجيل=والطّيب لايعوّد عليك بمضره
كم زارعٍ لاصار وقت المحاصيل=مايجني الا مايشيله بـ(صرّه)
من يحسبن الناس روس ومشاكيل=ويغريه منهم قول" لله دره"
وكثير مدح الناس خدعه وتضليل=احدٍ لها حسّاب واحدٍ تغره
كم واحدٍ تكثر عزاويه بالليل= واليا اشرقت شمس الحقيقه.. مَغَرّه
وكم واحدٍ يضرب على الصدر بالحيل=واليا بغيته لو "تقصه بجرّه"
وعندي عن الاصحاب جمله وتفصيل=وابا اختصر خوف الملل والتشره
هذا خوي سَهَره وسَفـْره وتعليل=ويا (حلوها) ما دامها مستمره
وهذا رفيقٍ لايشيِّل ولا يشيل=على الاقل كافيك خيره وشره
وهذا رفيقٍ ترتخي به صواميل=شدّه لو ان الشد نوبٍ يضره
وهذا رفيق ماترك لوية الذيل=خلك وسط ..مابين برده وحره
وهذا خليلٍ بينهم كنه سهيل=اللي مثيله نادرٍ بالمجره
طيبه وراثه ماظهر فيه تمثيل=ولا سَلـَك درب المعالي "تكرّه"
ياقل مثله عند سلّ المصاقيل=يوم "المواقف" بين كـَرّه وفرّه
هذا رفيقي "ريّضوا" ياهل الخيل=السَّعْد والتوفيق مَرّه ومَرّه

منصور الوسوس

17-04-10, 06:59 AM

صح لسان عندليب المجالس
ابداع رائع وحضور قوي اثمر العديد من القصائد الخاصة
اتمنى ان يضاف هذا الديوان الى موقع دوواوين شعراء حرب
مع خالص الشكر والتقدير لمراقبنا الرائع ابو وسيم على هذا الترتيب الجميل
باقات من الورد للشاعر والناقل

أبو وسيم

19-03-11, 07:56 AM

هي حالات انسانيه ...نراها في الشارع ..
وفي الاسواق ..وفي اماكن كثيره ...
نعبر عنها بالدموع ...
بالتعجب..بالدعاء ..
واحياناً ..بالكلمات :

عَودٍ على ددسن "وضرب" البواجي=مثل القنابل يـوم يرعـد رعدهـا
في حالةٍ رثه كمـا وجـه "لاجـي"=وعليه من لوعـات بقعـا نكدهـا
شكله حزيـن ومشيتـه بادّراجـي=كنـه يـدور حاجـةٍ لـه فقدهـا
قلت اطلبك ياخال لو به احراجـي=مهموم!! .. وانت بدار نجد ورغدها
قال اشتكي للي لـه العبـد راجـي=اسمع كلامي !!.. واتحمّل سندهـا
الشعب مايكفيـه غيـر الدجاجـي=ولولا "دجاج الغرب" رحنـا بيدهـا
لاشفت لحم الضان يضحك حجاجي=ومن الغلا.. فرحه تموت بمهدهـا
حتى "الهروش" اللي لحمها سماجي=صارت شفاقه خل "لحمـة" ولدهـا
وصارت مقاض البيت مثل العلاجي=ومن استطاع لسعرها مـا وجدهـا
ووزارة التجار في "بـرج عاجـي"=حطت "حمايه" مار محـدٍ حمدهـا
وتجارنـا تسعيرهـم بالمـزاجـي=ومستهلك ٍ هالـك يعانـي كبدهـا
ويشاركون ضعوفنـا "بالخراجـي"=ويزاحمون احـوج فقـارى بلدهـا
قام و اشترى خمسة كراتين "ماجي"=وشويـة اغـراضٍ قليـلٍ عددهـا
ثم اختفى داخل زحـام الحراجـي=ذي حالةٍ ..والخافي "امر وادهـى"

أبو وسيم

19-03-11, 07:59 AM

غازي بن عجاب ابو زوايد
هذا الاسم الذي يعني لي الكثير بلا قصور بعيال راشد ...
لكن هذا الرجل يخجلني بفخامة الوفاء وصدق المحبه واستدامة التواصل ...
لايمر اسبوع الا ويتصل بي سائلا ومتطمئناً ...
وامام هذا الوفاء والصفاء لا أجد الا الكلمات ولعلها تفي بالمراد ...

الحب للوافين ماهو محدّد=مثل الفضا فيه اتساع ورحابه
وانته يابو فيصل غلاك يتجدّد=مثل الربيع اللي يجدد شبابه
عساك دايم ياعزيزي مسدد=وموفقٍّ يوم المسالك تشابه
لو المزايا كل يومٍ تعدد=غطـّيت من طيبك جميع القرابه
يوم الردي لاجيت عنده مخدد=انت البشوش اللي ينومس جنابه
ولا هي غريبه وانت حرٍّ مردد=من راس عودٍ من يودّه يهابه
(عجابنا) يوم النواصي تلدد=ياحظ من ينصاه ثم اعتزا به
وراشد سنام العز من به تشدد=يحق له يفخر على كل لابه
العزوه اللي من غلاها يتبدد=وضعٍ يسبب لي خمول ورتابه

أبو وسيم

19-03-11, 08:01 AM

تأبى المشاعر وهي ترى مايجري في بلاد عمر المختار...
تأبى ان تستكين للخور ومجرد الفرجه ...
امام مايقوم به هذا السفيه في الميدان وما يتشدق به في قناته القذره ...
ومحاولاته المستميته للعب على وتر القبليه والطائفيه البغيضه ....
اهدي هذه الابيات الى ذلك المحنط بين الركام والحطام ...

روما حرقْها باول الوقت نيرون=وانته شبيهه ياخبيث الفعايل
احرقت شعبك والخلايق يشوفون=وتثير من حقدك جميع القبايل
ملعون واللي يقتدي فيك ملعون=ومن الشراذم يتبعونك قلايل
متعلّقٍ في خيط واهي وممهون=ولاحسبت حساب وقت الصمايل
حب الامل غرك كما غر فرعون=وآخر حصيلك بالنهايه فشايل
ياللي تهدد بالصواريخ شارون=امطرتها من فوق شعبك همايل
وين العرب؟! صاحين والا يغطون=ماكنهم يوحون نوح العوايل
كيف ماتت النخوه والاطفال يبكون=و(مدمّر القذاف) صايل وجايل
ياحفاد مختار العرب كيف ترضون=وانتم رجال الحرب واهل الشمايل
وشلون يحكمكم من الناس مجنون=عشرين مع عشرين ظلم وهوايل
تحرروا من عقدة الخوف تكفون=حريةٍ مادونها حال حايل
الا تدوسون الخطر ماتهابون=وعن الهدف ماترتضون البدايل
حلّت مواقيت الفرج لاتوانون=والفجر لاح وداجي الليل زايل
مار استعينوا بالعزايم تفوزون=وامشوا على نهج الجدود الاوايل
وتوكلوا على الولي خالق الكون=اللي عطاياه الكثيره جزايل
مايستحق العيش من يرتض الهون=واليوم بيديكم جميع الوسايل
والمسلمين بكل الاقطار يدعون="الله يرد الكيد في نحر صايل"

أبو وسيم

19-03-11, 08:02 AM

في خضم هذه الفتن المتلاطمه واختلاط الحابل بالنابل ...
لامكان الا لاصحاب العقول الكبيره والمدارك العظيمه ...
وعندما يستشعر المسلم مسؤوليته ويفهم معنى الصحة في الابدان والامن في الاوطان ..
هنا يتبادر الى ذهنه معنى قول الباري عز وجل (( والفتنة اشد من القتل ))
ولهذا اهدي ابنائي الشباب هذه الخطرات المقفاة .......

شبابنا ياهل العقول السليمه=ماخاب من يمشي على نهج دينه
روس الفتن عدّت براس الجذيمه=مار السكينه ياشباب السكينه
من يوقظ الفتنه عليه الجريمه=تبدا شراره والنهايه حزينه
وعواقب الفتنه علينا وخيمه=لاتتبعون اهل الهوى والضغينه
ماوحدتنا الا العهود القديمه=وحب الوطن والدين متوارثينه
لاتتركونه للحواسد غنيمه=من عقب ما انتم عزوةٍ محتمينه
وسور الوطن لاينفتح به ثليمه=ثم تدخل العدوان من كل عِينه
الامن له عند العواريف قيمه=يدري بها من اصبحوا فاقدينه
كانوا بنعمه والموارد عظيمه=ثم عقبها صاروا بحالٍ مهينه
وعقب الامان اللي ركونه قويمه=للخوف والارهاب صاروا رهينه
ولا اظن من عنده كرامه وشيمه=يرسم علامة ذل باعلى جبينه
وحسن التصرف للرجال الحكيمه=مايقطعون حبال وصلٍ متينه
ياما تذوقنا المراره اليمه=من طغمة الارهاب ياخابرينه
هل ترتضون ان الاياد الاثيمه=تعبث بمكه مع ربوع المدينه؟!!
مار الحذر ترى القياده حليمه=وان وصلت الحلقوم فالحلم وينه !!
ومن لاحسب بالمعركه للهزيمه=ماينفعه عقب الفوات الغبينه
********

أبو وسيم

19-03-11, 08:04 AM

الى احفاد عمر المختار ، ابطال ثورة ليبيا

يامطارد الاحرار في كل "زنقه"!!=وانت الاسير اللي بداخل خرابه
كشفت عن وجهك قناعه وحنقه=يوم انتفض شعب الشهيد وشبابه
ترعد بصوتٍ فيه خوفٍ وخنقه=وشجاعتك مابين ربع وقرابه
يامعتبر نفسه على الكون "كنقه"=تقود لك شلة لصوص وعصابه
انت الذي حطيت نفسك بزنقه=وبيتك مشرّع لو تعاوت كلابه
والله مايكفي يالاحرار شنقه=الا عليه يقام حد الحرابه
واليا انصلب دوسوا بالاقدام عنقه=ثم احرقوه برزمةٍ من كتابه

أبو وسيم

19-03-11, 08:07 AM

اخي وصديقي /عبد الرحمن بن محمد بن علي بن جضعان اتصل بي وبشرني
بحصوله على البكالوريوس(ادارة مستشفيات) فكانت هذه المشاعر المتواضعه اهديها لابي راشد ..

بشارة ٍ ماهي بمثل البشاير=نجاح ابو راشد كبير المقامي
يوم ان بعض الناس همّه صغاير=انته هيامك بالعلا يالعصامي
ويوم ان بعض الناس حاير وداير=انته عزومك مثل صلب الرخامي
ويوم ان بعض الناس يخشى الخساير=انت بسبيل العلم اندى الكرامي
وما دمت ياكحيلان بالدرب ساير=باذن الولي لتنول اغلى وسامي
شعور اخوك اللي تكن الضماير=والصدق يغني عن كثير الكلامي

أبو وسيم

19-03-11, 08:10 AM

الشعر هوايتي ... وليس حرفتي
قلته صغيرا ...وعشقته كبيرا
اكتسبته منهم وراثة ...ولم تستهويني منه الحداثة
وصلت الى سنامه ...ولم امسك بخطامه
أراه مرتقاً صعبا ...ولا احبذه مرتعاً خصبا
اهيم في جزله وجميله ... ويؤلمني غثه وهزيله
وعندما يختلط الحابل بالنابل لا اتمالك نفسي ... ومجبراً اقول :

الشعر ياالشعار ماهو مهايط=او مسرحيه والاداء بهلواني !!
ولا هو مجرد هرج والا لقايط=يرضي غرور النفس واهل الاغاني !!
ولا هو غموض فيه رمز وغمايط=مثل الحجاوي في قديم الزماني !!
الشعر قمّه والمواهب وسايط=وابلغ وسيله لابغينا البياني
فيه الاصاله والنزاهه خلايط=واجمل قواف الشعر واحلى المعاني
ولولا الحواسب والذكاء والخرايط=مايدرك الطيار وين المكاني !!
ولاني من اللي يتبعون السقايط=الوضع مكشوف ٍ نشوفه عياني !!
والشق واسع مانفع فيه خايط=قامت توايق منه .. صمع الاذاني !!

أبو وسيم

19-03-11, 08:12 AM

البارحه وفي ليلة من اروع الليالي وفي استراحة(روعه) في طريف الاسياح ....
كان هناك الوصل والتواصل والكرم والمكارم والعرف والتعارف ....
وقد تشرفت بعدة اضاءات منها :
1- حضوري لحفل اخي الشاعر العذب / مرزوق بن مضحي العويني الفريدي وتلبية دعوته ...
2- مقابلة الابن والزميل مشعل المجالس- وهواحد المعازيب -وكان نعم الرجل خلقا واخلاقا ...
3- كان لي شرف تقديم فقرات الحفل بطلب من اخي ابا عماد فلله الحمد والمنه ...
وقد كان حفلا ناجحا بكل المقاييس ومشرفا للقبيله لحضور رجال من خارجها ومن عدة قبائل ....
وهذه كلمات عاطفية متواضعة شاركت بها مع بداية الفقرات :

بسم القبيله والمعزب والاسياح=وبسم الرجال اللي تحب الشكاله
يامرحبا ترحيبةٍ عطرها فاح=باهل الوفا والمرجله والجماله
بضيافة اللي للمهمات نطاح=ويمدّ من يمنى الرها والجزاله
مرزوق نهر الجود ماهو بضحضاح=حرٍّ مشاكيل الرجال تعنا له
راسٍ فريدي من المجد موّاح=وليا انتسب في حرب وصلت حباله
طيب وكرم مع اجمل اخلاق وانصاح=ياسعدي براشد وصفوة عياله
وربي محييكم عدد بارقٍ لاح=يامشاركينه فرحته واحتفاله
والله يديم ازها الليالي والافراح=في عهد ابو متعب ووراف ظلاله

أبو وسيم

19-03-11, 08:18 AM

وهذ القصيده القاها الشاعر في حفل زواج ابن الشيخ / زيد بن حماد في طيبة الطيبه

هب النسيـم الشمالـي وانتشـت طيبـه=دارٍ رسـخ حبهـا مـن حــب صاحبـهـا
هفهـف علـى حفـلٍ ضيوفـه معازيـبـه=والعـود الازرق سامـكٍ مـن مطايبـهـا
مــده عـلـى شـيـوخٍ تـقـدّر مواجـيـبـه=روس الطنايـا الـلـي كــرامٍ مناسبـهـا
احفـاد شيـخ الجـود نهـجـه وتدريـبـه=ودون المبـادي دوم تفـتـل شواربـهـا
ماغـاب عنـا صـوت حاتـم وترحيـبـه=ومهـار زيـد الخيـل حفيَـت غواربـهـا
تاريخهـم مجـدٍ والافـعـال تـومـي بــه=مـن الجزيـره لا جـبـل طــي منجبـهـا
شمر سناعيس الوغى سمعـه وهيبـه=العـزوه اللـي مهجـة القـلـب تسلبـهـا
انسـاب شيـخٍ لا تكلـمـت امــاري بــه=زيـد النشـامـا كــل الامـجـاد كاسبـهـا
شيـخٍ يمينـه جزيـل المـد تصخـي بـه=وراع الصيـان اللـي كبـارٍ مقاضبـهـا
الـلـي بـنـى مـجـده بـعـالـي مراقـيـبـه=رغـم الظـروف القاسيـه فـي تكالبهـا
حرٍ كسـب طيبـه مـن اعلـى مجاذيبـه=مـن راس عـودٍ منسبـه فـي ذوايبـهـا
ويامرحبـا فـي دار حـرب ومحاريـبـه=قبيـلـةٍ طيبـهـا مــن طـيــب مشـربـهـا
حرب الحرايـب يـوم صالـي لواهيبـه=يـوم القبايـل حـبـل الاطـمـاع يكربـهـا
دون المواجب غالي العمر نفـدي بـه=ودون الخوي والجار نركب صعايبها
نحمي حمانا لختلـط صـوت ومصيبـه=وناطا حما اللـي مـن هقاويـه يقربهـا
وليـا دعـانـا داعــي الـواجـب نجيـبـه=هــدات اســـودٍٍ جـايـحـاتٍ صوايـبـهـا
امــدح ومـدحـي واصـــلاتٍ منـاديـبـه=وحـق القبايـل فـوق عينـي وحاجبهـا
شاعر مواقف نوب الافكار تدوي بـه=لو تعترض له حدب الامـواج يركبهـا
والاّ حاضرنـا مانبيـعـه ونـشـري بــه=ناخذ صفا الماضـي ونتـرك شوايبهـا
خـيـمــة وطــنــا ثـابـتــاتٍ منـاسـيـبـه=هوج العواصف ما قـوت يـوم تقلبهـا
فــي ظــل حـكـمٍ ماشكـيـنـا مخالـيـبـه=ديــرة هــل السـنّـه وتوحـيـد شايبـهـا
بقـيـادة الـلــي حـبـنـا مـابـلـغ طـيـبـه=اللـي جـهـوده للـوطـن مــن يقاربـهـا
عبد الله الفيصلي والكـون يـدري بـه=وعضوده اللي على الصعبات دربهـا
وصلوا على خير مبعوثٍ سكن طيبـه=كل مااشْرقت شمسٍ ومالت لمغربهـا

أبو وسيم

19-03-11, 08:21 AM

عندما زرت ابناء صديقي الشاعر الكبير/متعب الديري يرحمه الله في
بيتهم العامر بمنطقة الفحيحيل بالكويت هاجت قريحتي وذكرياتي فارتجلت
هذه الابيات التي ابكت الجميع ......

ماجابني يمكم غيـر الوفـا يافهـد=للوالد الـي مقامـه يرفـع الهامـه
متعب فقيدة قبيلة حرب طير السعد=عسـاه يلقـا نعيـم الخلـد قدامـه
عليه حر الضماير لاهبـه ماخمـد=ولا نكست عن طويل القمه اعلامه
صحيح ماكل عمره في نعيم ورغد=لكن ترك سمعة تفخر بهـا ايامـه
صبر وصابر على شداتها واجتلـد=وعب المراجل ولكن ماطفا هيامـه
وعقب حرار تسر العين عند الهـدد=عاداتها فوق جزل الصيد حوامـه
نعم السند يوم كان بحاجـة للسنـد=ونعم الخلف يوم جف الحبر واقلامه

أبو وسيم

19-03-11, 08:23 AM

ويقول في هذه الورديه ...

الارض غارت منك ياغلى هديه=لو انها تنطق حكت عن قهرها
سلبت منها اللون والجاذبيـه=ونور النجوم اللامعات وقمرها
ولا كنك اللي عارفٍ بالخطيـه=زودٍ على ماصار تاطا ظهرها
عذبتني واشقيت نفسٍ شقيـه=نفسٍ على لاماك ربي ومرهـا
صخرت لك كل الجوارح مطيه=لو ان محدن قبل حبك صخرها
حتى الدموع اللي منوّل عصيه=ليا ذكرتك ماقويـت احتكرهـا
وما دام حبك صافيٍ ما عليـه=لو ذقت في دنياي قاسي كدرها
التضحيه تعني سليم وضحيـه=وانا فديتك بالعيون ونظرهـا
ولو النهايه عند حوض المنيه=مافيه حايل بين روح وقدرهـا
وفي قصة المجنون والعامريه=جملة دروسٍ قصتي تختصرها

أبو وسيم

19-03-11, 08:26 AM

لم استطع حضور حفل زواج الابن / ناصر بن مبارك بن حديد وقلت هذه الابيات اعتذار
لاخي الحبيب ابو ناصر لوجودي خارج المنطقه :

يابو عمر مشكور مشكور مشكور=موضوعك اجمل من نجوم المجرّه
كتبت عن حفل ٍ كبير ٍ ومشهور=كلٍ درا به.. والفريدي يسرّه
بضيافة اللي قومته مابها قصور=مبارك مدار الطيب وايضا مقره
يشهد على ما اقول زوار واحضور=واللي يضيف البيت والا يمرّه
ادري غيابي غصة داخل الزور=لكن اعتذاري حال دون التشرّه
لكن ورا ناصر يجي دور(منصور)=ونعوّض الغالين في نظم درّه

خلف الفريد

20-06-11, 10:21 PM

قصيدة رثاء لاخي (حربي غازي) وعزاء لأخي الغالي / محارب غازي المعباسي

العمر من عند الولي وقت ممنوح=وامانة بارقابنا كالوصاتي

امّا رصيدٍ يوم الأعمال بالوح=والا تضيع ولا يفيد الصواتي

تضوي علينا سود الايام وتروح=بامر الذي بيديه موت وحياتي

وياما يمرَ من المقادير ساموح=لكنّ عصف الموت بالحيل عاتي

والموت ضيف جيَته مابها بوح=ولاينفع استعداد عقب الفواتي

وعلمٍ لفاني هزَ الأعماق والروح=وأثقل عليّه من جبال السراتي

ماكني إلا بالعٍ سم ذرنوح=أودع معاليق الحشا ذا يباتي

غاب الحبيب اللي وجوده لنا ضوح=حربي بن غازي جميل الصفاتي

لكُن عزانا شيخنا عاش ممدوح=دين ورجوله واحترام ونقاتي

لعل قبره روضةٍ طيبها يفوح=وتسقيه غرّ امزونها الهامياتي

ولعل جسمٍ بين الأموات مسدوح=عند السؤال يكون باقوى ثباتي

صحيح فقد أحبابنا سقم وجروح=لكن يقين المسلمين النجاتي

يا محارب اصبر واحتسب همً ويزوح=والصبر عند الأوله ياغناتي

من لايموت اليوم فالباب مفتوح=الدرب واحد والمصير المماتي

ولابد من يومٍ به الحزن مطروح=ونلبس ثياب أفراحنا الزهياتي

ولاينفع الميَت سحا الدمع والنوح=إلا الدعاء وأعمالنا النافعاتي

والله يجبر كسر سالم ومسروح=ويلطف بنا بايامنا المقبلاتي

خلف الفريد

20-06-11, 10:28 PM

كم آلمني كما آلم الجميع بل الوطن كله عندما امتدت يد الغدر والخيانه الى رجلين من رجال الامن الاوفياء
هما الشهيد مونس بن عقيل الضعيني الحربي وفواز بن عبد الله الفريدي الحربي الذي انجاه الله من كيد الحاقدين
فرحم الله الشهيد (ابو عمر)وحمدا لله على سلامة فواز ...
احبتي
هذه كلمات متواضعه عبرت فيها باسمكم جميعا بعد ان صحونا من هول الفاجعه راجيا ان تنال رضاكم ...

هـذا حنـا ياوطنـا مانبيـعـك ياوطـنـا=نرخص الروح العزيزه مارضخنـا للأعـادي
ياحلو طعم الشهـاده ولا يقـال انّـا جبنّـا=العهود اللي علينـا دونهـا خـرط القتـادي
والحقود اللي غدرنا ماحصـل لـه ماتمنـا=غايرات سهوم حقده عادت لصـدره وكـادي
مادرى انه لو تخفـى فـي حياتـه ماتهنـا=كلهـا ايـامٍ قليلـه ثـم تلقّفـه الايــادي
الوطن دونه رجـالٍ ترفـع السيـف المحنّـا=من رفع راسه خيانه طمّنه ضـرب الهنـادي
غبت يامونس حقيقه لكن ما اختفيـت عنـا=ياشهيدٍ عطّر بدمـه جميـع انحـا البـلادي
والله انـا والله انـا يابـن عمـي والله انـا=نفتخر بك دامنـا حييّيـن يارمـز الجهـادي
واهنيّك يوم صـرت اليـوم بالعـزّه امكنّـا=الشهيد اللي يضاف لقافلـة خيـر العبـادي
ولا يهمك لو حروب ارهابهـم دايـم تشنّـا=بعون خلاق البشر يقضى على روس الفسادي
ويا وطنـا دام عـزك مـع امانـك ياوطنـا=والله انا مانبيعـك سلعـةٍ وقـت المـزادي

خلف الفريد

20-06-11, 10:32 PM

وهذه الابيات اهديها الى الابن / فواز بن عبد الله بن سمير الفريدي زميل ومرافق
الشهيد / مونس الحربي رحمه الله ...وهوبالمناسبه ابن زميلنا الشاعر الكبير (( الجديد))
الذي اهنئه بسلامة ابنه فواز راجيا من العلي القدير ان يمن عليه بالشفاء العاجل ....

فواز يشفيك الولي خالق الكـون=وغير الدعاء المسموع مانستطيعه
انا ادري انك يابن الاجواد محزون=وحنا بعد مثلك رمتنـا الفجيعـه
قدر الخوي عند المشاكيل مايهون=وشلون لاروّح بلحظه سريعـه !!
الآدمي عمـره للاقـدار مرهـون=ومقـدّر الاقــدار ربٍّ نطيـعـه
ومصيرنا موتٍ محقق ومضمـون=ولا تحول من دونه حصونٍ منيعه
وقليل منهم بالشهـاده يفـوزون=الا الـذي غالـي حياتـه يبيعـه
دون الوطن والدين وابليس ملعون=مايعبث اتباعـه بـدار الشريعـه
اللي على درب الخيانات يمشـون=ولا يهمهم لـو النتايـج شنيعـه
عصابةٍ مابيـن غـادر ومجنـون=والحقد والنكـران فيهـم طبيعـه
ونزفت يافواز والـدم لـه لـون=وما صابك الله عـادلٍ مايضيعـه
انتم تراكم للوطن درع وحصـون=ومسيركم على المبـادْي الرفيعـه
بينـت يافـواز ماكـان مكنـون=يانسـل شيـخٍ دايـمٍ بالطليعـه
اخوي ابو فايز وانا منه ممنـون=عون الرفيـق وللمسيّـر ربيعـه
وصلوا على المختار ياللي تصلون=نبينا اللي لـه بالاعنـاق بيعـه

خلف الفريد

20-06-11, 10:47 PM

عابر سبيل .. وزاده الحـب والصـدق=ويدري ربوعـه .. حافظيـن ٍ مقامـه
يضحك لهم .. اليا التوى مايل الشـدق=ويبذل لهم مـن دم قلبـه .. شهامـه
سحابة ٍ تحمل لهم .. صافـي الـودق=وعين ٍ عليهـم .. مـا تهنـا بمنامـه
ضيفْ ..ومعازيبـه معاريفهـم غـدق=من طيبهم .. حطـوه باعلـى سنامـه
شاف بمنامه ..بعضهم .. حمَّر الحـدْق=وصحا .. وغادر خوفْ .. يبغى السلامه
قاف ٍ وصخّرته على..أآمـه .. و..إدق=ومطيتي تمشـي ..وبيدي خطامـه

خلف الفريد

20-06-11, 10:49 PM

بسم الله الرحمن الرحيم
الشاعر /علي بن عبد الله الطهيمي من الرجال الذين تعتز بهم القبيله وبيته مفتوح للجميع
وهومن اهل الكرم والمكارم ، ودائماً مدهل للنشاما ، وقبل ايام وبعد ان انفض مجلس من مجالس
الرجال في بيت الشعر الكبير الموجود امام منزله ، وعلى حين غفله ، دخل احد ابنائه الصغار
والذي لايتعدى عمره الثلاث سنوات وصار يعبث بالنار وماهي الا ثوان حتى صار بيت الشعر
كتلة من لهب، وبلطف من الله قفز الطفل من النافذة وكتبت له السلامه اما بيت الشعر فقد صار اثراً
بعد عين ،ولم يتبقى فيه الا دلال الرسلان وكانها تقول : انا لن ازول ولو تغير لوني فهذا بيت الكرم وسيبنى من جديد .....
وبعد اطمئناني على سلامة اخي وصغيره كانت هذه الابيات العاطفية :

يابو عبـد الله سالـمٍ لاعدمنـاك=لعل فـي ماصـار خيـرٍ وخيـره
ولعلها رمية سهم عين واخطـاك=من اللي مراق الطيب عنده عسيره
والحمد للي يابيض الوجه نجـاك=واللي بلطفه فك نفـس صغيـره
بيت الشعر مجرد هروس واسلاك=والا انت مكسبنا وفخر العشيـره
واللي غدر بك شبّة فعـل يمنـاك=نارٍ توقّـد كـل صبـح وهجيـره
يقرط بها من غالي السمر والراك=وارطا النفود اللي قـويٍّ سعيـره
واللي حوال النار مثلك وشـرواك=اهل المراجل والصفـات الكبيـره
وكان احترق بيت الشعر عله افداك=انته لنا الباقـي وتبشـر بغيـره

خلف الفريد

20-06-11, 10:54 PM

حمد شريف الشدادي العمري الحربي من اهم اعضاء هذا الصرح ...
وهورجل لايحتاج الى تعريف لان معرفه وفعله فيها تعريفه ...
وهو دائما سباق الى نشر الاخبار الطيبه عن القبيله وله جهود لايمكن حصرها في كلمات ...
فالى اخي وصديقي ابو سعود اهدي هذه الكلمات باسم عيال راشد ومجالسهم الكريمه ...

بمقدمـة ركـب السَّعَـد يالشـدادي=واللي تعـوّد قمـة المجـد يرقاهـا
دائم حضورك عندنا ماهـو بعـادي=كن الحروف النابضـه فيـك تتباهـا
كن الوفاء من بين اناملـك ينقـادي=لجل القبيله ماهـو عنـاد ومضاهـا
يا مبعد الخطوه على درب الامجـادي=يوم ان بعض الناس "مقرب معشاها"
وسهيل نجم ٍ مايبي هـرج نشـادي=اجمل نجوم السماء لابـان وازهاهـا
واصل بدربك واستعن خالـقٍ هـادي=من هام القمه ما يجيها من اعلاها !!
حمد شريف بمقـدم القافلـه حـادي=والقافله تمشي ولـو طـال مسراهـا

خلف الفريد

20-06-11, 10:58 PM

نقطة تحوّل

الموقف اللي صار نقطة تحـوّل=صحّاك ياقلب ٍ بالاوهـام سـادر
لا تحسبن الوقـت مثلـه منـوّل=ما انته على تعديل ميلـه بقـادر
مالك ومال الناس مانته مخـول=حتى تجي ما بين وارد وصـادر
الطّيْب عند الناس مثل التسـوّل=وحسن النوايا صار بالحيل نـادر
خل العنـا للـي عليـه المعـوّل=عقل ٍ يميز بيـن كـل المصـادر
لو ادري ان العقل ماهو مطـوّل=بالموضع اللي فيه نفس الكـوادر
واصدرت لك مرسوم حظر التجوّل=واخذ الحذر ياقلب من سهم غادر
كانك فهمت القصد ياقلب ...حوّل=وان ما فهمت القصد بالفين وادر

خلف الفريد

20-06-11, 11:02 PM

الشيخ ابو سطام
شلاح بن متعب بن حماد حفظه الله
من خيرة الرجال اخلاقا وادبا وكرما وتواضعا ..
له عندي منزلة خاصة هو يعلمها لاعدمته ..
وهذا اليوم وجدت كلمات لابنه البار ذعار ، كلمات تـنضح حبا ووفاء وبرا ,,,
هيجني ذلك واشجاني فكانت هذه الكلمات المتواضعه :

تبا الحقيقه يابن حماد ياذعـار=ابوك وجدّك مجدهـم وارثينـه
ذي شجرة الحماد دايم لها اثمار=الاصل ثابت والمنابـت ثمينـه
سربة شيوخٍ لاذكرناهم اخيـار=روس القبيله والقبيله حصينـه
قبيلتي يامنجم ابطـال واحـرار=اللي ظهر في نجد والا المدينـه
وعندي لبو سطام حشمه ومقدار=شيخٍ بضيـده كلنـا عارفينـه
وانته وفي و تمدح الوالد البـار=الله على الطاعه يطوّل سنينـه
عظم العرب ويقولها حبّ واقرار=ومجد القبيله شامةٍ في جبينـه

خلف الفريد

20-06-11, 11:04 PM

الشاعر الوردي نواف بن هلال اغرق المجلس هذه الايام بعدة قصائد ورديه فتحركت
القلوب الخضراء وانشغلت الابصار وتسمّر العشاق حتى انه احيانا يتعمق شوي !!!!
وخوفا على اصحاب القلوب الرقيقه امثال محمد الفهد ومشعل بن مطيع ونايف بن مياس وشيوخ الغزل
مثل ابو زوايد وابو عمر خصوصا ونحن في ايام اختبارات اوجه له هذه النصيحه ولهم
اخذ الحيطة والحذر

مدري يابن هلال كم لك من العمـر=بس اتوقع صـرت فـوق الثلاثيـن
نوبٍ تعدّى الماد وخطوطه الحمـر=ونوبٍ تخليها وسـط بيـن ثنتيـن
حدّيت لك ناسٍ على صالي الجمـر=وتركتهم بيـن القوافـي مصابيـن
كم واحدٍ عدّى على البيض والسمر=لاميّـز المقـبـل ولا رد مقفـيـن
على الاقل اصبر لك ايـام ياالنمـر=خل الاوادم تجني اتعـاب فصليـن
استنجدوا ياهل الهوى بصاحب الامر=يحجر على نواف لو هو اسبوعيـن

خلف الفريد

20-06-11, 11:10 PM

هذه قصيدة قلتها في حفل الشيخ / حثلين بن هديب حفظه الله ورعاه
لرئيس مركزالكهفه الشيخ / مرضي بن طواله الشمـــــــري
وذلك في منزله العامــر في حمادة الترمس يوم الأربعاء 20/2/1429 الموافق 27/2/2008

مرحبـا بضيوفنـا روس الطنايـا=عـدّ ماهلّـت هماليـل المخـايـل
لابةٍ مـن طـي جسريـنٍ دهايـا=في سنام المجد حازوا كـل طايـل
الكرم بطبوعهـم يكتـب وصايـا=وذكرهم في صفحة التاريـخ هايـل
والرجوله ضمـن تكويـن الخلايـا=والمزايـا بيـن خلـق الله قلايـل
دايـمٍ وايمانهـم ملْـيـا رهـايـا=مكرمين الجـار معطيـن الدخايـل
من شموخ جبالهـم فيهـم مزايـا=ومن نقا تاريخهـم فيهـم دلايـل
اشهـد ان الحاتمـي ورّث سجايـا=واشهد ان الضيغمي عقّب سلايـل
ياهـلا فـي دار كسّـاي العرايـا=الصيان اللي شكت حمـل الثقايـل
لاركزهن من صخا اليمنـى ملايـا=هذا فوق وتحتهن مثـل الخمايـل
دايم وحثليـن فـي وجـه اللقايـا=سمعته تشريف مع ضرب المثايـل
وارثٍ طيبه مـن كبـار السوايـا=يوم وقت السيف مع قدح الفتايـل
للرفيق الين مـن زهـور الهدايـا=ومثل ضلع طويق في وقت الصمايل
والثنـا موصـول لرجـال النقايـا=وارثين المجد مـن عهـد الاوايـل
لابةٍ مـن حـرب اسـودٍ ضرايـا=هم عيال العـود لا عـدّت فعايـل
وياعسايه اوفـي بحقـك عسايـا=يابو ماجد ياعقيـد اهـل النفايـل

خلف الفريد

20-06-11, 11:16 PM

هذرمه

بالصوت والصوره نشوف العجايب=ثوره ورا ثوره وبسـم" الشبابـي"
كيف ابتدت ؟! باسباب قهر وغلايب=وين الحقيقـه ؟ مالقينـا جوابـي
سلميّـةٍ !! ثـم اقلبوهـا حرايـب=عفويّةٍ !! ثـم انتهـت بالخرابـي
شرقيّةٍ والنـور بالشـرق غايـب=غربيّـةٍ والغـرب سـمٍّ بنابـي !!
حريّـةٍ والحـق يوخـذ غصايـب=ثوريّةٍ والثـور راس وعلابـي !!
ومن طبّ بالميدان شال الصوايب !!=لو ماظهرت للناس ، تحت الثيابـي
ولا تواخذون العود مبلي وشايـب=مازار دار "الزين " ولاهو "اجدابـي"
ضاعت اموره بين "جيش" و"كتايب"=والوضع "بالتغيير" شكلـه ضبابـي
والشام مع "بشار" (شو هالمصايب)=(يارب تخرب بيت اسم "انتخابـي")
تـم الكـلام وكلبونـا "حبـايـب"="مقيمنا" واللـي برحلـة "ذهابـي"

خلف الفريد

20-06-11, 11:20 PM

ياقدس لاتجزع لو تطـول مأساتـك!!!=ولا تلومنا ترى امة العرْب مظلومـه!!!
ياما بذلنـا فـي سبيلـك ونخواتـك!!!=واليا سمعنا (ونّتك) نسـرع القومـه!!!
وياما وقفنـا دون بابـك وساحاتـك!!!=حتى ادبرت روس الخنازير مهزومه!!!
ويامـا تذكرنـا مقامـك ورايـاتـك!!!=وانك الاقصى منه الارواح محرومـه!!!
ويامـا تمتعنـا بشوفـة منـاراتـك!!!=والقبه الصفرا والاحجـار منظومـه!!!
وياما قرينا عنك ياطيـب صفحاتـك!!!=بس فيه علوم عندنا غيـر مفهومـه!!!
انك لنا ثالث البيتيـن فـي ذاتـك؟؟!!=وانه حصل بك( ليلة )اعجاز معلومه!!!
وانك حملت امجادنـا بيـن طياتـك!!!=واللي وضعهن جملة( اعلام) مرحومه!!!
لكـن تطمـن كلنـا دون روعاتـك!!!=ونعاسنا ماهو دليل ٍ علـى النومـه!!!
ولا تهمك اصوات تطقطق باساساتك!!!=ناس تدوّر تحتـك آثـار "مزعومـه"!!!
ولا تهمك اصوات تغطي على اصواتك!!!=و(النتن ياهو) لو مساعيه محمومـه!!!
وان قالوا استيطان ما اكبر مساحاتك!!!=بعد التفاوض بين الاحباب مقسومـه!!!
ولا تساوْرك ياحبّنا بعـض شكّاتـك!!!=انا نبيعك (للعـدو) ب(اوّل) السومـه!!!
ياقـدس عذبتنـا وكثـرت عذابـاتـك=خليت بعض العرب يطلع مـن هدومـه
ياقدس جرّح خـدودي دمـع عبراتـك=موسومـة كنهـا خدّيـك موسـومـه
ياقدس تاطا الاعـادي فـوق حرماتـك=وسيوفنا من (رعـاب الخوف)مثلومـه
ياقدس ما ياصـل لنـا حـرّ زفراتـك=عميـان طرمـان ٍ والاذان مصمومـه
ياقـدس بلغنـا العروبـه تحياتـك!!!=لو ان فزعـات (الغيوريـن )معدومـه

خلف الفريد

20-06-11, 11:22 PM

الشام ينـزف والجماهيـر تنسـاق=للموت .. والتعذيب دقت طبولـه !!
صرخاتهم من حرًّها تحرق احـراق=وابو عيونٍ زرق يسـرج خيولـه !!
وين العرب !!وين الشهامه والاخلاق=وين المبادي والشرف والرجولـه !!
كلٍّ يشوف الوضع ماهـوب ينطـاق=وليا نطق له كلمتينٍ .. خجولـه !!
والجامعـه ياخيمـةٍ مالـهـا رواق=وفي ظلها ياحيف !! عشرين دوله !!
قالوا جمعنا الدم .. والـدم يهـراق=ياحلوها !! ويارخصها من مقوله !!
شوفوا بيوت الله شكت كـل بـواق=انجاس حزب البعث داست زلوله !!
وداسوا على صدور النشاما والاعناق=وعلى الوجيه الطيبه .. بالنعولـه !!
يااحفـاد خالـد استغيثـوا بخـلاق=لاترتجون العون عند .. الفحولـه !!
الظلم طال وصبركـم بعـده اعتـاق=وحريـةٍ .. ماتكتسـب بالسهـولـه
وترى ظلام الليل يجليـه الاشـراق=وبين العدل والظلم .. جوله وجولـه
اقولها وجـروح قلبـي بالاعمـاق=تنزف بعد .. والحق والله لقولـه !!

خلف الفريد

21-06-11, 07:58 PM

ياكاشـف الغمـه وللهم فــارج=اجعل لنا من كل ضيـقٍ خراجـي
ونعوذ بك من كل شيطان مـارج=اللي جيوشه كنها الليـل داجـي
ومن هول يومٍ بيّنتـه "المعـارج"=الرابح اللي فيـه مكتـوب ناجـي
ومن كلمةٍ يركض بها كل هـارج=لو هي سليمه صار فيها اعوجاجي
ولو هي صغيره صيّروها "بوارج"=العرض كنّـه سلعـةٍ بالحراجـي
ويالله جنّبنـا غـرور البـهـارج=اليوم صارت في ظهور ورواجـي
ونطلبك تكفينـا غلـو الخـوارج=واجعل لنا سنـة نبيـك سراجـي
وافتح لنا في كل عسـرٍ مخـارج=انت الملاذ لطالب العـون راجـي
دعوات من كثرت عليه المـدارج=وانت الدليل وهـادي الانتهاجـي

خلف الفريد

21-06-11, 08:01 PM

اخينا محمد الفهد هذا الضيف الجميل والذي علق على قصيدتي في تركيا وفالح السدحان يتمتع بروح فكاهه
وثقافة عاليه وتتشرف هذه المجالس بوجود مثل هذه الشخصيه
انا لا اعرفه والله لكن اجد فيه مواصفات المحبه ....
واهدي اليه هذه الابيات الخفيفه ولا تدققون ياعيالي :

يابو فهد لاتفتح ابـواب وابـواب=لاهنـت خـل ابوابنـا مغلقاتـي
خل الركاب اللي بالاحلام هـراب=لو في منام الشايـب مدرهماتـي
الجمس ماشي بس نبي زود ركاب=وابـو زوايـد عدّتـه جاهزاتـي
وليا سألنا سايلٍ.. درب الاشناب؟!=قلنـا هدفنـا ديـارٍ امقدسـاتـي
ونجيب معنا مي زمزم للاصحـاب=واغلى الهدايـا للولـد والبناتـي
واحلى هديه للغلا سيـد الاحبـاب=والله يكفّـر سيتـي بحْسَنـاتـي

خلف الفريد

21-06-11, 08:05 PM

الى فالح السدحان ...

محلاك ياشعري بموقفـك محـلاك=عودتني جودك وانـا واثـقٍ فيـك
اغريتني والموقف الطيّـب اغـراك=عطني معانيك الجزيلات واعطيـك
اما معـانٍ تسعـد اللـي تحـراك=والا وش اللي بالهزيـلات يغريـك
ومن لابنى شعره على عرف وادراك=لابـد مايلحـق معانيـه تشكيـك
وحييت ياحـرٍّ سكـن دار الاتـراك=عنـا بعيـدٍ لكـن القلـب يغليـك
غمرتني بالحب من فيـض يمنـاك=ورفعتنـي لعـل ربــي يعلّـيـك
طيب المشاعر راسخٍ فـي محيـاك=واسمى المعاني حاضره في معانيك
ولا هي غريبه منك تظهر مزايـاك=الطيبـه والعـود فيهـن موصيـك
نهر الوفا .. حطيتني وسط مجراك=والله يعين اللي بقـي عايـمٍ فيـك
يابـو محمـد وافـيٍ لاعدمـنـاك=رسالتك وصلـت وربـي محييـك
اسلم وسلم لي علـى ذاك مـع ذاك=وان سهّل الله يصمل العود ويجيك!!
ولّت سنينه ماوصل غيـر تبـراك=وام العيال تقول " عندي واعشيك "
واقـول والله مالقيـنـا حـلايـاك=لا في بلاد الترك والا المماليـك !!!

خلف الفريد

21-06-11, 08:10 PM

الى ذلك الهكري الذي اعتدى على المجالس ......

الله يسوّد وجه من سوّد الصـرح=مثل سواد الليل مـن دون قمـرا
واللي يغث البال ويـزوّد الجـرح=تعليقه الممجوج بحـروف حمـرا
ربعك تحب الجمع وانته مع الطرح=يامعـولٍ للهدم ماهـو ايعـمـرا
ماانته بوجه الليث يانابح المـرح=ان دجت حول الدار يرعبك زمـرا
لاتحسبنا من فعايلـك فـي تـرح=سحابتك مرّت ولا اطفيـت جمـرا
هاذي مشاعر شاعرٍ ماتبي شـرح=سمر حروفه في علابيـك سمـرا

خلف الفريد

21-06-11, 08:12 PM

والدنا واخينا الحبيب الشاعر الكبير صاحب الدواوين هنا /علي بن زيد الفريدي (ابو خالد) غاب عن
المجالس منذ فترة طويله لظروفه الصحيه- شفاه الله- واليوم يطل علينا بتحية في _اهداءات_ ومساجلة رائعة
في الخاص وفرحاً بهذه الطلة الكريمه اهديه هذه الكلمات باسمي ونيابة عنكم .....

يامرحبا مليون ياعلي بن زيد=مايركع الراكع وما صام صايم
ترى وجودك يبو خالد لنا عيد=ومثل البراد اللي تجيبه نسايم
حبك مثبّت داخل القلب ويزيد=وعلى الذي مثلك ترانا ضرايم
وحبك لربعك مايبي منك توكيد=مثل ثبات طويـق لازال قايـم
ولولا ظروفٍ قيدت صحتك قيد=لقيت في رقمك كثير القسايـم
نبي من اللي كنهن شرد الصيد=من طوّل الغيبات جاب الغنايم

خلف الفريد

21-06-11, 08:15 PM

مصراته اسمٍ فيه عـز ومعالـي=ولها الفخر بابطالها الصامدينـي
يدكهـا المجنـون دكّ الجبالـي=ماكن فيها الشيـخ وام الجنينـي
ذياب رمحه شقّ ظهـر الهلالـي=وبنت الزناتي شامتـه بالثنينـي
وحنا ورا الشاشات صمت وجدالي=كنا نتابـع فلـم هنـدي حزينـي
وضعٍ تخالط فيه حـرم وحلالـي=والغرب يفرض حـد للسلطتينـي
وليا خضعت له روس كل الرجالي=قال الثمن من غلة المنتجينـي*

* النفط والغاز

خلف الفريد

21-06-11, 08:18 PM

وتتوالى الافراح والليالي الملاح ...
وترتفع هامة اخرى من هامات عيال راشد لتعانق المجد والعلا على اكتاف الكرم والطيب ...
ليلة البارحه وفي (الروضة الخضراء) في راشديات بريده كان لاكابر القوم ورؤوسهم موعد
مع كرم الضيافه والوفاء والحب ...وكان المضيف رجل ليس بمجهول انه اخي الحبيب
عياد بن كنعان الفريدي -ابو سلطان - بمناسبة تخرج شبله عبد الله ....
وقد حضرها بعض من شيوخ القبيله وضيوف من قبائل اخرى ..
وكان لي شرف تقديم الامسية الجميله ومن حظي ان التقيت بعدة احبه اذكر منهم/ رائد المجالس
ابو يارا منصور الوسوس والاخوة الاعضاء ابن منصور وابن راشد وابن مزرم ..
وكانت لي هذه المشاركه :

ياليلـة ٍماتشبـه ايـات ليـلـه=من حسنها تزها جميـع الليالـي

والروضه الخضراء عروسٍ جميله=تزينـت لوجيـه روس الرجالـي

اهل النقا والطيب واهـل النفيلـه=واللي مجهزهـا كريـم السبالـي

عياد بـن كنعـان نفّـال جيلـه=ومواقفه فيهـا كمـال وجمالـي

يشرب قراح الطيب من سلسبيلـه=من راس عودٍ شرفـوه العيالـي

اللي بمثلـه تستهيـض القبيلـه=وترقى مشاريف العلا والمعالـي

ويامرحبـا ياكاسبيـن النفيـلـه=روس القبيله والضيوف الغوالـي

تشريفكم نهج النفـوس النبيلـه=ورسم المحبه والوفـا والكمالـي

خلف الفريد

21-06-11, 08:21 PM

وجدت اخي الحبيب محمد بن منصور ضمن طاقم الاشراف فكانت
هذه المشاعر له ولكم يافخر هذه المجالس ......

يقول ابن عتاق والقلب مسرور=قلبٍ يحب الطيـب والطيبينـي
يوم النشاما داروا الفكر والشور=تخيروا حـرٍّ مـن الشامخينـي
ثم اعلنوا تكليفهم لبن منصـور=يحمل امانة طاقـم المشرفينـي
وترجّل مبارك عقب خط له دور=والله ونعم ليا ذكرنـا الثنينـي
هذي مجالسنا بها الـدر منثـور=موجودها من كل نـادر ثمينـي
من قام بالواجب ثم انهاه مشكور=يقوم به غيره من الحاضرينـي
وانتم نجوم بالسماء ترسل النور=على سناها وصلوا الساريينـي
ومادام للقلعه دفاعات مع سـور=تبقى عصيه مع مرور السنينـي
وتقبلوا باقات وردٍ مـع زهـور=ثم حبةٍ في مقـرن الحاجبينـي
مشاعري و احسهـا داخـل الـزور=ابديتها وانتـم لهـا عارفينـي
وختامها مسكٍ وكادي وكافـور=وعنبر وعود الهند والياسمينـي

خلف الفريد

21-06-11, 08:24 PM

الى كل من تنقصه الدعابه وتكسوه الرتابه...
الى كل من تعوزه الابتسامه ولا تهطل له غمامه ...
الى كل من يعاني من جدب المشاعر ...
اهدي :

بين التطبع والطبوع الاصيله=فرقٍ كما بين الثرى والثريـا
وياغايةٍ مابررتهـا وسيلـه=ولا حركت واهج هدفها الحميا
واللي مصالف مالنا فيه حيله=اليا حدرنـا ماسألنـا الدليّـا
مانطرد اللي راح يومي شليله=اليا صفا للعود طلق المحيـا
لاتحسبن ايام عمرك طويلـه=يامن تظن الوقت دايم صفيـا
خذ الحذر مابين يومٍ وليلـه=يمكن يجي من لاتريده خويـا
يقولها من صار قلبه دليلـه=والخاطر المكسور ماهو خليا

خلف الفريد

21-06-11, 08:34 PM

خلال الفتره من 26/2 الى 5/3/1429هـ قامت لجنة التنمية الاجتماعية الاهلية
في بلدة كبد ممثلة برئيسها الاستاذ / حديد بن محمد بن حديد الفريدي وبإشراف مركز
التنمية الاجتماعية بالقصيم بإقامة فعاليات :
( ملتقى الربيع في كبد القصيم _ تفاؤل وتواصل وترفيه وتثقيف وتكريم )
وكان لي شرف الحضور والمشاركه بدعوة كريمة من اخي حديد وقد شاركت بهذه
القصائد الثلاث ، الاولى وفاء لوالدنا الشيخ محمد بن حديد باني البلده ونجله اخي
وصديقي فالح بن محمد ساعد والده الايمن رحمهما الله رحمة واسعه
والثانيه في الافتتاح والاخيره في الختام راجياً ان اكون قد اديت بعض الواجب :
.........................

(( وفاء ))

مرحوم ياشيخ ٍ ولو غـاب موجـود=شيـخ ٍ مناهـج سيرتـه مستقيمـه
الشيخ ابو فالـح بالافعـال محمـود=اللي على فرقـاه -كبـده- سقيمـه
شيخ ٍ بنى دار ٍ له اركـان وحـدود=بالصبر والاصـرار واقـوى عزيمـه
ومرحوم يافالح فتى الطيب والجـود=يمين ابـوه ومستشـاره ...نديمـه
النادر اللي مـا وطـا درب منقـود=ديـن ورجوله...والطبايـع كريمـه
عسى السحاب اليا اختلط برق ورعود=يمطر على القبرين..ويصيـر ديمـه
ولا مات من عقّب صناديـد وفهـود=عقّـب شغاميـم ٍ تسـد الثليـمـه
..............

(( صواري الحب ))

الكاف.. كلي جيتكم حب واشـواق=الله يهـوّن لهفتـي ..واندفـاعـي
والباء.. بدعت القاف رايق ومشتاق=وعلى صواري الحب رفرف شراعي
والدّا...دليلي نابض ٍ جوف الاعماق=قلب ٍ يعبّر عنه.. نـزف اليراعـي
كبد...ومكانة كبد في وسط الاحداق=كبد القصيم.. اللي تمـد الذراعـي
لضيوفها الغاليـن والحـب دفـاق=حبّ ٍ اهلهـا ...يعلنونـه جماعـي
والليله الفرحه لها اشكال وارنـاق=واللي يزينها ..جميـل المساعـي
والملتقى ساسه على خير واشـراق=فكره وتنفيذ ..ومكـان اجتماعـي
برنامج ٍ مدروس ..ولكـل الاذواق=وبراعة التنظيم ...مابـه نزاعـي
فعاليـات ٍ تحتـوي كـل مـا لاق=وتعطي عن الاهداف احلى انطباعي
موايد ٍ للخير مـن كـل الاطبـاق=الذ واحلى ...من حليـب المراعـي
وللخير عشاقـه وللشـر عشـاق=عرفت هـذا ..بخبرتـي واطلاعـي
حنّا بوقت ٍ فيه تكسيـر الاطـواق=وتطلّ من جـوّاه ..روس الافاعـي
والحق عانا فيه من لوي الاعنـاق=واصبح مجاله للدعـاوي مشاعـي
والجو سيله يغرق اليابس اغـراق=بالصوت والصوره وبـثّ ٍ اذاعـي
تخالطت اصوات واهداف وابـواق=ولا بد من تحصين خـط الدفاعـي
وكل الشكر للي تحمّلْ عملْ شـاق=واللي بذل مجهود ساعـي وداعـي
واللي تكبّد عنـوة البعـد وارهـاق=واللي له المعروف داعـم وراعـي
والنفس ما طابت ولا خاطري ضاق=لكن حدود الوقـت رهـن اتباعـي
وصلوا على المختار ما لاح بـراق=وعد النجوم اللي تبـث الشعاعـي
...................

(( مسك الختام ))

اجمل ختام ..وصفّقت كبد ...للكـلْ=لضيوفها ...ورجالها المخلصينـي
تضحك غنج ..يزها بها الزين والدّلْ=ويحق لك يا كبد ..هـاذي يمينـي
ما دام رجالـك ..للثقايـل تحمّـلْ=وعند اللوازم ...كلهـم جاهزينـي
عجزت اميّز!!!بين مخطـي ومـدّلْ=هـذا وهـذا !!....كلهـم طيبينـي
عشرة ايام ٍ نشرب الحـب ونعـلّ=بضيافة رجال الوفاء ..الغانمينـي
في ملتقى كبد القصيـم ..المكمّـل=اللي مثل هـدّاج ...لـه واردينـي
وجات النقاط الخمس بالوجه الاكمل=بجهود ربـع ٍ .. للبلـد وافيينـي
تفـاؤل وترفيـه وايضـا تواصـل=وتثقيف ...والتثقيف دنيـا ودينـي
واليوم للتكريـم صـوت ٍ مجلجـل=صوت ٍ صداه يدوم ..عدة سنينـي
ويا شاعر المليـون مهمـا تجمّـل=لك شاطي الراحه... ولي راحتينـي
لو كنت تطلب بيرق العـز صامـل=رفعت رايـة كبـد ...بالساعدينـي
دار الوفاء والحب للطّيـب مدهـل=لو نبتعد عنها ...يزيـد الحنينـي
ونبي ندوّن كلمةْ اعجـابْ بسْجـلْ=وسجلّكم ياضيوفْ... صفحة جبيني
قولوا لبو راكان ...شكـراً مجمّـل=والشكر موصول ٍ ... بعقد ٍ ثميني
لكل الحديد ..اللي كرمهم كما الطّل=وايضا الشباب اللي معه قايمينـي
وحان الوداع ..ولوّح القلب للكـلْ=مع السلامه ....علّكـم سالمينـي

..............
وسلامتكم

خلف الفريد

21-06-11, 08:38 PM

تبلّـدت فينـا الاحاسيـس يانـاس=ياجامعتنـا الاصـل هبّـي لـفرعـا
الشام تصرخ والعرب مابها احساس=الـدم سايـل والمسلميـن صرعـى
فـي حمصنـا واللاذقيـه وبنيـاس=وازرع ودومـا والقمشلـي ودرعـا
ودمشق فيها اليوم تندق الاجـراس=النـاس ضاقـت بالاكاذيـب ذرعـا
بشار شكلٍ حوله انيـاب واضـراس=يبغون كل الشعب يصمـت ويرعـى
وشعب الكرامه قال مايحني الـراس=لو يتجـرع علقـم المـوت جرعـا
والعنف يابشـار عنـوان الافـلاس=الموت يزرع وانـت حصـاد زرعـا
ياصاحب الصالون لو جبت الامواس=تبي تحلّـق روس والـروس قرعـا
(وين العرب؟) ذي جملةٍ بين الاقواس=يجيب عنها فاهم الوضـع سرعـا!!
وضعٍ خطيرٍ تنحبس منـه الانفـاس=لايرضي المولى ولا يجـوز شرعـا
وترى الحلوب اللي دررها بلا قيـاس=ارخت لكم ياهل الرخـاوات ضرعـا

خلف الفريد

21-06-11, 08:40 PM

عندما ذهبت الى الكويت لحضور حفل زواج نجل اخي الحبيب سعد المجينين لم اجد
اخي وصديقي الشاعر الكبير/ حربي بن بجاد بن عطيه الفريدي وهوالمتواجد دائما
في مناسبات ربعه هناك فلما سألت عنه فوجئت بانه في التخصصي في الرياض لاجراء
عملية من مرض شديد وبعد العشاء اخبروني انه وصل جواً فذهبت من لحظتي الى بيته
ووجدته قوي العزيمه عالي المعنويه وبخير ولله الحمد _والامل بالله _ولم اتمالك نفسي
فقلت له من فوري هذه الابيات العاطفيه :

ماجور ياحربي من الشر ماجور=تدوم طيّب ياسليـل الزحولـي
ردّيت سالم يم الاحباب مسرور=اقولها وكل من يحبـك يقولـي
اخفيت عن ربعك مشاكيك معذور=يوم ان بعض الناس قلبه جفولي
آون لنا من عنوةٍ يمّـك نـزور=انته تعاني ياثقيـل الحمولـي
والحمد للي بالمقاسيم مشكـور=ولعل ماتعانيـه شـر ويزولـي
متطمنين واكـدّه قـول دكتـور=(حصانكم بكره يصول ويجولي)

خلف الفريد

21-06-11, 08:42 PM

وجدت في صندوق رسائلي هذا اليوم هذا التوقيع الجميل وهو من اهداء
الابن الوفي مشعل المجالس ...
ومن فرحتي لم اجد ما اهديه الا هذه الابيات السريعه عربون رد جميل ...
بيض الله وجهك يابن مطيع ....

ياللي معودنا ..لك الطيـب عنـوان=لاهانت جهـودك ولا خـاب مسعـاك
يـوم المزايـا بيـن زودٍ ونقصـان=انتـه بعينـي كامـلات ٍ مـزايـاك
شكـراً يامشعـل ياسلايـل كحيـلان=لاهنت ياحرٍّ علـى الطيـب مبـداك
هديتـك ماهـي تقـدر بالاثـمـان=اهديتني توقيـع مـن فعـل يمنـاك
اسمي مع اغلى ابيات "مجدي" وديوان=ومناظر ٍ يطرب لهـا صاحـب ادراك
ارفع لك البيضا علـى راس مابـان=يابن مطيع ...ودعوتـي "لاعدمنـاك"

خلف الفريد

21-06-11, 10:36 PM

هذه القصيدة قلتها بمناسبة زواج الابن منصور بن سعد المجينين
الذي اقيم في الكويت الحبيبه ......

سـلام يـادار النشامـا والاحـرار=سـلام يـادار الصمـود المنيـفـه
سـلام يـادار الشهـاده والاطهـار=سـلام ياقهـر الظـروف الكليفـه
سلام ياكويـت المكـارم والاخيـار=اهـل المحبـه والقلـوب النظيفـه
دار الرجال اللي على الضيف والجار=مثالهـم حاتـم لجـاره وضيـفـه
دارٍ عصت على اسود الوجه غـدار=مسخٍ غزا الجيران واستـل سيفـه
بايق وطبّل لـه حواسيـد واشـرار=قالـوا خفايـف والكلايـف طفيفـه
ويوم اوقعوه بغبة المـوت والنـار=تفرقوا خاسيـن عـن مثـل جيفـه
ثم انهزم حصيله الخـزي والعـار=حافي قـدم ومسانـدٍ لـه رديفـه
والخاتمه جحرٍ وفـي داخلـه فـار=واهانـةٍ منهـا العروبـه كسيفـه
وكويتنا دونـه مسافـات واعمـار=باغي ربيعـه مالقـا غيـر صيفـه
ومن دونه الشيخان وافين الاشبـار=آل الصباح اهل العقـول الحصيفـه
صغير في حجمه كبيـر بالاصـرار=وكثـر الكـلاب النابحـه مايخيفـه
مشاعري واقولهـا سـر واجهـار=لو انّ جرح القلـب وقّـف نزيفـه
وسلام من دارٍ ليا صار مـا صـار=زين الدخيل ليا غدا الوقـت شيفـه
دار المليك الفيصلي حامـي الـدار=اللـي تربّـع فـوق وادي حنيفـه
ان كشّـرت بانيابهـا حـدّ بـتـار=وان وادعت صارت "رياضه" مريفه
والليلـه الحفلـه ينابيـع وانهـار=مورد وفاء لاهل النفوس الشريفـه
بضيافة اللي لـه محبـه ومقـدار=ريف الضيوف اللي توارد مضيفـه
مسكانهم قلبه على يميـن ويسـار=قلـبٍ نظيـف وفيـه روح خفيفـه
صافي سريره ماجعل دونه اسـوار=ودّه حقيقـي ماشكـوا منـه زيفـه
شيخ ٍمزايا الطيب عنده لهـا كـار=وفعل الجمايل حطّهـا لـه وظيفـه
ابو محمـد قيمتـه صـرف دينـار=عملة فخر ما هو بعملـه ضعيفـه
الله يفكه مـن صواديـف الاقـدار=وعسى السعاده والسلامـه حليفـه
نشاركه فرحـة زواج ابنـه البـار=الله يبـارك للولـيـف ووليـفـه
قدمت له شعري بدل باقـة ازهـار=هديـةٍ مـن قلـب يسمـع رفيفـه
منصور يابنيْ لك وصيـه وتذكـار=يوم الوصايا اليوم مثـل الطريفـه
الطيب فارس والشكـالات مضمـار=وانته سليل الطيب واطيـب خليفـه
خلك على دربه ولا تصيـر محتـار=لو كـان مِـدّك مايعـادل نصيفـه
وصلوا عدد مالاحت نجوم واقمـار=على النبـي والآل واهـل السقيفـه

خلف الفريد

21-06-11, 10:39 PM

قبل ليلتين ..وفي استراحة تالين ...
كانت ليلة موعوده ..ومناسبة مشهوده ...
وقد كان الحضور أعلام ..والمضيف منصور الكرم والاكرام
وكانت المناسبة كريمه ... والفرحة عظيمه
فما هي الا ((طلائع)) يارا ... وأوّل الاصائل المهارا ...
أقرّ الله بها عيني والديها ...واسبغ الصحة عليها ....
ورزقها الاخوة والاخوات .. حتى تضيق بهم الجنبات ..
وكانت هذه مشاعري :

جتني قواف الشعر خيـلٍ تبـارا=وشديتهن بالـوزن شـدّ الاعنّـه
ولا اتخيّـر كـود عـوبٍ بكـارا=راع الولع -في ركضهن- يطربنّه
دايم لهن عنـد النشامـا وقـارا=والا ضعيف المعرفـه يسهجنّـه
واسرجتهن للفارس اللي تمـارا=فيه القبيله عنـد رفـع الاسنـه
عند المواقف ظاهر ٍ ما يتـوارى=وليا بذل معروف مافيـه (منّـه)
ولا للمديح بـلا دليـل اعتبـارا=ومنصور صفحات النقـا يكتبنّـه
ولا جابنا غير الوفاء يابو يـارا=وعدّ الجمايل يابيض الوجه سنّـه
مشاعـرٍ وابديتهـا لـك جهـارا=والقلب لـه تعبيـرْ عمـا يكنـه

****

خلف الفريد

21-06-11, 10:44 PM

اتصلت بي شاكية باكية ...
وبعدها ...

قالت قريـت اللـي قريتـه وكدرنـي=شيٍّ على المكشوف!! كـلٍّ يذيعـه!!
كيف الحبيب اللـي بعينـه تخيرنـي=اليوم عنـده صـرت مثـل الوديعـه
وكني مجرد لحظـةٍ .. ثـم يهدرنـي=حتى سنين العمـر ماهـي شفيعـه!!
لو مايخاف انه مع الوقت يخسرنـي=على الاقل وشلـون قلبـه يطيعـه!!
هو حق يوم انه بـالاذلال يشعرنـي=يشكي سهوم الحب ..وانا الصريعه!!
اقسم بربـي ... بالثلاثيـن يكبرنـي=وانا شبابي يابن عتـاق فـي ريعـه
والله ما اذكريومٍ على فعـل يامرنـي=الا جوابي سم.. لـو مـا استطيعـه
كنت استمع كنك على لوح سامرنـي=وفصاحتـي راحـت سـرابٍ بقيعـه
ماكنهـا الا بالاصابـيـع تمـزرنـي=ومن كل عضـوٍ فـيّ تاخـذ مزيعـه
قلت الغزل .. يابنت كلـه "حَوَرنـي"=ورعود صيفٍ ..يـوم قفّـى ربيعـه
مار اصبري ..قالت عسى الله يصبرني=لو باعني ببلاش..والله ما ابيعـه !!

خلف الفريد

21-06-11, 11:05 PM

الشعر روضٍ فيه من كل الاعشاب=متشابهات وتختلف عـن بعضهـا
كم عشبةٍ لازهارها شكـل جـذاب=لكن مرارة طعمها مـن برَضْهـا
وكم وردةٍ جمالها يسلـب البـاب=ودون اليمين ..اشواكها تعترضها
وترى المشاعر صفحةٍ داخل كتاب=لو يكثر التمويه يعـرف غرضهـا
اما تسر العين وتريح الاعصـاب=والا نوافل من تهقوى .. فرضهـا
مايبني افكاره على عرف وحساب=واليا فتل بيتيـن عـاد ونقضهـا
من مرها قال اسمحوا لي يالاشناب=دقايقٍ فاتـت علـى الله عوضهـا
ومن كان سوره ينفتح به مية باب=بالمعركه خسران.. لو قيل خضها
والبسمه اللي لو بدت خلفها انياب=تنبيك بعض احوالها عن مرضهـا

خلف الفريد

21-06-11, 11:08 PM

اخوتي وابنائي
اقسم بالله الذي لا اله الا هو انني افرح لفرحكم واتألم لمن يتألم -لاقدر الله- وما ذلك الا لان هذه
سجيتي ولانكم جميعا قطعة من الروح ...
والغالي نواف بن فارع الفريدي شاعرنا الجميل رجل طموح صبر وصابر وثابر حتى نال
مراده وحصل على الوظيفه ...
وباسمكم جميعا اهديه هذه الابيات :

بشارةٍ جتني عـن الفيـن دارع=وبعض البشاير مايقـدّر ثمنهـا
من فرحتي قلت انتهزها واسارع=باسم القلوب البيض عني وعنها
التهنيـه منـي لنـواف فـارع=على الوظيفه يوم جـوّد رسنهـا
له قوّةٍ ماهـي بقـوة مصـارع=قوة عزيمه فيـه تامـر وتنهـى
وله همّة اللي بالمهمـات بـارع=وله شدّة اللي ماتـردّه شطنهـا
ومن يطلب الطولات لازم يقـارع=اعتى الظروف اللي تناوب محنها
والزرع محصوله حسَب كل زارع=والصبر لجل المرجله من سننها
والماضي انسه واستفيد المضارع=وخل النظر قـدام فـي مقترنهـا

خلف الفريد

21-06-11, 11:11 PM

اهداء لمشعل بن مطيع تعبر عن نفسها ....

انته تتبّع ما نجيبه من ابيـات=وانا اتحرّى مايخطـه يراعـك
في حقكم كلمات ردي قليـلات=لانك محيطٍ يحتويها اتساعـك
راع الوفا تاتي معانيه جزلات=ومدّي قليل ٍ ماوصل حد صاعك
سموك مشعل عارفينٍ مزايـاك=اتعبت عينٍ ناظرت لارتفاعـك
اشكرك يارمز الوفا والمروّات=لعل مانحرم روايـع ابداعـك

خلف الفريد

21-06-11, 11:14 PM

في موضوع اللقاء مع المشرف المبدع / ابن مطيع في مجلس (عضو تحت الاضواء)
اهديت الى اخي خمسة ابيات يستاهلها ، وكان ان اطلع عليها شاعرنا الغائب الغالي
غازي الفريدي فأهداني مع اخوتي ثمانية ابيات كالدرر ، وله اهدي هذه الكلمات
المتواضعه باسمكم جميعاً .....

مشكور ياغازي على اطيب مشاعرك=ياشاعرٍلاقـال ينـقـا الجـزالـي
حرٍّ من احرار الجماعـه وماكـرك=ليا لـدت الانظـار روس الطوالـي
انت الذي باطنـك يشبـه لظاهـرك=وفيك الوفاء والحب حـد الكمالـي
اقلط مجالسنا بهـا الكـل ناطـرك=على الدفا والطيب وصفـر الدلالـي
اربط لنا ماضي ابداعـك بحاضـرك=ارو القلوب الضاميـه مـن زلالـي
حنا بني عمك وربعـك ومعشـرك=وانت الوفا طبعك على كـل حالـي
عطنا مجـالٍ بالروايـع نخاشـرك=قل تـم ، وياربـي عليـك اتكالـي
والخاتمـه اقبـل تحيـات شاكـرك=ماهفهف النسناس شرق وشمالـي

**************

خلف الفريد

21-06-11, 11:16 PM

كنت في زيارة للكويت وقد دعوني ابناء صديقي المرحوم

الشاعر الكبير /
متعب الديري
رحمة الله

في دارهم العامره بالفحيحيل وبعد

العشاء القيت قصيدة عاطفيه مرتجلة

وقد تأثرالحضور وبعضهم بكى

وكان ضمن الحضور شخص عرف نفسه انه::

مهلهل بن علي بن سعيّد الشمري

( معشي الذيب )

وقدم دعوة لي للعشاء,,

وعندما اعتذرت

قال لي :: عندي غداً عشاء لجيراني الجدد واذا كنت بالكويت ما اسمح لك ,,

قلت :: تم

ولكني مشيت العصر وتفاجأت به يتصل بي وانا بالخفجي
ويقول:: وينك ترا حقك مع العشاء !!!!
وعندما اخبرته :: بالسعوديه وسوف اعود من فوري

واقسم اني ما ارجع

فقلت القصيده وارسلتها له

وقلت :: والله ان تقراها على الحضور وقبل العشاء ففعل
********

يابـن سعيـد ياسليـل الطنايـا=يامكرم الضيفان يامنبع الطيـب
الجود عن جدك خذيتـه وصايـا=زود الكرم سماه بمعشي الذيـب
حر علومـك بالمجالـس نقايـا=مع قلب ابيض ماتشوبه عذاريب
بالعون ماشفنـا لمثيلـك حلايـا=بين الرجال الي تعرف المواجيب
قلبك مع اخلاقك سوات المرايـا=تعكس لنا ماتشيل خلف المحاديب
عل الردي لك يالسنافـي وقايـا=من تكثر هروجه بليا مقاضيـب
والا انت من حايل عروس القرايا=دار الرجال الي لحاتـم مناجيـب
تسلم لعـل يديـك دايـم ملايـا=وجبتنا لكـن اعتبرنـا معازيـب
وانت العزيز الي من اغلى الدنايا=روس بهم ظن الرجاجيل مايخيب
يابو علي لو لا المسافـه ورايـا=ولولا يمينك ما اقطع الحد تغريب
لكن السموحـه ياكبيـر المزايـا=مع العجاله يخطي الحظ ويصيب

خلف الفريد

21-06-11, 11:20 PM

يوم الخميس الماضي الموافق 11/3/1431هـ كان لي شرف الحضور والمشاركه في حفل زواج
الابن/ عبد الهادي بن متعب الديري ، ومن لايعرف شاعر حرب الكبير / متعب الديري رحمه الله
لقد كان لي بمثابة الاب اوالاخ الكبير ، وقد ضحيت بحضور مناسبة اخرى عزيزة على القلب وهي
حفل تكريم اخي شاعر حرب الشهير/ لافي الغيداني وما ذلك الا من باب الوفاء لذلك الغائب الغالي ....
ويسعدني ان اهديكم مشاركتي ولو ان املي هوان تكون ابلغ من هذه.. ولكنه جهد المجتهد .......

دعوة فهد واخوانه اهـل المكـارم=لبيتها ..وليت الوفـا كـاف ليتـه
هم مانسوا حقي وانا كنت ضـارم=علـى تذّكـر "والـدٍ" مـا نسيتـه
ابو فهـد حبـه بالاعمـاق عـارم=حبٍّ بنـاه بطيـب فعلـه وصيتـه
شيخٍ بفعل الطيـب مغـرم وغـارم=وعنـد اللـوازم لابغيتـه لقيـتـه
دون القبيله سيف والسيف صـارم=ان سولـت لّـلاش نفـسٍ مقيتـه
ويوم فجعتنا فيـه سـود الخـوارم=صار العوض ب" اشباله" المستميته
رصيدهم ماهو رصيـد الحضـارم=والكل منهم قـال: لـي واحتميتـه
والمرجله صبـر وثبـات ومغـارم=وخير البضايع ما اشتريت و"قنيته"
كم طامحٍ للطيـب والصـدر" وارم"=وتحول دون الطيب "طلعة بهيتـه"
وبيت الشرف والعز"منجـم" اكـارم=واكبر حظيظ اللي حفظ عهد"ميتـه"
ومبروك يا هادي سليـل الصـوارم=وموفـقٍ فـي كـل دربٍ مشيتـه
ولا مات رمز الجود ستر المحـارم="نبت" الصخا والطيب في جوف بيته

خلف الفريد

21-06-11, 11:24 PM

يقول فخامة علي عبد الله صالح ....

لاراقـدٍ راقــد ولا ذاهــلٍ ذاهــل=ولا نايـمٍ نايـم ولا قبضـه حديـديـه
شوفوا "معمر" حصـانٍ ثائـرٍ صاهـل=يقود المعارك خلف "باب العزيزيـه" !!
و"بشار" صحيح انه قليل الخبره وجاهل=لكن ياحظه تـورّث كـل سوريـه !!!
واللي علينـا فتـح بيبـان " متراهـل"="الزين" لازان فالـه "وليلـى الحديديـه"
وثاني ضحيه اخونـا الريّـس العاهـل=و"السيده الاولى" بشرم الشيـخ منسيـه
وانا حملت اليمن كله علـى الكاهـل!!=والفضل لي تحملته ثلاثيـن حوليـه!!
وهذا شباب اليمن مـن سيرتـي ناهـل=ومـا يطلبونـه تحقـق "طلقـة حيـه"
و"سيل العرم" لاسـال ماهـو بمتماهـل=وانا مثل " سد مأرب " لليمن واليمانيـه
وفي ساحة" التغيير " والله ما اتساهل=اما لنـا والا نولـعها " حـربٍ أهليـه "

خلف الفريد

21-06-11, 11:29 PM

في احد المجالس هنا وجدت موضوع للاخ ابو يزن الفريدي وفحواه مقابلة للحبيب
المبتعث / نواف بن نايف الفريدي مع احدى القنوات وقد كانت مقابلة رائعة اثلجت الصدر، بطلة صاحبها
الجميلة وتعبيره الرائع ، وفي اثناء كلامه عرّج على ذكر الغربه فأحسست بمعنى
هذه الكلمة وقد عانيتها في يوم من الايام لذا اهدي له :

يابو عمر غربه وتفكير واشـواق=لكنها صبـر وتجـارب وتحصيـل
ترى المعالي دونها يابـس اريـاق=وروس القمم يوصل لها بهدّة الحيل
وانته سلاحك بك عزيمـه وتـواق=وعلى صلاحك ثابـتٍ دون تبديـل
يابو عمر حياتنـا حلبـة اسبـاق=والرابح اللي سابقه بـاول الخيـل
تابع -بتوفيق الولي- دربك الشاق=عسى مسارك فيه خيـر وتساهيـل
اعمارنـا يعدّهـا نبـض خـفّـاق=واعمالنا حملٍ على ظهورنا نشيـل
والله يردّك من عنا بعـد وافـراق=سالم وغانـم للوطـن والمداهيـل

*********
مع تحيات
محبك ابو عبد العزيز

خلف الفريد

21-06-11, 11:31 PM

وجدت في مجلس مكشات مشاركة للشاعر نايف بن مياس موجهة للشاعرين الجديد (ابو فايز)
وعلي الجضعان بخصوص آثار الحباري بحكم اختصاصهم وبحكم اختصاصي(محامي)!!!
اهديكم هذه الابيات :

ياهل الطيور اللي تصيد الحباري=حتى لهيـب القيـظ ماردكـم رد
لو لاوذت ماتتركـون الجـراري=وتصنفون انواعها ياهـل الهـد
مفتونكم مابين سـارح وسـاري=لولا سلاح الحـد قطعتـم الحـد
ان جت لنا صارت طعام الحراري=وان اشملت تموت من شدة البرد
حتى الدخيل اللي يـدور مـذاري=اصبح ضحيه بين مخلابٍ ويـد!!
ماني عليكم ياهل القنـص زاري=لكن (الحماية ) ياجماعه ترصّد !!

خلف الفريد

21-06-11, 11:34 PM

وين الحذر؟! يهل البيوت الكبيره=عوراتنا مابين ركبه وسرّه !!
كثرت علينا!! والحناشل كثيره=لاتسلب المحصول في حين غره!!
جت من خلاف البيت ماهي مغيره !!=وقامت تفتش بين كل الاصره!!
وطلع النخل حوله تليّم "غبيره"!!=وترى ما يسوى الشيص مثقال ذره!!
عجزت اميّز بين سرّ وسريره=اعياني التفكير في كل مرّه !!
ناقف على الابواب حبٍّ وغِيره=ونصبر على لفح الهبايب وحرّه !!
وحصيلنا التشكيك بين العشيره!!=وعن كلمة التقدير.. صارت مضرّه!!
وياللي على ثوبه "تباقيـع" كيره!!=(ابك انت من ضرّيت حتى تسره ؟؟!)
ان كنت تفكّر باعتراض المسيره=قدمك "معاقل جيش" ماهي مبرّه!!
عابر سبيلٍ حلّ ويحلّ غيره!!=بكره ماتترك غير آثار جرّه!!
ويهل البيوت!! اما سلاح وذخيره=والا خرج سكان " ليمان طرّه "!!

خلف الفريد

21-06-11, 11:42 PM

عبد العزيز الجـوف مثـل المصاهـر=حـرّه يذيـب الشامخـات الرواسـي
باسبـاب نـاسٍ بالمغثـه تجـاهـر=اللي على قول "الجميلـي" اخساسـي
غديت مثل جحيـش والغبـن ظاهـر=يشكـي قطاعـة خايبيـن الاساسـي
ياعزوتـي دن الحطـب والمبـاهـر=واضبط لنا فنجـال يجـل العماسـي
ترى الهجوس من اول الليـل ساهـر=واسهر معه -بالعون- خمس الحواسي
تدوي بـي الافكـار والوقـت قاهـر=مثـل السفيـن اللـي بليـا مراسـي
كنـت احسبنّـي بالحسابـات ماهـر=اعرف قياس الغير والبـس قياسـي!!
ولا تغرني يابـوك بعـض المظاهـر=واميّـز الالــوان دون التبـاسـي!!
وليا مشيت بدربـي اعلـن واجاهـر=ليه اتخفـى ليـه!! والنـاس ناسـي
عفويتي منهـاج .. والقلـب طاهـر=واطيب صفات الخير منبع احساسـي
لكن لقيـت النـاس مغمِـد وشاهـر=ولازم عن "الاثنيـن" فيـك احتراسـي
ماكـل مايعـرض ثميـن الجـواهـر=ولا كـل مايعطيـك الالـوان ماسـي
الـورد يوخـذ مـن علـو المزاهـر=وصدر الثرى يضرب بحـد المراسـي
وعينـي تراقـب للحـرار الشواهـر=وان دنقت للدون .. لاعـاش راسـي
دقيـت رمـح الحـق بيـن الاباهـر=وعرّيـت نـاسٍ ماسترهـا اللباسـي
ان عـاودوا مارقّصتـنـا "سمـاهـر"=يوم التحـدي صـار "لعبـة كراسـي"
بشارنا لـو هـو تتقـى بـ" ماهـر "="البعث" ماخـوّف "سهيـر الاتاسـي "

خلف الفريد

07-04-12, 10:10 PM

عندما اسند سعد بن ناشر الفريدي قضيته الى الشاعر رشيد الفريدي
كانت هذه المشاعر :

انا اشهد انك ياسعد يوم سنـدت=وجهتهـا للـي كبيـرٍ مقـامـه
رشيد وابشر ياسعد انك ارشـدت=الاسـم لـه ادلالتـه واحترامـه
ويارشيد دام انك مسنَّد تسنـدّت=على الجبال اللي تبـاري تهامـه
دامك بركـت لحملهـا ماتـرددت=ابشـر بعـزك ياسليـل العتامـه
شرحت موضوع البناخي وفنَّـدت=وبينت للوافين معنـى الشهامـه
وهاذي وجوه الخير لبّت لما اردت=كلٍّ على المعروف وردت حيامـه
الله يفرج كرب من لـه تجهَّـدت=ويرجع سعد من غربته بالسلامه

خلف الفريد

07-04-12, 10:14 PM

ايها الاحبه
اليكم هذه الوردية الحزينه

يافاتـحٍ بيبـان قلبـه لغـيـري=انا احسبنك كنـت ملكـي لحالـي
بالله ماتشكي عـذاب الضميـري!!=والا ماعندك خوف من ذا الجلالي!!
النـاس بالفديـه تفـك الاسيـري=وانا رهينـك دون فديـه ومالـي
ياليتنـي املـك جنـاحٍ يطيـري=والله لهاجر عنك لقصى الشمالـي
وابقى جوار مدلّهيـن "القصيـري"="بشار" والا "الهاشمـي" الموالـي
عمر الفتى لو طال فيه المسيـري=مجـرد ايــامٍ تـمـرّ وليـالـي

خلف الفريد

07-04-12, 10:19 PM

بسم الله الرحمن الرحيم
قبل اسابيع تلقيت دعوة كريمة من اخي الشيخ/ عبد الله بن عبد العزيز الهديب لحضور
الحفل الذي اقامه هو واخوته في بيتهم العامر في بلدة قصيباء فرحاً بقدوم باكورة شموع
الشيخ الوقور/ سند بن عبد العزيز بعد طول انتظار حتى منّ الله سبحانه عليه واعطاه هذه
الهدية الغالية ، وقد سعدت يعلم الله ايما سعادة لهذه البشارة السعيدة ولبيت الدعوة حباً ووفاء
لاهل الكرم والوفاء و تشرفت بالمشاركة بهذه الابيات المتواضعة :

سبحان من يعطي ويمنـع عطايـاه=وليا عطا عبـده جزيـل الوهايـب
والقانع المحـروم دايـم برجـواه=بابه وسيع ولا شكى منـه خايـب
وما قدّره في حكمةٍ منـه نرضـاه=دايم مع المكتوب مخطي وصايـب
هو صاحب القدره تعالـى هـو الله=اللي خلق من بين صلـب وترايـب
وانـا دعانـي غالـيٍ لاعدمـنـاه=الشيخ عبد الله عـن الكـل نايـب
وفرحة سند يوم اكرمه صاحب الجاه=يفرح بهـا كـل الاهـل والقرايـب
واياعساهـا اول شموعـه بدنيـاه=ومن بعدها تكثـر جنـود وكتايـب
لجله عزيز وتفعـل الطيـب يمنـاه=ومن بيت عزٍّ شيّـده راس شايـب
خصلـة جواعيـنٍ حـرارٍ مسمـاه=اهل المواقف يوم وقـت النشايـب
وختامها ماهـل ّمـزنٍ نثـر مـاه=صلوا على خير البشـر والحبايـب

خلف الفريد

07-04-12, 10:30 PM

بسم الله الرحمن الرحيم

ياحمـص والله نسمـع الصـوت ونشـوف=لاترتجيـن مـن العـروبـه ولا شــيْ!!
فيـك اختلـط سكـون الامـوات والخـوف=ولا عـاد نميّـز بيـن ميّـت ولا حــيْ!!
حـال العـرب قـوّال "مانـي بمكـلـوف"=ان انتصـر بشـار.. فيـكـم ولا فــيْ!!
والموقف التركـي بـدا صـوت عاصـوف=مـار اضعفـه موقـف عربنـا الضبـابـيْ
وبانـت نوايـا الغـرب واللعـب مكشـوف=يقـدّمـون اطباقـهـم واللـحـم نــيْ!!
والـروس باقيـنٍ علـى عهـد خرشـوف=مصالـحٍ قــذره.. ومـبـدا اشتـراكـيْ
والصيـن تنيـنٍ مـن اوراق وحــروف!!=نفس الحكومـه.. حـزب واحـد ومـاويْ
وايـران موقفهـا مـع الشـام مـعـروف=جسـر عبـور وغايتـه مــدّ شيـعـيْ!!
و(حـزب الخبايـث) علـةٍ داخـل الجـوف=ويجـهـر بتأيـيـده لتنظـيـم وحـشـيْ
ويا "بابا عمرو" اصحي ونامي على الخوف!!=دام الـذي يجري مع عروقنا مي !!

خلف الفريد

07-04-12, 10:36 PM

في ردها عليّ في مشاركتي " دور على غيرنا" تعاتبنا الزميله (ريم) على عدم انشادنا معشر
شعراء القبيله في بناتنا واقول نيابة عنهم:

شعَّارنا .. جتني من الريم كلمـات=رسالةٍ وصلت ولـو هـي قليلـه
تقول ياعمـي اشعـارك كثيـرات=وراك ماتمـدح بنـات القبيلـه!!
واقول يابنتـي مرابـط اصيـلات=واللي ماهي خنساء تصير الجليله
بناتنا مـن راس راشـد سليـلات=العزوه اللي مـع ثمرهـا ظليلـه
ان جيت اوصّف بالحلايا جميـلات=وعفافهـن مافيـه هنّـه وميلـه
وان شفتهن بالسوق ماهن خفيفات=مثـل الجبـال النايفـات الثقيلـه
في دورهن او خارج الدور خفرات=ولاهن طمع لهل النفوس العليلـه
وانتي نموذجهن من الناس بالذات=دايم علومـك بالمجالـس جميلـه
اقولها ولا اهضم حقوق الشريفات=ياكثر من عدّن بـراس الطويلـه
.........

المصدر : http://www.alfredah.net/forum/threads/alfredah34531/#ixzz1qx5Hw9ya

خلف الفريد

11-06-12, 03:41 PM

يازين عطني لو تكرمـت فُرصـه=سمّعتني دعواك واسمـع دفاعـي
راع الهوى ماينفعه نوب خرصـه=وانا اندفعت وعلتـي باندفاعـي!!
ليه العلاقه بيننـا خـط بُرصـه!!=نوب انخفاض اسهم ونوب ارتفاعي
فرصتني مع ثومة القلـب فَرصـه=واهديتني نظـره.. بليـا وداعـي
ويوم ان كلٍّ حط سمنـه بقرصـه=تبي تقنّعني بصـدق المساعـي!!
اشكر جنابك واهتمامه وحرصـه!!=لكن مرور الوقت قطّع شراعـي!!

خلف الفريد

04-07-12, 11:53 AM

بسم الله الرحمن الرحيم
(( فالح بن صلبي الفريدي ... ابو سلطان ))
علمٌ من اعلام حرب غني عن التعريف
كان بمثابة والدي واخي وصديقي ، وكان جاري بنفس الوقت
فقدناه قبل سنوات فجاة ودون سابق انذار .. لكنه الاجل الذي نؤمن به
كنت كلما مررت امام بيته بكيت احياناً ودعوت له حتى عندما أزيل بعد بيعه
وقبل يومين اتصل بي اخي وصديقي الشاعر / علي الجضعان وقال انه
مرّ بحيّنا ورأى آثار ذلك الصرح ولاحظ شيئاً ولابد انني لاحظته ايضا وانني
قلت شيئاً ..ولأنه حرّك ساكناً.. كانت هذه العبرات :

يابيت لو هدّوك ماضيك باقـي=ماضٍ مشرّف والكرم شاهدٍ لّه
حتى مشّبك باقيٍ لـه بواقـي=هذا الكمـر مابـاقٍ الا محلـه
وآثار شبات المسا والشراقـي=بجرم الغضا والسمر ماهو بجلّه
ياكثر من مثلي كثير اشتياقـي=على الذي شيّدك مثل المسلّـه
ماشيّدك شيخ الكرم بالمتاقـي=صرحٍ لبو سلطان كـلٍّ يدلـه
مدهل مشاكيل العرب والطراقي=هـداج تيمـا كـل وردٍ تعلـه
ياكبر فزعاته لاضاق الخناقـي=اليا نخيته قام ثم جـاك كلـه
وله مجلسٍ مافيه سبّ ونفاقي=ولا حط من دون القرابات شله
ولا كثرت الاصوات مابه طفاقي=ولا كل كلمة جاهـلٍ تستزلـه
والهرج مثل الشهد حلو المذاقي=وفيه البشاشه والمحبه جبلّـه
والحمد لله مات صعب المراقي=على النقا والطّيب مذهب ومله
نطلبك ياخلاق سبـعٍ طباقـي=تغفر ذنوبـه ياكريـم وتحلـه

خلف الفريد

04-07-12, 11:58 AM

بسم الله الرحمن الرحيم
قبل اسابيع وبدعوة من الشيخ/ عياد بن فويران الفريد تشرفت بحضور الحفل الذي
اقامه ببيته العامر في بلدة الطراق ابتهاجاً بفوز اعضاء المجلس البلدي بالقوارة
من شبابنا وهم:
منصور بن ناصر بن سعديه من القواره
عبد الله بن راضي الوسوس من القواره
دحيم بن قاعد بن دهيليس من المخرم
سعد بن مطر الطميشاء من المخرم
فهد بن منصور الضبعان من القواره
اضافة الى مدير بلدية القواره وجمع من اعيان القبيلة والمنطقه ، ونيابة عن ابو عوض
القيت هذه الكلمات وضمنتها بالاخير احوال قرى المنطقة واملنا فيهم ...

عن اذنكم.. مبسوط والراس شايش=مار اسمحوا لي يالوجيه المداغيش
كلام عقـلٍ مـا جمعنـاه طايـش=يوم ان بعض الشعر مثل الخرابيش
بسم الكريم اللي للامجـاد حايـش=اللي مقامه يرفع الـراس ويعيـش
يامرحباوالصـدر بالحـب جايـش=في دار رمز المرجلـه والنغاميـش
راعي هلا والوجـه كلـه بشايـش=كنه يهلـي بالمـزون المراهيـش
والـدار بيبانـه تخـزّ الـدرايـش=مشرعاتٍ مافتحهـن علـى ويـش
واليوم ضيوفه ماعليهـم غطايـش=مثل النجوم الزاهيـات الرواهيـش
اكبودنـا دايـم عليهـم عطايـش=وآمالنا مثل انتظـار الطواريـش!!
ديارنـا تشبـه بـلاد العـرايـش=وتشكي مع الايام عزله وتهميش!!
درب الجلد مليان خـوف وهوايـش=وعند القنص لايطير بيديكم الريش!!
نبي على الذرعان تزهـا الغوايـش=ماينفع الجيعان بعض العراميـش!!

خلف الفريد

04-07-12, 12:04 PM

بسم الله الرحمن الرحيم

مجرد خاطره !!!

ياسيّد السّـاده بـو ذر الغفـاري=ما انته بمجبورٍ بترك المدينـه!!
تركتها مختـار ماهـو اجبـاري=حرصٍ على دينك وتبغى السكينه
يوم صار (للفتنه) مكان ومواري=قلت السلامـه مكسـبٍ طالبينـه
ب(الربذه) حطيت منفى اختيـاري=وعشت (الوحيد) اللي تمسّك بدينه
ياسيدي سيرتـك ظـل ومـذاري=ودربك قليل الناس هـم سالكينـه
ياسيـدي قـررت وهـذا قـراري=يوم القرار الصعب بعضه غبينـه
ياقدوتي مليـت كثـر المسـاري=طال المسير وعفت زينه وشينـه
فيما مضى حاولت حسب اقتداري=ومهما بذلت الجهد (مخلوق طينه)
وعسى القرار اليوم (رد اعتباري)=وتصحيح نهج لواجـبٍ مهملينـه
وياسيدي هذا صريـح اعتـذاري=لهل القلـوب الصافيـه باعثينـه
اقسم لهم ماكنت بايـع وشـاري=يوم نتبارى بالبيـوت الرصينـه
وشلون اضيّع هيبتي مع وقـاري=واصدّ عن شرهة عقـولٍ رزينـه
وختامها صلوا بصـوتٍ جهـاري=علـى حبيـبٍ كلنـا تابعيـنـه

خلف الفريد

04-07-12, 12:08 PM

بسم الله الرحمن الرحيم

فقدت ابي مبكراً ... فلم انعم بمعرفته وصحبته
لكنني لم أعش يتيما .. لان الله انعم عليّ بوالدتين حانيتين رائعتين
جدتي لامي التي احتضنتني.. فبذلت لها ما استطعت حتى دفنتها بيدي
رحمها الله رحمة واسعه
وأمي الحبيبه التي لازالت قرة عيني ولا زلت اكافح لكي اسدد لها القليل
ومن هذا المنبر الشامخ اهديها هذه الخلجات المتواضعه وبخجل
كما اهديها باسمكم اخوتي واخواتي ابنائي وبناتي.. الى غالياتكم العزيزات اللاتي
من الله عليكم بوجودهن واسأله ان يرزقكم برهن انه سميع مجيب ...

امّي مقصّر لوتعـذرت يـا امّـي!!=مار السموحه منك يانـور عينـي
كم يتعب الاعصاب ويزيـد غمـي=اليا ذكرت الحق مع كبـر دينـي!!
يمه انا ادري شلت كسبي بكمـي!!=لكن سؤالٍ بس.. فـي كلمتينـي!!
انا كسبت رضاك وانـزاح همـي!!=والا عصيـت اللّـه بالآيتيـنـي!!
تثني علـيّ النـاس والا تذمـي!!=انا عـدوي فرحـة الشامتينـي!!
يعـل عـروقٍ دمّهـا كـان دمـي=ما يابسن طول الدهـر والسنينـي
ولعـل صـدرٍ كـان زادي وجَمِّـي=بينه وبين النار صفحـة جبينـي!!
وعسى يدينٍ من غلايه.. تضمـي=ما تشتكي لـو حِكـة الراحتينـي
وعسى متونٍ ماشتكت يـوم زمّـي=ماتشيل من همّ العنـا شعرتينـي!!
ولعـل عيـنٍ دايـم الـدوم يمـي=من غبنها ..ماتمسح الدمعتينـي!!
كم راقبتني يوم راسـي يومّـي!!=وتركض ورايه كل وقتٍ وحينـي!!
وان طحت جتني من حنانه.. تسمّي=وبصوتها الدافي "سلامة جنينـي"!!
يفداك مطواعٍ لها.. يقول سمـي!!=اليا مشت خطوه رجع خطوتينـي!!
ومن الغبا لعيـال "خبلـه" يشمـي=وامه جداها.. تكتـم العبرتينـي!!
مايدري انه رمّ.. يضحك لرمـي!!=وحصيله الخسران.. دنيا وديني !!

وسلامتكم
....

خلف الفريد

04-07-12, 12:12 PM

بسم الله الرحمن الرحيم

قبل شهور تشرفت بحضور الحفل الذي اقامه الصديق العزيز/ محمد بن سعد العفري الفريدي
وجماعته في قصر المعالي بمناسبة حصوله على شهادة الماجستير وفوزه في الانتخابات البلدية
في مدينة قصيباء ، وابو ياسر هو مدير ثانوية القواره وهو رجل عصامي وصاحب خلق وكرم ...
وقد شاركت تلك الليلة الرائعة بهذه القصيدة :

ياجامـع الثنتيـن علـم وجـداره=اجمل تهانـي مـن رفيـقٍ يـودّك
اخذتهـن بالمرجلـه والجـسـاره=ومن راس ابوك وراس خالك وجَدّك
كلٍّ علـى قـدره يكـون اقتـداره=وانته يابو ياسر ..بعزمك وجِـدّك
اما مجـال العلـم عنـدك نـداره=ولو تكبر الصعبات ما بـاح سـدك
اليوم ترفـع ماجستيـر بشطـاره=ورسالة الدكتـوراه منهـا تشـدّك
وامـا الجـداره ياسليـل النمـاره=اخذتها باسبـاب صدقـك وكـدك
دخلـت مضمـارٍ يثـوّر غـبـاره=وطلعت من بين الاصايل بجهـدك
وكفوٍ لها يـوم اعتليـت السفـاره=حرٍّ تشـرّف يـوم يرجـون هـدّك
ولا هانوا اللي كرمـوك بصطـاره=ولا هانوا ضيوفك ولا هـان خـدك
قصر المعالي صار مثـل المنـاره=تـواردوه الـلـي يكـنّـون ودك
ما جابهم غيـر الوفـا واعتبـاره=ويدرون عن قدر المحبيـن عنـدك
واقبل تحياتـي وصـدق العبـاره=وان قصّرت يكفيـك قلـبٍ يـودك

خلف الفريد

04-07-12, 12:19 PM

جاءني مستشيراً ...
فكان هذا الجواب المتواضع !!

ان طعتني .. كان المشوره صحيحه=هذي يمينـي حـط كفـك بكفّـي
جدّد شبابك .. واعتبرها نصيحـه=العمر يامـال السلامـه مقفّـي !!
واعرض عن المترديه والنطيحـه=وضح النقا .. ماهو زواج التخفي!!
واعلن صراحه للوجيـه الفليحـه=الصيف لبسه بالشتـاء مايدفـي!!
" شفّي من الزينات خطو المليحـه=يالله تحقق لـي مـرادي وشفـي"
هذا جوابـي والمعانـي صريحـه=وياقـل منهـم واقفيـنٍ بصفّـي!!
وكان انت ماتصبر على كل صيحه=ترى حلالك يابـن عمـي يكفـي!!
وسلامتكم

خلف الفريد

04-07-12, 01:14 PM

بسم الله الرحمن الرحيم

في ليلة بهيجة راقية في كل شيء
معازيب امتزجت بهم مكارم الاخلاق وعلو الهمم ومعالم الصدق
ضيوف جذبهم الوفاء وابهرهم عمق المحبة وكرم الضيافة
شعراء ابدعوا واسعدوا وابهجوا وكانوا عند حسن الظن
زملاء كان وجودهم دلالة المودة والمحبة والوفاء
((انها ليلة فرح الملازم اول/ محمد بن فهد بن محمد الوسوس))
في هذا الجو العبق المعطر بالعود والمضمخ بكلمات "هلاهلا ومرحبا حياكم الله"واخواتها ...
كنت متواجداً بدعوة من الكبير في مقامه المفرط في وفائه ، الخال والصديق منصور الوسوس..
لم أشارك لظروفي الصحية وعودتي من رحلة علاج ، ومع هذا أبوا من يصدق عليهم :
على قدر اهل العزم تأتي العزائم ُ...وتأتي على قدر الكرام المكارمُ
الا ان يكرموني زادهم الله كرامة وعزاً ..
ولذا لا اجد ما أرد به الا هذه الحروف المتواضعه :

خوالـي اللـي تشبـه جبـال مـكـه=هو عندنا اكرم من شموخ الجبالي ؟؟!!
حتى مـع التقصيـر مـا فيـه فكـه=دايـم مواقفهـم سـمـوّ ومعـالـي
يابـن محمـد مابنـا فـيـك شـكـه=والشـك مايلحـق وجيـه الخـوالـي
الجـود بـابٍ لـك وصعـبٍ تصكـه=طبـعٍ ورثتـه ياكـريـم السبـالـي
قبـل العشـا درعٍ مـن التبـر سكـه=وبعد العشا بشتٍ ومـن نـوع غالـي
ناديـت انـا للطّيـب .. بالله زكّـه!!=قال: ابـو يـارا ماعطانـا مجالـي!!
اللي علـى الطـولات كفّـه تحكـه!!=ماهـو بحـاجـة تزكية..همـلالـي!!

خلف الفريد

04-07-12, 01:18 PM

مع تحياتي للشاعر نواف بن هلال ....
نخيت العود وهذا جوابه .....

حي المعان اللي لها اشكال والوان=مـن راس حـرٍّ مانـدوّر بديلـه
فيها جواهر مع زمـرد ومرجـان=وفيها مزاييـنٍ بـراس الطويلـه
فصاحة الجاحـظ بخـطٍّ وعنـوان=والا المقفّـع بيـن دمنـا وكليلـه
لكن صلاته نـوب تسبـق لـلاذّان=وليا سألتـه قـال هـاذي نفيلـه
ياصاحبي دلوك تصافـق بجيـلان=وحنا نتحرى فـوق راس النثيلـه
ارفق على شيبٍ تراقـل وشبّـان=ولا تترك الغايـه تبـرر وسيلـه
اغلى رصيدٍ دونـه قفـول بيبـان=ومنبع مجار النيل مـن سلسبيلـه
نوب اللسان تحرّضه روس الاسنان=ونوب الخليل يشوف جفوة خليلـه
خل الامور احيان واحيان واحيـان=لاتزرع الازهار باوسـط مسيلـه
وابشر بعـزّك ياسلايـل بليهـان=ان ماحملنا حمولكـم نرتكـي لـه
غرّد مادامك صرت عاشق وولهان=دوحة عيال العـود دايـم ظليلـه

خلف الفريد

04-07-12, 01:21 PM

ياليتني سالم ٍ من سفـرة البحريـن=ولا شفت من مبسمه سبّب معاناتـي
الناعم اللي خدوده يضحكـن للعيـن=باسباهن "بالمنامه" نصف الامواتـي
حاولت لفت انتباهه مير حظي شيـن=على الاقل ماعطاني حـق شيباتـي
يازين جينا زيـارة بعدهـا ماشيـن=وديارنـا -يالله الخيـره- بعيداتـي
واكرام ضيف "الخليفه" في مقام الدَّين=اما ذكركـم بخيـر او راح شَمَّاتـي
ويوم انتهى من عذابي قال لي حرفين="دوّر على غيرنـا واقبـل تحياتـي"

خلف الفريد

04-07-12, 01:25 PM

بسم الله الرحمن الرحيم

بدعوة من اخي الحبيب الشيخ / هادي بن محمد بن سلطان بن حماد
رئيس مركز النقره كان لي شرف حضور زواج اخي الشيخ النقيب / ذعار بن محمد بن سلطان
على كريمة الغالي الشيخ / نجا بن بشيبش بن حماد "ابو فهد" كما كان لي شرف
القاء هذه الكلمات المتواضعه في ذلك الحفل المهيب الذي اقيم في قصر كريستال ببريده في
شهر ذي القعدة 1432هـ ....

الدوحه اللي قراح الطيب يسقيها=وفروعها كنها نجـومٍ سماويـه
شموخها دايم وتفخـر بماضيهـا=الماضي اللي اساساتـه وراثيـه
في ظلها يستظل اللـي حواليهـا=ومن دونها رماح وسيوفٍ يمانيه
ثباتها من ثبات اخصالهـا فيهـا=صاف الذهب ماهو بضاعه تجاريه
واليوم هادي يذكرنـا بهاديهـا*=شيخٍ مازالت علومه جذوةٍ حيـه
له دعوةٍ مـن غلاهـا مانعديهـا=ماياسع العذر للـروس الفريديـه
وياذعار مبروك باولهـا وتاليهـا=عسى شموع الفرح ماينطفي ضيه
كسبت لك مهرةٍ من راس قانيهـا=ابو فهد طيّبٍ والمهـره اصليـه
مشاعرٍ من غلاك ارسم معانيهـا=على النقا والوفا والحـب مبنيـه
حضرت اهنيك واللابـه اهنيهـا=واهني شيوخنـا واقـول منقيـه
وختامها المسك والعنبر وكاديهـا=والورد واغلى العطورات الفرنسيه

* يقصدالشاعر هنا المرحوم الشيخ " هادي ابا البرَّد" من اشهر شيوخ الحماد

خلف الفريد

04-07-12, 01:29 PM

ليس من رأى كمن سمع ....
ويسعدني نقدكم وملاحظاتكم

اللي عباة الكتف من فـوق متنـه=سوادها ما اخفى لهيب الذوايـب!!
هو يدري انـه للمخاليـق فتنـه=وانه بنظراته عطيـب الصوايـب
وانه بصـوتٍ فيـه رقّـه ولتنـه=يسلب عقول الناس حاضر وغايب
وانه يجي للسوق دايـم بـحتنـه=وان بالقلوب اللي تحرّى لهايـب!!
وان له مكانٍ فيـه مكتوبٍ..اتنـه=وليا وصل مرّت صفوف وكتايـب
وعند انتهاء(عرضه)يصوّت لـنتنه=سواقه الهندي لعيـن الصلايـب!!
......

[/poem]

خلف الفريد

04-07-12, 01:34 PM

بسم الله الرحمن الرحيم

في عيد الاضحى المبارك الماضي كنت كالعاده حاضراً لمعايدة
اقاربي (الفريدات) خلال احتفالهم السنوي في قصر الطراق
للاحتفالات ، فقال أحد الحضور:
من نظراتك يابو عبد العزيز عندك شيء ، فقلت :

عيدٍ سعيد وياعسى العيـد مبـروك=وعسى السعي مقبول في كل عامي
اسعد اوقاتي والمباخر لهـا صـوك=شوفة ربوعي شامخيـن المقامـي
ولا صرت ياقلبي للاحباب مملـوك=اظهر لهـم ودك وتلقـى احترامـي
هذا ولد عمـك وعمـك وذا اخـوك=هم السند وانتـه لهـم كالحزامـي
ماعمرهم على اشهب اللال حـدوك=ولا سمّعوك اقسى العتب والملامـي
ان جيت فرحوا بك وهلّوا وحيـوك=وان غبت عنهم ما الحقوك السهامي
ولا عمرهم مابين الاجناب سبـوك=دايـم يحطونـك بعـال السنامـي
ولا عددوا عنـك الخطيـات واذّوك=لو انهـا كثـر الجـراد التهامـي
ورجلٍ بلا عزّة كما الطير مشبـوك=ورجلٍ بلا عـزوة حياتـه عدامـي
وانا احتزمت بلابةٍ مابهـا شكـوك=ربعي عيال العـود فـدّ الزحامـي
اهل المقـام الصلـف لادكّ داكـوك=واهل الكرم والطيب وقت السلامـي
والا الردي بابه عن الجود مصكوك=وعن المعالـي عيشتـه بالظلامـي
تسمع قراميضه قبل يفتـح البـوك=بس يتلفـت كـن حولـه حرامـي
واليا اطلع رياله بالابهـام مفـروك=الشح صاطٍ بـه لعيـن الرسامـي
جتكم ابياتٍ كنهـا التبـر مسبـوك=هديـةٍ ياهـل الوجيـه الحشامـي

خلف الفريد

04-07-12, 01:41 PM

الشاعر الكبير صاحب الدواوين هنا /علي بن زيد الفريدي (ابو خالد) غاب عن
المجالس منذ فترة طويله لظروفه الصحيه- شفاه الله- واليوم يطل علينا
بتحية في _اهداءات_ ومساجلة رائعة في الخاص وفرحاً بهذه الطلة الكريمه
اهديه هذه الكلمات باسمي ونيابة عنكم .....

يامرحبا مليون ياعلي بن زيد=مايركع الراكع وما صام صايم
ترى وجودك يبو خالد لنا عيد=ومثل البراد اللي تجيبه نسايم
حبك مثبّت داخل القلب ويزيد=وعلى الذي مثلك ترانا ضرايم
وحبك لربعك مايبي منك توكيد=مثل ثبات طويـق لازال قايـم
ولولا ظروفٍ قيدت صحتك قيد=لقيت في رقمك كثير القسايـم
نبي من اللي كنهن شرد الصيد=من طوّل الغيبات جاب الغنايم

خلف الفريد

04-07-12, 01:47 PM

بسم الله الرحمن الرحيم

تشرفت مساء يوم الجمعه الماضي الموافق 28 محرم 1433هـ بحضور حفل ابناء الشيخ / راشد بن سدحان الفريدي بطيبة الطيبه
وشاركت بتقديم تلك الامسية الجميلة وقد حضر الحفل أقارب واصدقاء وغاب آخرون ممن عرفتهم وصادقتهم عندما كنت اعمل هناك
قبل سنوات طويلة في مطار المدينة المنورة ....
وقد تأثرت عندما لاحت لي انوار المدينة المنورة ومآذنها الخالده وكل مايحمله مثوى الحبيب صلى الله عليه وسلم من قدسية وراحة وسكينة...
وفي خضم هذه المشاعر تذكرت بعض احبابي الذين غيبهم الموت بعدي وكانوا ملء السمع والبصر فكانت هذه الخلجات التي القيتها كما هو في
التسجيل ادناه وقد ثأثر الحضور أيّما تأثر ، وكان ممن ذكرت رجال كانوا من اصفيائي وهم :
- الشيخ الوالد / راشد بن ساير بن سدحان الفريدي .. ابو عبد الله يرحمه الله
- الشيخ الوالد / حمود بن عواد الجويعان الفريدي .. ابو حميدان يرحمه الله
- الشيخ الوالد / عبد الله بن هليل بن عتاق الفريد .. ابو عجب يرحمه الله
- الاخ المهندس / منصور بن فنخير الفريد .. ابو عمر يرحمه الله
- الشيخ الفاضل / محمد بن منصور بن قمزه .. ابو فهد يرحمه الله
فأليكم ما ذلك المدخل :

يوم الحرم بان لي عالـي مناراتـه=ذكرت ربعي وهل الدمع مـن عينـي
والله معيني علـى قلبـي وحسراتـه=مدري اواسي او اطلب من يواسينـي
ذكرت راشـد وترحيبـه ومزحاتـه=له مجلسٍ مايمله ضيـف وادنينـي
وابو حميدان في طيبـه وضحكاتـه=حمود عواد مـن روس الجواعينـي
وابو عجب شايبٍ لي فيـه ميزاتـه=شيخٍ جمع بين طيب الفعل والدينـي
ومنصور فنخيـر روحاتـه وجياتـه=رفيقي اللي مـع الشـده مصافينـي
وابو فهـد مانسينـا كبـر فزعاتـه=من روس ربعٍ لهم بالمجد سهمينـي
الله يجمـع لهـم عفـوه ومرضاتـه=ويغفر لهم يوم نصبـات الموازينـي
مشـوا بـدربٍ طويـلاتٍ مسافاتـه=غابوا وحنا علـى الاثـار ماشينـي
وعسى العوض يوم ذقنا كاس لوعاته=بعيالنا اللي على المنهـاج باقينـي

[/youtube]

وهذه مشاركتي الاساسيه في المناسبه :

وصلتني الدعوه وانا اليوم موجود=ماتنفع الاعـذار لـو هـي عديـده
دون المواجب نفرز البيض و السود=وحق الرفيق اللـي علينـا نزيـده
ولو المدينه دونها بحـور وحـدود=نجـي لهـا لـو المسافـه بعيـده
يقودنا حـب الجماعـه لهـا قـود=وتشريفهم ربيـع قلبـي و عيـده
ويا عيال راشد مانسينا غلا العـود=شيـخٍ علومـه باقيـاتٍ جـديـده
وليا ذكرته شاقنـي جـاره حمـود=شريان قلبي يلتقـي مـع وريـده
حتى ولو غابوا بقى الذكر محمـود=الطّيب يبقى لـه مـوار وشريـده
لعلهم فـي ظلمـة القبـر ولحـود=مكرّمينٍ ما اشتكـوا مـن وقيـده
ولا مات من عقّب صناديد وفهـود=توارثـوا عنهـم صفـاتٍ حميـده
ولي الشرف يامنبع الطيب والجود=يـوم اتعنّـا مـن مدينـة بريـده
والليله الفرحه لها جيـش وجنـود=وعم الفرح باركان ذكرى المجيـده
جموع المحبه تلتقي كنهـا وفـود=والشعر زان وننتقـي منـه غيـده
ونبي نبـارك للعريسيـن بالخـود=ولعلهـا دايـم حـيـاةٍ سعـيـده
حمود مدحه مايبي عـدّ و شهـود=وعبد الرحمن اللي ينومس هديـده
نسل الرجال الي كما غالي العـود=خصلـة سداحيـنٍ ونعـم البديـده
روسٍ مضرينٍ على ضربة الكـود=يوم المواقف والظـروف الشديـده
والشعر صيدٍ شاعره نوب مصيـود=نوبٍ عن الشاعر تلـوذ الطريـده
حاولت انزّها عن النقص والـزود=المستمع يطرب لمعنـى القصيـده
وان كان شفتم في معانـيّ منقـود=ارج السموحه ما بغينـا الزهيـده
وصلاة ربي عـدّ ماكـان معـدود=على شفيع الخلق واكـرم عبيـده

******
اخوكم
خلف بن محمد بن عتاق الفريد

المصدر : http://www.alfredah.net/forum/threads/alfredah34079/#ixzz1qxCAGcFO

خلف الفريد

04-07-12, 01:51 PM

وصلتني بشرى أن طائرة حبيبنا ابو راكان
احمد بن مطر العود الفريدي
قد حطت في مدينة خصيبه الحبيبه
لذا ...
غنّو معي بالله

ارحب تراحيب المطـر=عد النجوم المرقبـات
حفيد عياد* الصطـر=يوم الاصايل عاديـات
يدوس من فوق الخطر=يوم الشفايف يابسـات
كم مرةٍ قضى الوطـر=بالسيف والا بالقنـاة
وياخصيبه رشي عطر=واستقبلي نهر الفرات
ترى سكنك احمد مطر=شيخ الوفا والمكرمات
وبريده قلبهـا انفطـر=مار الذي قد فات فـات
لو ينشطر قلنا شطـر=لكنّ يكفينـا السكـات
وخصيبه ماهي قطـر=ستين كيلو صافيـات
وفيها صناديد البطـر=اهل الفعول الماضيات
وان كان في بالك خطر=تلقى لدينا المغريـات
واهديت لك سطر سطر=اغلى المشاعر صادقات

* الفارس عياد العود
"اخو عيده"

ا

خلف الفريد

04-07-12, 01:54 PM

يابـو زوايـد شـوف خلّـي تعـذَّر=كل ما اتقرب صـار عنـي نحـاوي
كنت احسبـن حبـي بقلبـه تجـذر=اليـا جرحنـي يـوم بكـره يـداوي
وكنت اعذره لاصـار نـوب يتعـذر=ما يملك المحـروم غيـر المنـاوي!!
وابـا اعتـرف دايـم بحبـي مبـذّر=اجيه كلّي مـا حسبـت الخطـاوي!!
ما تذكـر انـك كنـت دايـم تحـذر؟=احرص بغير الجمع تكتب يسـاوي!!
لكن حبيـب الـروح سيفـه مشـذَّر=وانا غديت بحال "عيسى الحسـاوي"
يمنى الكرم يشبع بهـا دابـي الـذر=ويمنى الردي عادت بحجرف شفاوي!!

خلف الفريد

04-07-12, 02:03 PM

بسم الله الرحمن الرحيم

أحبتي قناديل المجالس الكرام :
يوم الاثنين الماضي الموافق غرة صفر 1433هـ فقدت رجلاً ليس كمثل الرجال
كان بالنسبة لي أباً واخاً وصديقاً وكان مثلي الاعلى في صفات الرجولة
تربيت في كنفه وتنعمت برعايته فكان نعم الوالد الراعي
عملاق قل ان يجود بمثله الزمن ويندر ان تلد مثله النساء
انه الكبير في كل شيء
انه والدي الشامخ خالي / سعد بن عماش بن نافع ابو عماش الوسوس
رحمه الله رحمة واسعه وعوضنا بفقده خيرا
وجعل الصلاح بذريته ليحملوا لواء العز والمكارم من بعده
ورغم هول المصيبه وفداحة الفقد وألم الفراق الا انني استطعت ان ارثيه بهذه
الابيات المتواضعة على عجل وغصة .....

لا والله اللي طوينا صفحة امجـادي=لكنهـا خالـده مـن طيـب كاتبهـا
كم واحدٍ مات وموته يعتبـر عـادي=لكن فقيـد المكـارم مـن مصايبهـا
وحنا فقدنا شبيـه طويـق منقـادي=قمة شمـوخٍ قليـل النـاس يقربهـا
وكان الثكالى عليه بحـزن وحـدادي=كـل القبيلـه دهاهـا فقـد غايبهـا
هذا عرين الغضنفر للعـزاء ينـادي=من عقب صوته سباع الغاب يرعبها
سد ٍّتفكـك وسيلـه حـدّر الـوادي=يوم اضعفنه سنين العمـر واشهبهـا
قوافل المجد تاهت واختفـى الحـادي=اللـي بصوتـه يقدّيهـا ويطربـهـا
كان انها بالشجاعه سيـف جـلادي=بتاع ..واقسـى النتايـج مايحسّبهـا
والراس مليانٍ عـز وراي وعنـادي=ويمنى الكرم ماسمعنا مـن يعذربهـا
وفي وصل الارحام مثل الغيث لاجادي=يوم ان بعض البشر تقطـع قرايبهـا
وياللي تبي شور اخو نوره والانجادي=الدار تشكي لكـم فقـدان صاحبهـا
اليـوم مطلوبنـا منكـم يالاجـوادي=حلّوه مع دعـوة ٍ محتـاج طالبهـا
ويالله يارافـعٍ سبـعٍ بـلا عمـادي=ياكاشـف الغـم ويافـارج كرايبهـا
تقبل عزانـا وتجبـر كسـر الاولادي=يامـن رجـاوي عبـاده مايخيّبهـا
وضيفٍ ببابـك فقيـرٍ مامعـه زادي=اغفر ذنوبـه وفكّـه مـن نشايبهـا
وصلاة ربي على مرسولنـا الهـادي=ماهلّل اتبـاع دينـه فـي مناكبهـا

خلف الفريد

04-07-12, 02:08 PM

بدعوة من اخي الحبيب
الاستاذ فالح محمد السدحان مدير المدارس السعوديه في اسطنبول
زرتها عام 1432هـ وبعد عودتي بشهور كانت هذه الخلجات :

اشتقت يافالح لشوفة اصطنبـول=وكل اشتياقي "بالحقيقه" لشوفك
"الطِّيب" ماننساه لو كمّل الحـول=وانته جمعت الطِّيب داخل كفوفك
عندك مهمه والتزام ٍ ومسـؤول=وعند المواجب ماتحدّك ظروفـك
دايم حجاجك مسفهلٍّ على طـول=غير الوداد اللي تكنـه بجوفـك
ذكرك بدار الترك ماهو بمجهـول=زودٍ على الاصحاب تثني ضيوفك
حرٍّ على الطولات ضاري ومجبول=وعند اللوازم ثابتٍ فـي وقوفـك
ومن دون تقليلٍ بربعي هل الطَّول=قليلةٍ بيـن الجماعـه صنوفـك
لكن يسليني ليا طق بـي جـول=اني اتابع (بالمجالـس) حروفـك

خلف الفريد

04-07-12, 02:16 PM

واثناء وجودي بضيافة ابو محمد كنت اتجول في عاصمة الخلافة الخالده وارى الاثار
من مساجد وقلاع وحصون وامجاد تبهر فاختلطت الافكار وامتزج الماضي بالحاضر
وكانت هذه العبرات :

قم يابو محمـد ودنـا ناصـل الدكتـور=احس المشاعر داخلـي حرهـا صالـي
حروف المعاني اصبحت غصة بالـزور=ابا احاول التعبير عن بعـض الاحوالـي
انا سايح ٍمسرور ولكن مانـي مسـرور=ولو العين تسلى بالنظـر مانـي بسالـي
بس ادوج باسطنبول وامشي بهـا وادور=واخالط جموع الناس وكني بهـا لحالـي
تجاذبنـي الافكاروكنـي بـدون شعـور=احس الزمن والفـرق مابيـن الاجيالـي
واشوف المعالم من مساجد وكبر قصـور=تقل تشتكي للناس من وضعهـا الحالـي
صروح ٍتعلّـت كنهـا ترمـق البسفـور=وبحر مرمره من سطوها صابه اجفالـي
ولقيت الجواب الواقعي في بقايـا السـور=و(ايا صوفيا ) تشهد على نصرنا الغالـي
هنا مر من فتحاتـه الفاتـح المنصـور=وكسب قول (نعم الجيش واميره الوالـي)
مؤسس (خلافه ) صار منها يشع النـور=تسيّر جيوش الفتح من (بابهـا العالـي)
وتكدّرت من جور السنين العجاف وجور=رجالٍ تنكّـر للوطـن ماهـي رجالـي
مسوخٍ محت لامجاد تاريخهـا مـع دور=سلاطين دين ٍمضـرب لكـل الامثالـي
تنكر لهـم مستغـربٍ ماهـو المجبـور=على اهانة ارموز الحضاره والاعمالـي
اهان المساجد والجوامـع وكـل الـدور=قلبها متاحـف ملغـيٍ صوتهـا العالـي
تدوس النصارى فرشها النادر الممهـور=عقب كان فوق ارقابهـا داس (خيّالـي)
ولو الغى مظاهر دين .. محفوظة ٍبصدور=ذا عشقٍ قديـم ٍعنـد الاتـراك لازالـي
بين محمد الفاتح وبين (الخنـا )المقبـور=فروقٍ كبيـره مالهـا حصـر واجمالـي
هذا مسلمٍ في صفحة المكرمـه مشهـور=وهذا (دونميٍّ) هافـي الاصـل محتالـي
فرض نصره الفاشل على شعبه المبهـور=وتسمى بـ(ابوهم ) ظلم في لحظة اهبالي
صخرهم بقوة جيشـه الملحـد المغـرور=وعقد صفقته مع نادي الغـرب الانذالـي
ولكن موار الخير عـادت لهـم بظهـور=بـدوا يـاردون لمنبـع ٍطعمـه زلالـي
اعاد الاصالـه للوطـن واحـدٍ ممـرور=جمع بين حب الدين مع طيـب الافعالـي
رجب اردوغان الصيرمي فارسٍ مغمور=لكنّ اثبـت انـه حامـل كـل الاثقالـي
يقول الفخر في دين الاسلام ماهـو زور=وصمد في وجوه الغرب والقيل والقالـي
وتوجّه لشرقٍ كان مـن ظلمهـم مقهـور=وعيونه على الاقصى بها الدمـع همالـي
تذكًر صلاح الدين يـوم العيـون العـور=تفرّج على عورات غزّه (وتكتالـي) !!!

خلف الفريد

04-07-12, 02:19 PM

بدعوة كريمة من اخي محمد عبد الهادي الطميشاء رئيس المجلس البلدي بالاسياح
تشرفت بحضور حفلته الانتخابية قبل شهور والتي وافقت اليوم الوطني وقد القيت فيها قصيدة
بالفصحى ستجدونها في (الاصيل) انشاء الله وفي تلك الليله تحمس احد الاخوة وقال لماذا يا ابا عبد العزيز
لم ترشح نفسك ؟ فلك جمهور كبير !!! فكانت هذه الابيات الفكاهيه :

قم ترشّح ياخلـف كـلٍ ترشّـح=لاتفوّت فرصةٍ تمضـي سريعـه
قلت يكفيني على جويبي مفشّـح=واتمشى في ربى نجد الوسيعـه
الامانه ماهـي وسـامٍ موشّـح=من عطاك الصوت سجّلها وديعه
ان قضينا حاجتـه والا تورشـح=ثم سلب جلدي وخلق الله لكيعه!!
والله اني ماشكيت الضعف والشّح=ولا اعتبر ماقلت قدامـك ذريعـه
بس وشلون اتسمّـى بالمرشـح=والجماعه عندهم عشرين بيعه!!
تبي توهّق خلف لين ايتشرشـح=هي قطاعه ياولد والا طبيعـه!!
دايمٍ بعض البشر حظه مكوشـح=لو طلب ادنى المكاسب مايطيعه!!
ولو ضمنت اصواتكم كان اترشح=مار سكان الوطن سنه وشيعه!!

خلف الفريد

04-07-12, 02:22 PM

ياخايفٍ مني !! وانا منك خايف=لجلي على لوعات صدّك مضرّا
من شفتني دايم لشوفك مهايف=وفي درب حبك صاملٍ ما اتـدرّا
لعبت بي لعب "النضا بالسفايف"=واسقيتني من علقم البين مـرا
ياليت حملي من هواكم خفايف!!=لاصير في مجنون ليلى اتزرّا!!
لكن اظنـك ياوليفـي مسايـف=ومن البدايه كنت عنّي تـذرّا!!
قربتني كايف وصدّيت عايـف!!=ويوم انتهت هجْرتْك!! مني تبرّا؟!

خلف الفريد

04-07-12, 02:25 PM

ليلة الاربعاء الموافق 12/محرم/1433هـ وفي قاعة تالين في بريده
كانت ليلة مزدانة بالوفاء والعطاء ..متدثرة بالحب والبهاء ..
اقامها منسوبو ادراة مرور قصيباء ..
وشرفها المحتفى به مدير الاداره الرائد/منصور محمد الوسوس
كان لي شرف الحضور .. وكانت هذه المتواضعه

غالي .. وتكريمه من رجال غالين=اهل الوفـا والطيـب والاعتبـارا
اخوّةٍ تبنى علـى الـود والزيـن=وعلى المحبـه والنقـا والوقـارا
ويامكرمين اللي تزيـن بتاجيـن=الرايـد اللـي بالنقـا مايـبـارا
ابمدحه لو هو عن المدح به دين=جتني قواف الشعر مثل المهـارا
مدح المجرّب والمعاني عناويـن=ولا عادتي امدح وقصـدي امّـارا
بالمرجله .. خلاّ الصعيبات صفين=صفٍّ على يمينه وصـفٍّ يسـارا
وبالطيب .. يبذل مهجته للمحبين=ماهو من اللي يكثـرون العـذارا
وله فزعةٍ نحطها بيـن قوسيـن=ما اقدر افرّق بين "نخوه" "ويـارا"
وليا تعامل .. مايتعامل بوجهيـن=نهج الصراحه في سلوكه جهـارا
ولا هي غريبه منبته بين نهريـن=منهل خوالـه والعمـام الحـرارا
وانتم لاهنتم يالمعازيـب وافيـن=تشهد لكم "تالين" قومـه وكـارا
تالين!! لاوالله اللي منتم بتالين!!=الاوّلـه عنوانكـم والشـعـارا!!

خلف الفريد

04-07-12, 02:29 PM

بسم الله الرحمن الرحيم

الى حرب كافه
والى نجوم هذه المجالس خاصه
اليكم اهدي هذه الكلمات البسيطه بعدما صمت "مدفع حرب"
بعد ان ودعنا والدنا الغالي الشيخ/ رباح بن طعيميس بن مريخان شيخ شمل الجملا من حرب ..
بعد ان فقدنا تلك الجرأة والشجاعة والكرم ...
والموت حق وكلنا اليه ....لكننا لانتألّم الا لفقد الكبار !!!

ضيفٍ يزور الناس خفيه بـلا علْـم=لايقبـل اعـذارٍ ولا يعطـي علـوم
يزورهم دايـم ولا يعـرف السلْـم=ويدخل بلا استئذان مايهمـه اللـوم
قاسٍ بضرباته بعيـدٍ عـن الحلـم=ومن جرّب افعاله درى الامر محسوم
ولا يعترَض دربه ولا يقال به ظلـم=ولا هو يفرّق بين ظالـم ومظلـوم
وهاذي قبيلة حرب ثلـم بهـا ثلـم=وكسر لها سيفٍ تسلّه على القـوم
غيَّب ربـاح وداخـل قلوبنـا كلـم=ياصعب فقدانـه وتعويضـه اليـوم
شيخٍ حياتـه بالمعالـي تقـل فلـم=لكنهـا فلـمٍ حقيـقـي ومعـلـوم
مرحوم ياشيخٍ على الطايلـه ولـم=وصدر المجالس مركزه دايم الـدوم
دون القبيله يفرز البيـض والدلـم=لسانـه يفنّدهـن وبيديـه لاطـوم
وملوّخ شدوقـه هـزا يبلمـه بلـم=ياكثر صولاته علـى ناقـل الـزوم
ويمنى الكرم ياخذ ويعطي بها هلـم=وامضى حياته بين عازم ومعـزوم
هاذي مشاعر شاعـرٍ كنـه بحلـم=يومٍ خلـيّ البـال وايـام مغمـوم
.......

خلف الفريد

04-07-12, 02:33 PM

بسم الله الرحمن الرحيم

عندما عزمت على حضور زواج ابناء راشد بن سدحان في المدينة المنورة
قبل اسابيع صاحبني في ذلك المشوار الاخ والخال والنسيب/ مصطفى بن فلاح الوسوس
وقد حاول ان تكون راحلتنا سيارته الفورد ولكنني اصررت ان تكون سيارتي
الجيب فلم يجد بد من الموافقه تقديراً للسن واثناء السفر وجهت له هذه الابيات:

يامصطفى خوّتك مامثلهـا امثالـي=لو انهـا غاليـه بالمـال نشريهـا
انته حشيمٍ وقـدرك عندنـا غالـي=ويمناك ماهي بخيله فـي عطاويهـا
ترى السفر يفرز الاول مـن التالـي=وانته لـك الاولـه دايـم وراعيهـا
تزمي كما تزمي الشيهـان بالعالـي=ولا يسلم الصيد من قـوة مداليهـا
والرجل في خوته تبيـن الاحوالـي=ويبين وش معدنـه بآخـر تواليهـا
وانته نسيبي واخوي وفوقها خالـي=من روس ربعٍ تطرّبنـي عزاويهـا
مال للرديه عليـك اليـوم مدخالـي=والناس من فعلها تعـرف مباديهـا
وديتنـي للمدينـه دار الابطـالـي=ولو طعتك الفرت دوّج في نواحيهـا
رحنا على الجيب رغبه وانشرح بالي=يـوم احتزمـت بخـويٍّ مايجليهـا
لازلـت اوده وهـو بالـود لازالـي=وكل رمعةٍ طيّبـه عنـده حراويهـا
ولاتشترى المرجله في كثر الاموالي=المرجله قمـةٍ تصعـب مراقيهـا!!

خلف الفريد

04-07-12, 02:37 PM

كانت مهمة مراقبي الامم المتحده فاشلة منذ البدايه
وعندما علقها روبرت مود النرويجي رئيس المراقبين في سوريا اهديته
هذه الابيات تكريما له !!!!

علقتها يامود وانته معلّق=مهمةٍ صارت على الشام علقه!!
من يوم جيت الشام رجلك تزلّق=تبي تطبّق خطةٍ برض زلقه
حكومة "التقيه"تجيد التملق=ومراقبينك يازرق العين شلقه!!
الناس تذبح وانت عينك تبلّق=والموت حولك صار حلقه وحلقه
يضيمني والناس حولك تحلّق=وانته ماتملك في مخابيك طلقه!!
عقب صلاح الدين تنخاك"جلّق"=ارادة المعبود وذنوب خلقه!!
يامود وش سويت والوقت غلق=الق "العنان"اللي تجوّد به القه!!

خلف الفريد

04-07-12, 03:15 PM

بسم الله الرحمن الرحيم

يامنبع الحب والاشواق والرقـّه=انا دخيلك صدودك بعثر اوراقي
اظهر لي الود مره والعتب بقه=ما باقيٍ من مشاعر حبنا باقي
ثوب العلاقه رقيقٍ واتسع شقه=والابره اللي بيدينك سلكها دقاقي
وزرعٍ زرعته بقلبي يالغضي سقه=الزرع يحيا ويثمر لاعتنى الساقي
من حَبّ لازم يضحي في بَعَض حقه=والا ترى الحب عقبه دايم افراقي
صفّ النوايا وقلبك يالغلا نقّه=والا انت مهما فعلته بين الاحداقي
وان كان قلبي تركته بالعرا ..وقه=من باب الاحسان والله ربنا الواقي
قال المثل كل تعليمه عقب دقه=ولا ظنتي يعتبر به شايبٍ شاقي
.....

خلف الفريد

04-07-12, 03:18 PM

الى ذلك البعيد القريب !!!

ولّعت لك في داخل القلب شمعه=واطفيتهـا بيدينـك الناعماتـي
لعيونك الحلوات لمعـه ولمعـه=مدري غلا والا غـرور البناتـي
رمعت في حبك ثمانيـن رمعـه=وازريت اميّز بينهـن ياغلاتـي
بس اكتشفت انك تبي فيّ سمعه=واكبـر دليـل ابيّنـه ياحياتـي
لاشفت بعيوني علامـات دمعـه=ضحكت ضحكة من يريد الشماتي
اليا تفتت صرح ياصعب جمعـه=وانته تركت القلب مثل الفتاتـي

خلف الفريد

04-07-12, 03:27 PM

ابو فهد اخي وصديقي الشاعر الكبير / سعد بن هذيل الفريدي له تقدير خاص عندي ومن
باب المداعبه اهديه هذه الابيات عندما لاحظت انه يمر على مشاركاتي في فترة من الفترات
دون ان يرد عليها:

يابو فهد ترقب على كـل مشـراف=احيان نسمع صوت واحيان تومـي
انا ادري انـك للمشاكيـل ميـلاف=ومن عادة الرجّال نفسـه تشومـي
والجود من معروض صالات الارياف=ولا يلحق اللي يبذل الجهـد لومـي
والسوق فيه الوان واشكال واصناف=واغلى البضايع مالقت من يسومـي
عروض التجاره ماتشابه للاوقـاف=هذي تدوم وذيـك ماهـي تدومـي
غيري مكانه ياسعد فـوق الاكتـاف=وانا كفوفـي شلهبتهـا السمومـي
انا مجرد عاتـبٍ يطلـب انصـاف=وانت الفهيم وعـارفٍ بالسلومـي
ولا صارت يدين الفتى دايم انظـاف=لامدهـن مـا يرجعـن للكمومـي
ومن حقه التقدير من عهد الاسلاف=ماينقصه فقـدان حـب الخشومـي

وقد رد علي بفصيدة جميلة وطويلة سوف اوردها هنا انشاء الله